खोज

 कृषि तथा पशुपंक्षी बिकास मन्त्री चक्रपाणी खनाल ‘बलदेव’ ले कपिलवस्तु जिल्लामा कृषि अनुसन्धान केन्द्र संचालनको सम्भावना रहेकाले यसको खोजी भइरहेको बताएका छन् ।
कपिलवस्तुको चन्द्रौटामा विहीबारदेखि शुरु भएको पाँचौं चन्द्रौटा कृषि, पर्यटन तथा औद्योगिक व्यापार महोत्सवको समुद्घाटन गर्दै कृषि मन्त्री बलदेवले यस्तो बताएका हुन् । कपिलवस्तु जिल्ला नेपालको बीच भागमा पर्ने भएकोले यहाँ अनुसन्धानको रूपमा कृषि क्याम्पसको ठूलो आवश्यकता रहेको उद्घोष गरे । सो क्याम्पसमा सामान्य विषय पढाइ मात्र नभएर कृषिसँग सम्बन्धित हरेक प्रकारको अनुसन्धान केन्द्रको रूपमा चाहिएको बताए । यसका लागि सयौं विगहा जग्गा आवश्यक पर्ने भएकाले यसको खोजी भइरहेको समेत उनले उदृत गरे ।
जिल्लामा कृषि, पर्यटन र औद्योगिक करिडोरलाई व्यवस्थित गरी अगाडि सबैसँग संयोजन गरी अगाडि बढ्ने समेत उनले प्रतिबद्धता जाहेर गरे । चेम्बर अफ कमर्सका केन्द्रिय बरिष्ठ उपाध्यक्ष राजेन्द्र मल्लले महोत्सवको सफलताको कामना गर्दै ब्यापारीको हितमा ब्यापार संघ सधै रहेको बताए । कार्यक्रममा प्रदेश नम्बर ५ का सामाजिक बिकास समितिका सभापति प्रदेशसभा सदस्य दीर्घनारायण पाण्डे, प्रदेशसभा सदस्य बिष्णु पन्थी, अर्जुन केसी, सहसराम यादव लगायतले महोत्सवको पूर्ण सफलताको कामना गरेका थिए ।
यसका साथै महोत्सव उद्घाटन समारोहमा नेकपाका केन्द्रिय सदस्य बिमला घिमिरे, पूर्व संविधानसभा सदस्य बलराम अधिकारी, शिवराज नगरपालिकाका नगरप्रमुख नेत्रराज अधिकारी, नेपाली कांग्रेसका प्यार मोहम्मद, होटल तथा रेष्टुरेन्ट व्यवसायी संघका जिल्ला अध्यक्ष गोपाल बहादुर खत्री, लगायतले शुभकामना मन्तव्य राखेका थिए ।महोत्सवमा बिभिन्न कृषि स्टल, पर्यटकीय क्षेत्रको प्रचारप्रसार, फोटो प्रदर्शनी, महिला र पुरुषको कुस्ती प्रतियोगिता, थारु नृत्य प्रतियोगिता तथा पाँचौ चन्द्रौटा डान्स आइडलको पनि प्रस्तुति रहने छ ।