खोज

तुलसीपुर उप महानगरपालिका वडा नम्बर २ कुमलगढीको थारु गाउँका किसानहरूले तरकारी खेतीबाट वार्षिक १ करोड ५० लाख वरावरको आम्दानी गर्ने गरेका छन् । गाउँका ४० घर परिवारले करिव २२ विगाहा जग्गामा तरकारी खेती गरेर सो आम्दानी गर्ने गरेको किसान जंगवहादुर चौधरीले वताए । उनले व्यावसायिक रूपमा तरकारी खेती गर्न थालेपछि गाउँको परिचय नै वदलिएको वताए । “पहिला काम खोज्न कहाँ जाने भन्ने थियो अहिले कसरी भ्याउने भन्ने भएको छ” चौधरीले भने ।
सरस्वती कृषि सहकारी संस्थाका अध्यक्ष समेत रहेका चौधरीले तुलसीपुर उप महानगरपालिकाले कृषि प्राविधिक, विउँ विजन र उपकरणमा सहयोग गरेको वताए । उनले थप उत्पादन वृद्धिका लागि सिँचाई सुविधामा सहयोग गर्न पनि आग्रह गरेका छन् । “यहाँ सिँचाईको निकै समस्या रहेको छ, यो समाधान भयो भने अझै उत्पादन वृद्धि गर्न सकिन्छ” चौधरीले भने । सिँचाई सुविधा नभएकाले कृषकहरूले इनारको पानी प्रयोग गर्ने गरेको कृषक पार्वती चौधरीले वताईन् । “हामी सबैले घरमा २ वटा इनार वनाएका छौ एउटा सुकेपनि अर्कोबाट खेतमा पानी लैजान्छौ” पार्वतीले भनिन् । उनले वर्षमा चार बाली तरकारी खेती गरेको वताउँदै सिँचाई सुविधा नहुँदा आशा गरे अनुसार उत्पादन गर्न नसकेको वताईन । पार्वतीको ६ कठ्ठा वारीमा अहिले खुर्सानी, टमाटर र काउली फलेका छन् ।
केही वर्ष अगाडिसम्म वेरोजगारीका कारणले गलत काममा लाग्नाले गाउँमा झैझगडा हुने गरेकोमा अहिले सबैलाई कामको चटारो परेका कारण मिलेर खेती गर्ने गरेको कृषि सहकारी संस्थाका सचिव जयराम चौधरीले वताए । “सबैले आ–आफ्नो जग्गामा खेती गरेपनि मिलरे गर्ने गरेका छौ” जयराम चौधरीले भने । उनका अनुसार ९५ घर धुरी रहेको गाउँमा ४५ जनाले निर्वाहमुखी तरकारी खेती गर्ने गरेको जानकारी दिए । गाउँमा व्यावसायिक तरकारी खेतीको अगुवाई गर्ने जंगवहादुरले वजार व्यवस्थापनको समस्या रहेको वताए । “खेतमै किन्न आउनेहरूले मनलाग्दो भाउ तोक्छन् भने बजारमा बेच्न लैजाँदा यातायातको अभाव छ” जयरामले भने । सबै किसान मिलेर तरकारी विक्री गर्नका लागि सानो गाडी भाडामा ल्याएको भएपनि त्यो पर्याप्त नभएको उनको भनाइ छ । “दुःख गरेर उब्जनी गरेको तरकारी उचित मुल्यमा बेच्न पाइएन भने कसरी यसलाई निरन्तरता दिन सकिन्छ र ?” जयरामले चिन्ता व्यक्त गरे । किसानहरूका समस्या समाधान गरेर उनीहरूलाई व्यावसायिक तरकारी खेतितर्फ थप अगाडि बढाइने तुलसीपुर उप महानगरपालिका कृषि शाखा प्रमुख तिलक केसीको भनाइ छ । उनले किसानलाई खेतमै कृषि प्राविधिक उपलब्ध गराउनका लागि उप महानगरपालिकाले पहल गरिरहेको जानकारी दिए । उप महानगरपालिकाका आर्थिक समिति संयोजक माधव वलीले किसानहरूलाई कृषि उपज विक्री वितरणमा सहज होस् भन्नका लागि उप महानगरपालिकाले कृषि उपज वजार केन्द्र निर्माण गर्न लागेकोले बजारको समस्या हुदैन । उनले किसानहरूको सम्मानका लागि कृषि परिचय पत्र वितरण गर्न लागेको समेत जानकारी दिए । तुलसीपुर उप महानगरपालीका २ का अध्यक्ष राजु आचार्यले सिचाईको समस्या समाधानका लागि पहल गर्ने वताएकाछन् । उनले डिपवोरिङ निर्माणका लागि वडाले उप महानगरपालीकासँग पहल गर्ने समेत बताए ।