खोज

जिल्लाका स्थानीय तहले अनुगमनमा चासो नदिन नदीजन्य पदार्थको दोहन र चोरी निकासी बढन थालेको छ । स्थानिय तहको गैर जिम्मेबारीका कारण पछिल्लो समय जिल्लाभर नदीजन्य पदार्थको खुल्लम खुल्ला चोरी बढेको हो ।
सोमबार मध्यरातमा कपिलवस्तु नगरपालिका ४ पटखहवामा पुग्दा बाणगंगानदीबाट बालुवा चोरी गरेर ल्याउदै गरेका दुई टयाक्टर फेला परेका थिए । सञ्चारकर्मीको टोलीलाई देख्दा टयाक्टर चालकले सवारी छोडेर भागेका थिए । सो पश्चात सो स्थानमा पुगेको प्रहरीले नदीजन्य पदार्थको चोरीको बिषयमा जानकारी पाए पछि प्रहरीको टोलीले बालुवा भरिएको लु १ त ८८०५ र लु १ त ६०९७ नम्बर दुई वटा टयाक्टर नियन्त्रणमा लिएको थियो । त्यस पश्चात खटिएको प्रहरीटोलीले नदीबाटै बालुवा चोर्दै गरेको लु ३ त ४८५७ नम्बरको टयाक्टरलाई समेत खोलाबाटै नियन्त्रणमा लिएको हो । बालुवा चोरी गरेका लु १ त ६०९७ नम्बरमा टयाक्टरमा लु २ त ३५२५ नम्बरको ट्रली र लु १ त ८८०५ को टयाक्टरमा लु २ त १३१० नम्बरको ट्रली प्रयोग गरेको भेटिएको थियो । बालुवा चोरीका लागी प्रयोग गरिएका दुई टयाक्टरमा छुट्टै टयाक्टरको ट्रली प्रयोग गरिने झुक्याउने गरिएको हो । पछिल्लो एक साता यता दैनिक जसो रातारात १० बढि टयाक्टरमा बाणगंगा नदीको बालुवा चोरी गर्ने गरेको एक स्थानियले नाम नबताउने सर्तमा भने । “सातभर बालुवा चोर्ने टयाक्टरको हो हल्लाले एका तिर सुत्न पाएका छैनौ भने अर्का तर्फ अनावश्यक व्यक्तिको आवतजावतले सुरक्षा खतरा पनि बढेको छ । ” उनले भने । स्थानिय तह र स्थानिय प्रहरीको सहयोग नभए दैनिक सो मात्रामा बालुवा चोरी सम्भवनै नभएको उनले तर्क गरे । केहि जन प्रतिनिधीबाट राजनैतिक संरक्षण गरिएकै कारण नदीजन्य पदार्थ चोरी बढेको श्रोतको दाबी छ । “नगरकै केहि जनप्रतिनिधी भएका व्यक्तिको प्रत्यक्ष संरक्षणमा बालुवा चोरी हुने गरेको छ । स्थानिय तह नियन्त्रणमा बेखबर हुनुले यो तथ्यलाई प्रष्ट्याएको छ ।” श्रोतले दाबी ग¥यो । आफुहरूले सञ्चारकर्मी चोरीस्थलमा पुग्दा बालुवा चोरेर ल्याउदै गरे्को नदीजन्य पदार्थको चोरी तस्करीमा संलग्न दुई वटा टयाक्टर र सो पश्चात सोहि स्थानमा प्रहरीले थप एउटा टयाक्टर गरि तिन टयाक्टर नियन्त्रणमा लिएको जिल्ला प्रहरी कार्यालय कपिलवस्तुका प्रहरी नायब उपरिक्षक रवि रावलले जनाए । “चाडको बेलामा सुरक्षा व्यवस्था मिलाउदाँ नदीजन्य पदार्थको चोरी नियन्त्रणमा समस्या परेको छ । नियन्त्रणमा लिईएका नदीजन्य पदार्थ चोरीमा संलग्न टयाक्टरलाई कपिलवस्तु नगरपालिकामा जरिवाना तिर्न लगाएर छोड्छौ ।” रावलले भने ।
नदीजन्य पदार्थको चोरीमा संलग्न तिन वटै टयाक्टरले १०÷१० हजार जरिवाना तिराई छाडिएको उनले जनाए । नदीजन्य पदार्थको चोरी तस्करी रोक्न कडाई गरिने कपिलवस्तु नगरपालिकाका नगर प्रमुख किरण सिंहले प्रतिक्रिया दिए । पछिल्लो समय जिल्लाको बाणगंगा नगरपालिका र कपिलवस्तु नगरपालिकामा नदीजन्य पदार्थको चोरी बढदै गएको छ । नदीजन्य पदार्थको चोरी तस्करी नियन्त्रणमा जिल्लाका सरोकारवालाले ध्यान दिन नसक्नु रहस्यमय देखिएको छ । स्थानिय तहलाई प्राकृतिक श्रोतको संरक्षणको जिम्मेबारी दिए सगै नदीजन्य पदार्थको चोरी तस्करी बढदै जानुले स्थानियतहको कार्य सम्पादनले प्राकृतिक श्रोतको संरक्षण हुने बिषयमा शंका उब्जन थालेको स्थानियको ठम्याई छ ।