खोज

राधेश्याम विश्वकर्मा
भैरहवा, २५ असार ।

स्थल नाका हुदै सबै भन्दा बढी पर्यटक नेपाल भित्रयाउने बेलहियामा पर्यटकहरुलाई सूचना दिने कुनै पनि संयन्त्र छैनन् । तेश्रो मुलुक मात्र हैन भारतबाट नै आउने कतिपय पर्यटकहरुलाई नेपाल भित्रिएको थाहै हुदैन । भुगोल मात्र हैन रहन सहन र पहिरन पनि उस्तै हुदै पर्यटकहरु नेपाल भित्रिएको चालै पाउदैनन् ।
अब परिवेश फेरिदै छ । भगवान गौतम बुद्धको जन्मस्थल बेलहिया बुद्धमय बन्ने भएको छ । लामो समयको प्रतिक्षा पछि भैरहवाले गौतम बुद्धको जन्मस्थलको चिनारी पाउने भएको छ । भारतीय पथ प्रदर्शकहरुले पर्यटकहरुलाई नेपाल प्रवेश गरेको पत्तो नै नदिई नेपाल भ्रमण गराउने गरेकोमा अब भने पर्यटकले नेपाल पसेको चाल पाउने भएका छन ।
स्थलमार्ग हुदै नेपालकै सबै भन्दा बढी पर्यटक भित्रयाउने नाकाको रुपमा रहेको बेलहिया नाकामा बौद्ध दर्शन झल्किने आकर्षक प्रवेशद्धार बन्ने पाए पछि यसले पर्यटकहरुलाई पथ प्रर्दशनमा केही सहजता आउने अनुमान गरिएको छ । नेपाल–भारत सीमा नाका बेलहियामा नेपालको चिनारी सहित बुद्धत्व झल्कने आकर्षक प्रवेशद्वार बनाइने भएको छ । सिद्धार्थनगर नगरपालिकाले १ करोड ९९ लाख लगानीमा उक्त द्वार बनाउन लागेको हो ।
सिद्धार्थनगर नगरपालिकाले रुपन्देहीको नेपाल–भारत सीमानाका बेलहियामा नेपालको चिनारीसहित बुद्धत्व झल्कने आकर्षक प्रवेशद्वार बनाउन निर्माण कम्पनीसँग ठेक्का सम्झौता गरेको छ । नगर प्रमुख हरिप्रसाद अधिकारीले कार्यभार सम्हालेको एक वर्ष पुगेको अवसरमा गेट निर्माण सम्झौता गरिएको हो । सोमबार नगरपालिका र निर्माण कम्पनी प्राकृतिक निर्माण प्रालि भैरहवाबीच सम्झौता भएको छ । १ करोड ९९ लाखमा निर्माण हुने गेट ठेकेदार कम्पनीले आउँदो २०७६ मसान्त भित्र निर्माण सम्पन्न गरि सक्ने गरी सम्झौता गरिएको नगर प्रमुख हरिप्रसाद अधिकारीले बताए ।
नगरप्रमुख अधिकारीले भारत लगायत तेस्रो मुलुकबाट आउने पर्यटकलाई अब बेलहियामा आउँदा वित्तिकै बुद्ध नगरी सिद्धार्थनगर र बुद्ध जन्मस्थल लुम्बिनी प्रवेश गर्दैछौं भन्ने सन्देश दिने आकर्षक द्वार बनाउन लागिएको बताए । ‘हाम्रो उद्देश्य बुद्धजन्मस्थलसँगै नगरपालिकाको प्रचार–प्रसार गर्नु हो’, उनले भने– ‘यहाँ आउने लाखौं बौद्धमार्गीहरुले नेपाल प्रवेश गर्दा वित्तिकै बुद्धको सामिप्यतामा आएको महसुस गर्ने छन् र यो सन्देश विश्वभरी फौलाउने छन् ।’ उनले द्वार निर्माण पछि यस क्षेत्रको होटल व्यवसाय समेत फस्ट्याउने बताए ।
नगरपालिकाले नेपाल आउने पर्यटकहरुले बुद्धभूमि आइपुगियो भन्ने सन्देश दिने कलात्मक शान्तिद्वार निर्माण गर्न लागेको जनाएको छ । प्रवेशद्वार ५० मीटर लम्बाई, २३ मीटर ८० सेन्टिमीटर चौडाई तथा सडकदेखि २९ मीटर अग्लो हुनेछ । द्वारलाई नेपालको चिनारी झल्कने कलात्मक बस्तु, स्वयम्भूको आँखासहितको बुद्ध चिनारी, अशोका, स्तूपा, विभिन्न १२ वटा बुद्ध मूर्ति, हर्निका, आर्च, स्पायर गजूर, हरियाली जोन, नेपाल«को राष्ट्रिय झण्डा, बुद्ध झण्डाले सिंगारिनेछ । यस्तै द्वारमा बौद्ध ध्वनी गुन्ज्याएमान पनि हुने छ । यो नेपालकै नमूना गेट हुने नगरपालिकाका प्रमुख प्रशासकीय अधिकृत ख्यामबहादुर थापाले बताए ।