खोज

बुटवल,११ पुस ।   नेकपा एमाले सहितका ७ दलको समर्थनमा नेकपा माओवादी केन्द्रका अध्यक्ष पुष्पकमल दाहाल प्रचण्ड आइतबार प्रधानमन्त्री नियुक्त भएपछि अब कुन नेता कुन मन्त्रालयमा जांदैछन् भन्ने चासो बढेको छ ।

आज सोमबार प्रधानमन्त्रीसहित केही मन्त्रीले सपथग्रहण गर्ने सम्भावना रहेकाले सबैको चासो अर्थमन्त्री को बन्ला भन्नेमा छ । कोरोना महामारीपछि थला परेको अर्थतन्त्र  माओवादी नेता अर्थतन्त्र जनार्दन शर्मा अर्थमन्त्री भएपछि झन् बिग्रेको छ ।

आर्थिक मन्दी, बढ्दो ब्यापार घाटा विदेशी मुद्रा संचितीको चाप जस्ता कारणमा संकटको डिलमा पुगेको अर्थतन्त्रलाई सही ट्रयाकमा ल्याउन अर्थमन्त्रीको निर्णायक भूमिका हुने भएकाले धेरैले एमालेका उपाध्यक्ष विष्णु पौडेल अर्थमन्त्री भए हुन्थ्यो भन्ने चाहना राखेका छन् । यसअघि अर्थमन्त्री हुंदा सफललतापुर्वक मन्त्रालय हांकेर लोकप्रिय बनेका पौडेल एमालेका निर्वाचित सांसद मध्ये अर्थ मन्त्रालय हांक्न सिनियर र उपयुक्त पात्र हुन् ।

एमालेबाट अर्थमन्त्रीका सम्भावित उम्मेदवार सुरेन्द्र पाण्डे चितवनबाट चुनावमा पराजित भएका कारण अहिलेको अवस्थामा अर्थमन्त्रालय सम्हाल्ने व्यक्ति एमालेमा विष्णु पौडेल वाहेक अरु देखिएका छैनन् । यद्यपी पौडेल स्वयं भने सरकारमा जान र अर्थ मन्त्रालयको जिम्मा लिन इच्छुक नभएको आफु निकटसंग बताउने गरेका छन् ।
तर अर्थ मन्त्रालय एमालेको भागमा परेमा पौडेल नै अर्थमन्त्रीका सबैभन्दा उपयुक्त नेता हुन् ।

अर्का उपाध्यक्ष सुवास नेम्वाङ राष्ट्रपति वा सभामुख बन्न चाहन्छन् । उनी अर्थमन्त्री बन्ने संभावना न्युन छ ।

‘अर्थ मन्त्रालयको नेतृत्वको स्वभाविक जिम्मेवारी विष्णु पौडेलले पाउने देखिन्छ,किनभने पौडेल  अर्थमन्त्री बन्दा सफल मन्त्रीका रुपमा लोकप्रिय हुनुभएको थियो’–एमालेका सांसद बासुदेव घिमिरेले भने –‘निजी क्षेत्र तथा अन्तर्राष्ट्रिय समुदायले पत्याएको परिपक्व नेता भएकाले पौडेल नै अर्थमन्त्री बन्दा मात्र संकटग्रस्त अर्थतन्त्रले सफल अवतरण गर्न सक्छ भन्ने धेरैको अपेक्षा र विश्वास छ ।’

उद्योग ब्यापार संगठन रुपन्देहीका पुर्व अध्यक्ष नारायणप्रसाद भण्डारीले विष्णु पौडेलले निजी क्षेत्रका समस्याहरु नजिकबाट बुझेका र समस्या समाधानमा इमान्दार पहल गर्ने नेता भएकाले पौडेल नै अर्थमन्त्री बन्नुपर्ने निजी क्षेत्रको आशा र माग रहेको बताउंछन् ।

पौडेल अर्थमन्त्री बन्दा नै देशको अर्थतन्त्र सुधार हुने भएकाले सिंगो निजी क्षेत्रले उनलाई अर्थमन्त्री बनाउन शीर्ष नेतृत्वलाई सुझाव दिनुपर्ने रुपन्देही उद्योग संघका अध्यक्ष माधव पौडेलको धारणा छ ।