खोज

बुटवल उपमहानगरपालिकाले कृषि क्षेत्रलाई आधुनिकीकरण गरी बुटवल उपमहानगरपालिका भित्रको मोतिपुर सेमलार क्षेत्रलाई अर्गानिक जोनका रूपमा विकास गरिने जानाएको छ । चालु आर्थिक बर्षमा बुटवल उपमहानगरपालिका कृषि विकास शाखा र पशु पंक्षी विकास शाखाले गरेका र गर्न लागेका कार्यक्रमको बारेमा जानकारी दिन आयोजना गरिएको अन्तरक्रिया कार्यक्रममा बोल्दै प्रमुख शिवराज सुवेदीले बुटवलको मुख्य कृषि क्षेत्रको रूपमा रहेका मोतिपुर र सेमलार क्षेत्रलाई अर्गानिक जोनको रूपमा विकास गर्न लागिएको जनाएका हुन् ।
उनले पछिल्लो समयमा विभिन्न व्यक्तिहरूमा विषादी तरकारी र खाद्यान्न उपभोगबाट मृगौला, मुटु, फोक्सो सम्बन्धी समस्या तथा रोग देखिएको भन्दै यसलाई नियन्त्रण गर्नको लागि पनि एउटा क्षेत्रलाई विशेष क्षेत्रको रूपमा विकास गर्न लागिएको बताएका हुन् । कार्यक्रममा बोल्दै उनले भने–‘नयाँ थपिएका तत्कालिन गाविस मोतिपुर र समेलार क्षेत्रलाई अर्गानिक जोनको रूपमा विकास गरौं ।’ उनले थपे–‘जसले गर्दा त्यहाँ अर्गानिक उत्पादन हुन्छ भन्ने थाहा पाएपछि बुटवल सहरको व्यक्ति किसानको घर दैलोमा नै पुगेर कृषि जन्य उत्पादन खरिद गर्न सकोस ।’ अन्तरक्रिया कार्यक्रममा बोल्दै बुटवल उपमानगरपालिकाकी उप –प्रमुख गुमा देवी आचार्यले विषादी रहित खेतीको रूपमा ग्रीन हाउस निर्माण गरी पाईलट प्लानको रूपमा नगरपालिकाले अगाडी बढाएको भन्दै यसलाई निरन्तरता दिनको लागि आफूहरू तयार रहेको बताएकी थिईन् ।
बुटवल–उपमहानगरपालिकाका प्रमुख प्रशासकीय अधिकृत राजेन्द्र सिग्देलले किसानबाट आएका प्रस्तावहरूलाई छलफलको रूपमा विकास गरी एउटा निश्चित योजना बनाएर नगरपालिका अगाडी बढ्ने बताए । यस्तै नगरपालिकाका प्रवक्ता राम प्रसाद रेग्मीले किसानहरूको बास्तविक समस्या के हो भन्ने विषयमा पहिचान गरी उनीहरूको उत्थानमा नगरपालिकाले कुनै पनि कमी नराख्ने बताएका थिए ।
नगरपालिका कृषि विकास शाखाले हाल सम्म गरेका कार्यहरू र आगामी दिनमा गर्ने कार्यक्रमको बारमा कृषि विकास शाखा बरिष्ठ कृषि विकास अधिकृत भिमनाथ शर्माले प्रस्तुतीकरण गरेका थिए । उनले बुटवलमा रहेका कृषि तथा पशु सेवा केन्द्रबाट प्रदान गर्दै आएका सेवा तथा सुबिधालाई अझ बढि परिस्कृत गरी अगाडी बढाउने बताएका थिए । यस्तै नगरपालिकाले विग्रीएको बोरिङ्गहरूमर्मत संहार, कृषक पाठशाला सञ्चालन लगायतको योजना बनाएको बताएका थिए । यस्तै किसानहरूको धान धितोमा रखेर सहकारी संस्थामार्फत कार्य गर्नको लागि २ लाख ५० हजार रूपैयाँ रकम समेत विनियोजना गरिएको बताएका थिए ।
कृषि थोक बजारको थप स्तर उन्नती, करेशावारी खेती, करेशाबारी च्याउ विकास कार्यक्रम, मौरी विकास कार्यक्रम, धानको विउमामा अनुदान, गहुँको विकाउमा अनुदान र नयाँ प्रविधिको विकास लगायतका कार्यक्रमहरू यो बर्षको कृषि विकास शाखाले समेटको छ । यस्तै बुटवल उपमहानगरपालिका पशु विकास शाखा प्रमुख पशुपंक्षी विकास अधिकृत झविन्द्र बन्जाडेले उत्पादनमा आधारिक अनुदान दिने, पशु आहार, पशु सेवा विस्तार, कृत्रिम गर्भाधान लगायतका कार्यक्रमहरू यस बर्षको बजेटमा व्यवस्थापन गरिएको जनाएका थिए । यस्तै पशु बधशाला सञ्चालनको लागि योजना अगाडी बढाइएको जानकारी दिँदै उनले घाँस बाल विस्तार सेवा, पशुपन्छी रोग नियन्त्रण सेवा लगायतको सेवा विस्तार गर्ने योजना बनाएको जनाएका थिए । कार्यक्रममा कृषक गोपाल पौडेल, द्ववारीका पौडेल, शिव नेपाल, चन्द्रसिंह थापा, कृषि अगुवा युवा देवराज पोखरेल लगायतले आआफ्नो धारणा राखेका थिए । à