खोज

देवदह,४ पुस । रुपन्देहीको देवदहमा माघको अन्तिम हप्तादेखि सातौँ राष्ट्रिय देवदह औद्योगिक व्यापार मेला कृषि तथा पर्यटन महोत्सव २०७९ हुने भएको छ । उद्योग व्यापर संघको मुख्य आयोजना तथा देवदह नगरपालिकाको सह आयोजनामा देवदह मण्डप घोडाहामा माघ २७ गतेदेखी फागुन १० गतेसम्म महोत्सव आयोजना हुन लागेको आयोजकले सोमबार पत्रकार सम्मेलन आयोजना गरि महोत्सवबारे जानकारी गराएको हो ।

पत्रकार सम्मेलनमा बोल्दै संघका अध्यक्ष तथा मेला आयोजक मूल समितिका संयोजक मेघराज ढकालले देवदहका पर्यटकीय स्थलहरुको प्रचारप्रसार गर्दै राष्ट्रिय अन्तर्राष्ट्रिय क्षेत्रमा देवदहलाई परिचित गराउने तथा देवदह क्षेत्रको ऐतिहासिक, औद्योगिक, कृषि तथा दुग्ध उत्पादन लगायत समग्र पक्षको बिकासका लागि महोत्सव मार्फत अवसर सृजना गर्ने बताए । महोत्सवमा तरकारी, फलफुल, माछा लगायत कृषि उपज, दुग्ध जन्य उत्पादन, बीउ बिजन तथा मलखाद, कृषि औजार तथा यन्त्र, जडिबुटी तथा औषधी, पर्यटन, शैक्षिक संस्था, छाला तथा छाला जन्य सामानहरु प्रदर्शन हुने आयोजकले जनाएको छ ।

संस्थाका संस्थापक अध्यक्ष गोविन्द ठडराईले आफुहरुले सुरुवाती दिनबाटै युवाहरुलाई उद्यमी बनाउने दिशामा महोत्सवलाई केन्द्रित गर्ने प्रयास गरेको बताए।

महोत्सवमा करिब २ सय ५० स्टल रहने तथा देवदह क्षेत्रमा रहेर आफैं कृषि उत्पादन गरेका कृषकहरुलाई निशुल्क स्टल राख्न दिने संस्थाका महासचिव थानेश्वर लम्सालले जानकारी दिए । ५० रुपैयाँ प्रवेश शुल्क रहने महोत्सवमा टिकट बिक्रीको केही अंश पर्यटन प्रवर्द्धनमा लगानी गर्ने उनले बताए ।
महोत्सवमा औद्योगिक एवं पर्यटकीय सूचना केन्द्र, औद्योगिक, कृषि तथा पर्यटकीय गोष्ठी, लोकदोहोरी गीत प्रतियोगिता, विद्यालय नृत्य प्रतियोगिता, राष्ट्रिय तथा स्थानीय कलाकारहारुको प्रस्तुती रहने छ । त्यस्तै फेसन शो, डान्सिङ्ग, कबड्डी, कुस्ती लगायतका प्रतियोगिता हुने आयोजकले जनाएको छ ।

देवदहमा २०७१ सालमा पहिलो पटक महोत्सव आयोजना गरेको उद्योग व्यापार संघको आयोजनामा हुन लागेको यो तेस्रो महोत्सव हो । महोत्सवले देवदह क्षेत्रको कृषि, पर्यटन, उद्योग, व्यापार तथा समग्र पक्षको विकास गर्ने आयोजकको अपेक्षा रहेको छ ।