खोज

रूपन्देही जिल्ला गैडहवा गाउँपालिकाका युवाहरू ब्यवसायिक कृषितर्फ आकर्षित हुँदै गएका छन् । कृषिको भण्डार क्षेत्र भनेर चिनिने गैडहवा गाउँपालिका अन्तर्गत वडा नं. ६ र ७ का युवाहरू अहिले ब्यवसायिक तरकारी खेतीमा मस्त देखिन्छन् ।
सुर्यलाल केवट त्यस क्षेत्रका सामान्य युवा मात्र होइनन् उनी वडा नं. ७ का नव निर्वाचित वडा सदस्य पनि हुन् । बैदेशिक रोजगारीको शिलशिलामा कुवेत गएका उनी राम्रो कमाई नभए पनि आफ्नै गाउँमा गएर कृषि गर्ने सोंचका साथ घर फर्के । घर फर्केसँगै बुवाले गर्दै आएको निर्वाह मुखी कृषिलाई परिमार्जन गरि अहिले व्यवसायिक कृषिमा रमाएका छन् ।
गत बर्षको स्थानीय निर्वाचनमा वडा सदस्यमा निर्वाचित भएपछि समाज सेवासँगै आफ्नो तरकारी खेतिलाई निरन्तरता दिएका छन् ।
उनीसँगै उनको काममा बुवा, आमा, श्रीमती र दुई बहिनीहरूले पनि सहयोग गर्दै आएका छन् । अहिले घरको सबै परिवार तरकारी खेतिमै ब्यस्त देखिन्छन् । आफ्नो ९ बिघा जग्गा मध्ये २३ कठ्ठामा तरकारी खेति र बाँकीमा धान खेति गरेका केवटले मौसमी तथा बेमौसमी तरकारी खेति गर्दै आएको बताउँछन् । उनको खेतमा अहिले मुला, बोडी, धनिया, प्याज, आलु, भान्टा, टमाटर, सिमी, करेला, गोभी लगायतका तरकारी रहेका छन् ।
उनी मात्र हैन सोही गाउँका चन्द्रजित केवट, बिनोद केवट, बिजय केवट, लालजी केवट, प्रर्सुराम केवट, नन्दलाल केवट लगायत २१ जनाको समूह मिलि १५ हेक्टर भन्दा बढी जग्गालाई तरकारीको पकेट क्षेत्र बनाई काम गरेको केवटले बताए । गत बर्ष ४ लाख बरावरको अनुदान सामग्री, तालिम, बिउ बिजन, पाएका उनीहरूले पकेट क्षेत्र बनाई काम गर्दा आफूहरूलाई काम गर्न उत्साहित बनाएको बताए । यो त उदाहरण मात्रै हो । गैडहवा गाउँपालिका वडा नंं. ७ मै तरकारीमा ५ ओटा पकेट क्षेत्र रहेका छन् । जस्मा यस क्षेत्रका युवाहरूको आकर्षण बढेको देखिन्छ ।
यस क्षेत्रमा उत्पादित तरकारीको मुख्य बजार भनेको बुटवल नै हो । अहिले गैडहवा र बुटवललाई जोड्ने पक्की बाटो बनेसंगै बजारको लागि आफूहरूलाई सहज भएको अर्का कृषक रामबेलास केवट बताउँछन् । दिनभरि तरकारी टिपेर राख्ने र बिहान ४ बजेनै गाडीमा राखेर बुटवल लैजाने गरेको केवट बताउँछन् ।
अन्नको भण्डारणको रूपमा रहेको यस गाउँपालिकाले पनि आफ्नो नीति तथा कार्यक्रममा कृषिलाई प्राथमिकताका साथ राखेको गैडहवा गाउँपालिकाका अध्यक्ष बच्चुलाल केवटले बताए ।à