खोज

 तुलसीपुर उप महानगरपालीका १९ का हरीवहादुर रोकाले भैंसी पालन ब्यवसाय गर्न थालेको ५ वर्ष पुग्यो ।
उनले २ वटा भैसीवाट व्यवसाय सुरु गरेका थिए । सुरुमा भएका दुईवटा भैसीको दुध उनले गाँउमै विक्रि गर्दथे । थोरै पाल्दा पनि तिनकै स्याहार सुसारमा दिन वित्ने भएपछि हरीवहादुरले फर्म दर्ता गरेर व्यवसायीक रुपमै पशुपालनमा हात हालेको वताउछन् ।
शुभलक्ष्मि पशुपन्छि नामक फर्म दर्ता गरेर उनले पशु व्यवसाय गर्न थालेको पनि ४ वर्ष वितिसकेछ । समय समयमा पशु सेवा कार्यालयवाट उनले प्राविधिक तथा औषधिहरु पाईरहेको बताए । अहिले उनको घरमा ४ वटा दुहुना भैसी ७ वटा व्याउने तथा एउटा राँगो छ ने तीनका ३ वटा पाडापाडि पनि रहेका छन् ।
उनले दैनिक ५० लिटर दुध विक्रि गर्दै आईरहेका छन् । ५० लिटर दुधवाट उनले दैनिक २५ सय रुपैया आम्दानी गरीरहेका छन् भने मासीक रुपमा ३० हजार उनको बचत भैरहेको छ । घर परीवारका सदस्यहरुले नै व्यवसाय सञ्चालन गरीरहेको हरीवहादुर ले बताए । तुलसीपुर उप महानगरपालीकामा जनप्रतिनिधि आएको एक वर्ष पुगेको अवसरमा उनलाई व्यवसायीक रुपमा पशुपालन गरेको भन्दै राष्ट्रपति पशुपालन पुरस्कारवाट सम्मानीत गरीयको छ । सम्मानित भएपछि हरीवहादुरले खुसी व्यक्त गर्दै हामीलाई हेर्ने पनि सरकार रहेछ भन्ने प्रतिकृया दिए । “पुरस्कार त ठुलावडाले मात्रै पाउछन् भनेको त हामीजस्ताले पनि पाउने रहेछौ” हरीवहादुरले भने । काम गर्दै गएपछि सवैको कामको मुल्याङ्कन हुने रहेछ भन्ने लागेको हरीवहादुरले बताए ।
त्यस्तै वाख्रापालन तर्फ उत्कृष्ट काम गर्ने तुलसीपुर उप महानगरपालीका ३ भट्टेको पुष्पाञ्जली खरीवाख्रा पालन महिला समुहलाई पनि पुरस्कृत गरीएको छ । २०६६ सालमा गठन गरीएको बाख्रापालन समुहमा ५० जना सदस्य रहेका छन् भने उनीहरुले ३५० वटा बाख्रा पालन गरीरहेका छन् । समुह गठन गरेर उनीहरुले व्यवसायीक रुपमा पाल्न सुरु गरेपछि पशु सेवा कार्यालयको सहयोगमा नियमित रुपमा भ्याक्सीन लगाउने देखी बहुवर्षिय घाँसको पनि खेती गर्दै आईरहेकाछन् । समुहमा आवद्ध भएर उनीहरुले ८ लाख बरावरको हितकोष समेत सञ्चालन गरीरहेकाछन् । हितकोषलाई उनीहरुले प्रत्येक महिनाको पहिलो सनिवार बैठक बसेर समुहमै लगानी गर्ने गरेको बताउछन् ।
उप महानगरपालीकाले पशुपालन व्यवसायमा उत्कृष्ट काम गरेको भन्दै ५ जनालाई पुरस्कृत गरेको हो । उप महानगरपालीकाले उत्कष्ट कृषक सम्मान कार्यक्रमको आयोजना गरी उनीहरुलाई सम्मान गरेको हो । अन्य सम्मानीत हुनेहरुमा साहारा पशुपालन फर्म तुलसीपुर ६ गोलौरा, भगवती वाख्रा फर्म तुलसीपुर ३ बल्ले र तुलसीपुर उप महानगरपालीका ८ कटकुईयामा रहेको धनमता बंगुर फर्म रहेका छन् । उनीहरुलाई नगर प्रमुख घनश्याम पाण्डेले साढे सात हजार नगद र प्रमाण पत्र प्रदान गरी पुरस्कृत गरेका हुन् । उप महानगरपालीकाले कृषि क्षेत्रमा पनि उत्कृष्ट काम गरेको भन्दै ५ जना विभिन्न विधाका कृषकहरुलाई पनि पुरस्कृत गरेको छ ।