खोज

बुटवल–बेलहिया व्यापारिक मार्ग निर्माणको काम पछिल्लो समयमा तिब्र गतीमा अगाडि बढेको छ । पटक–पटक समय सिमा थप्दा पनि समयमा नै निर्माण सम्पन्न नगर्ने ठेकेदार कम्पनीलाई धमाधम कारबाही गर्दै बुटवल –बेलहिया सडक व्यापारीक मार्ग बिस्तार आयोजना आगामी चैत महिनासम्म कार्य सक्ने योजना बनाएको छ । व्यापारिक मार्ग विस्तार आयोजनाका ईन्जिनियर योगेन्द्र अधिकारीका अनुसार पटक पटक समय सिमा दिएर म्याद थप्दा पनि काम समयमा नै नसक्ने ठेकेदार कम्पनीहरू कारबाहीमा परेका छन् । जसबाट करोडौ रूपैयाँ जरिवाना समेत संकलन गरिएको छ ।
बुटवल–बेलहिया सडकको दुई स्थानमा सडक निर्माणको जिम्मा पाएको कालिका–तामाङ्ग–प्यासिफिक–जेभिले समयमा नै काम सम्पन्न नगरेपछि ३ करोड ८६ लाख ९० हजार ३ सय ९६ रूपैयाँ ४ पैसा जरिवाना व्यापारीक मार्ग विस्तार आयोजनालाई बुझाएको छ ।
यस्तै अर्को निर्माण कम्पनी जसले भैरहवा क्षेत्रमा काम गर्दै आएको थियो । अलकापुरी निर्माण सेवाले पनि समयमा नै काम सम्पन्न नगरेको कारण कुल ५९ हजार ६ सय ४७ रूपैयाँ रकमा जरिवाना बुझाएको छ । ईन्जीनियर योगेन्द्र अधिकारीका अनुसार ठेकेदार ०.००५ प्रतिशतका अनुसार प्रतिदिन रकम जरिवाना तिर्नुपर्ने नियम रहेको छ ।
नेपाल सरकार, भौतिक पूर्वाधार तथा यातायात मन्त्रालय, सडक विभाग अन्तर्गत रहेको व्यापारिक मार्ग विस्तार आयोजना, वेलहिया–बुटवल सडक, मणिग्राम, रूपन्देही सिद्धार्थ राजमार्गको शुरु विन्दु वेलहियादेखि वुटवल चौराहा सम्मको २४ कि.मी. सडक खण्डलाई ६ लेनमा निर्माण गर्ने गरी २०६९ अषाढमा कार्यालय स्थापना गरी कार्य अगाडी बढाएको थियो ।
आयोजनाको कार्यक्षेत्र २४ कि.मी. भएकोमा २०७२ चैत १७ मितिको विभागिय निर्णय अनुसार यस आयोजनाको कार्यक्षेत्र बुटवल चौराहादेखि गोलपार्क चिडियाखोला सम्म ३.५ कि.मी. थप भै २७.५० कि.मी. कायम भएको छ ।
जसमध्ये यस आर्थिक बर्षसम्म १८ कि.मी.सडक कालोपत्रे भैसकेको छ भने ५.२५ कि.मी. सडक खण्डमा २०७५ चैत्र मसान्त सम्म सम्पन्न गर्ने गरि तिब्र गतिमा निर्माण कार्य भैरहेको छ । बुटवल चौराहा देखि गोलपार्क चिडियाखोला सम्मको ३.५ कि.मी. र बेलहियादेखि बाईपास सम्मको ०.७५ कि.मी. गरी जम्मा ४.२५ कि.मी. सडकको समेत निर्माण कार्य भैरहेको ईन्जीयर योगेन्द्र बहादुर अधिकारीले जानकारी दिए ।
आयोजनाको कूल लागत ५ अर्ब ८६ करोड मध्ये हालसम्म ४ अर्ब ४६ करोड खर्च भैसकेको जनाइएको छ । रकम आयोजनाको कूल लागतको ७६.२४ प्रतिशत प्रतिशत रहेको जनाइएको छ भने भौतिक प्रगती करिब ८० प्रतिशत रहेको छ । प्रत्येक वर्षको विनियोजित वार्षिक बजेटको ९५५ भन्दा बढि रकम खर्च गर्न आयोजना सफल भएको छ । हालसम्म १८ कि.मी. सडक कालोपत्रे भैसकेको छ ।
ईन्जीनियर अधिकारी भन्छन्–‘नदीजन्य निर्माण सामग्रीको अभाव नभएमा ५.२५ कि.मी. सडकखण्डमा २०७५ चैत मसान्त निर्माण कार्य सम्पन्न गरिएको छ र बाँकी खण्ड बुटवल चौराहा–गोलपार्क–चिडियाखोला तथा वेलहियादेखि वाईपास सम्ममा २०७७ श्रावणसम्म निर्माण कार्य सम्पन्न हुने लगभग निश्चित प्रायःछ ।’
आयोजनाले २०७५ चैत मसान्त सम्म बुटवल भैरहवासम्म सम्पूर्ण रूपमा कालोपत्रे गर्ने लक्ष्य अगाडि बढाएको छ भने २०७७ श्रावण सम्ममा बुटवल चौराहा–गोलपार्क–चिडियाखोला तथा वेलहिया देखि वाईपास सम्मको सडकको निर्माण कार्य सम्पन्न गर्ने योजना बनाएको छ ।
अहिले ४ वटा चरणमा कार्य भैरहेको छ । जसमा भारतिय कम्पनी टिसिआईएल ले दुई स्थानमा काम गरिरहेको छ भने एउटामा कालिका–रायमाझीले काम गरिहेको छ ।