खोज

रोल्पा पूर्ण खोप सुनिश्चितता जिल्ला घोषणा भएको छ । सदरमुकाम लिवाङमा सोमवार आयोजित एक औपचारिक कार्यक्रममा ५ नंवर प्रदेशका सामाजिक विकास मन्त्री सुदर्शन वरालले रोल्पालाई पूर्ण खोप सुनिश्चित जिल्ला घोषणा गरेका हुन ।
१५ महिना भित्रका वालवालिकाहरुलाई ११ थरिका खोप तालिका अनुसार नियमित लगाएको मापदण्ड पुरा गरेकाले जिल्लालाई पूर्ण खोप सुनिश्चितता जिल्ला घोषणा गरिएको हो । जिल्लामा खोपको कभरेज ९५ प्रतिशत पुगेकाले स्वास्थ्य सेवा विभागको स्वीकृतीमा रोल्पा जिल्लालाई पूर्ण खोप सुनिश्चितता जिल्ला घोषणा गरेका हौ जिल्ला स्वास्थ्य कार्यालय रोल्पाका प्रमुख डा. सुशिल आचार्यले भने । देशमा अझै पनि २२ प्रतिशत बालवालिका खोप वाट वंचित रहेको र १ प्रतिशत वालवालिकाले कुनै पनि खोप लगाउन नपाएको तथ्यांक प्रस्तुत गर्दै त्यसको तुलनामा रोल्पा जिल्लाको खोपको कभरेज राम्रो रहेको आचार्यले जानकारी दिए । नेपाल सरकारको निर्देशिकामा तोकिएका सवै मापदण्ड पुरा भएको स्वास्थ्य सेवा विभागले प्रमाणित गरेपछि मात्रै पूर्ण खोप सुनिश्तिता जिल्ला घोषण गर्ने प्रावधान छ आचार्यले भने । खोप निरन्तर चलिरहने प्रकृया रहेको वताउदै पूर्ण खोप सुनिश्चितता जिल्ला घोषणा संगै यसको दीगोपना चूनौतीको डा. आचार्यको भनाई छ । स्थानीय सरकार, महिला स्वास्थ्य स्वयमसेविका, स्वास्थ्य कार्यालयका संरचरना र नागरिक समाजको सहयोगले यसको दीगोपना सुनिश्चिता हुनेमा आफु आशावादी रहेको आचार्यको भनाई छ ।
सन् २०१७ भित्र सवै जिल्लालाई पूर्ण खोप सुनिश्चितता जिल्ला घोषणा गर्ने सरकारको लक्ष्य रहे पनि विविध कारणवस तोकिएको समयमा घोषणा गर्न नसिकएको स्वास्थ्य सेवा विभागमा प्रतिनिधि वसन्त श्रेष्ठले वताए । नाकावन्दी, आम निर्वाचन आदी कारणले तोकिएको समयमा १ वर्ष थप गरेर २०१८ भित्र सवै जिल्लालाई पूर्ण खोप सुनिश्चितता घोषणा गर्ने लक्ष्य निर्धारण गरेका छौ श्रेष्ठले भने । रोल्पा सहित ४७ जिल्ला पूर्ण खोप सुनिश्चितता जिल्ला घोषणा भईसकेको औल्याउदै वाँकी जिल्ला समेत घोषणाको लाईनमा रहेको श्रेष्ठले जानकारी दिए ।
कार्यक्रममा ५ नंवर प्रदेशका सामाजिक विकास मन्त्री सुदर्शन वरालले खोप मानव स्वास्थ्यको महत्वपूर्ण पक्ष रहेको वताउदै स्वस्थ्य नागरिकले मात्र देश विकास गर्न सक्ने धारणा व्यक्त गरे । खुला दिसामुक्त, पूर्ण साक्षर जिल्ला संगै पूर्ण खोप सुनिश्चितता जिल्ला घोषणाले राजनैतिक अगुवाइ गरेको रोल्पाले सामाजिक अभियानमा समेत अगुवाई गर्न सफल भएको मन्त्री वरालको भनाई थियो । केही महत्वपूर्ण सामाजिक अभियानमा सफलता हासिल गरे पनि अझै कैयौं सामाजिक कुरिती र कुसंस्कार विद्यमान रहेकाले तीनलाई समेत अन्त्य गर्दै अगाडी वढ्नु पर्ने मन्त्री वरालले वताए ।
३८ प्रतिशत परिवार नियोजन दर रहेको रोल्पा जिल्लामा मातृ मृत्यु १ जना मात्रै रहे पनि आवश्यक पूर्वाधार र दक्ष जनशक्तीको अभावले सेवा प्रवाहमा समस्या देखिएको जिल्ला स्वास्थ्य कार्यालय रोल्पाले जनाएको छ । दरवन्दी अनुसार विशेषज्ञ चिकित्सक उपलव्ध नहुनु, जिर्ण रहेको भवनवाट विरामीको उपचार गर्नु, अन्य आवश्यक मेसिन उपकरण समेत उपलव्ध नहुदा सस्तो र सुलभ मूल्यमा स्थानीय स्वास्थ्य संस्थावाट स्वास्थ्य सेवा लिने आफुहरुको चाहाना पुरा हुन नसकेको जिल्लावासीहरुले वताएका छन ।