खोज

नेपाल डेरी एशोसियसनको केन्द्रीय कमिटीले प्रदेश नम्बर ५ की भूमि व्यवस्था कृषि तथा सहकारी मन्त्री आरती पौडेलसँग भेटघाट गरेको छ । पाल्पामा आज (आईतबार) देखि प्रारम्भ केन्द्रीय कमिटिको बैठकमा सहभागी हुन आएको केन्द्रीय कमिटिले मन्त्री पौडेललाई भेटघाट गरी विभिन्न मागको विषयमा जानकारी गराएको छ ।
कार्यक्रममा बोल्दै कृषि मन्त्री पौडेलले नेपाल सरकारले गरेको कृषि प्रधानमन्त्री आधुनिकीकरण परियोजनाले कृषि क्षेत्रलाई मात्रै समेटेको भन्दै अव यसलाई पशु पालन क्षेत्रलाई पनि समेट्नको लागि पहल जारी रहेको बताएकी छिन् । उनले कृषि र पशु क्षेत्रलाई संग संगै लैजानको लागि केन्द्रीय सरकार संग पहल जारी रहेको बताउँदै यसमा सबैको साथको आवश्यक रहेको बताइन् । यस्तै दुधको बजारीकरण र विविधिकरण गर्नुको विकल्प नभएको भन्दै मन्त्री पौडेलले गोठ देखि ओठ सम्म दुधको शुद्धता जरुरी रहेको बताइन् ।
५ नम्बर प्रदेश सरकारले दुधको पाउडर प्लान्ट स्थापना गर्ने सोँच बनाएको भएपनि ठूलो बजेटको कारण त्यसलाई संभावना अहिले नदेखिएको बताईन् । तर प्रदेश सरकारले एक्लै सम्भव नभएपनि पिपिपी मोडल अनुसार अगाडी बढाउन सकिने बताईन् । उनले व्यवसायीहरूको साथ र सहयोग आवश्यक रहेको भन्दै यदि सबैको साथ रहेमा यसलाई पुरा गर्न सकिने धारणा राखिन् ।
डेरी व्यवासयीहरूलाई प्रदेश ५ मा सृजनशील परियोजना ल्याउनको लागि आग्रह गर्दै मन्त्री पौडेले यदि सृजनशिल कार्यक्रम (परियोजना) आएमा प्रदेश सरकार लगानी गर्न ईच्छुक रहेको बताइन् । उनले भनिन्–‘मैले पहिला देखि नै भनेकी छु, प्रदेशको पहिचान हुने गरी जुनसुकै सृजनशिल परियोजना ल्याउनुहोस् यसमा म मन्त्रालयको तर्फ बाट सहयोग गर्न तयार छु ।’
यस पटक प्रदेश सरकारले बधशाला निर्माण लगायतको अवाधारण अगाडि ल्याएको जानकारी दिँदै उनले किसानहरूलाई उत्पादित दुधको विविधिकरण र बजारीकरण गर्न आग्रह गरिन् । यसको लागि प्रदेश सरकारले सहयोग गर्ने भन्दै उनले प्रदेश सरकार किसानहरूको पक्षमा नै रहेको प्रतिबद्धता जनाइन् । कार्यक्रममा नेपाल डेरी एशोसियसनका केन्द्रीय अध्यक्ष राधाकृष्ण सापकोटाले किसानहरूको समस्या समाधानको लागि स्थानिय तहबाट नै पहल जरुरी रहेको बताएका थिए ।
उनले कार्यक्रममा बोल्दै किसानहरूले उत्पादन गरेको दूधको लागत बिस्तारै बढ्दै गएको भन्दै लागत कम गरी दुधको उत्पादन वृद्धिको लागि योजना बनाउनु पर्ने बताए ।
यस्तै कार्यक्रममा निवर्तमान अध्यक्ष सुनित केडियाले सरकारले नीतिगत कुरामा विशेष ध्यान दिनुपर्ने बताएका थिए । भारतबाट सस्तो मूल्यमा आयात गरिएको दुध र दुग्धजन्य पदार्थको कारण समस्या भएको भन्दै नीतिगत रूपमा भन्सारमा भारतबाट आयात गरिने घिउ लगायतका परिकारमा अन्तशुल्क लगाउनु पर्ने बताएका थिए । यस्तै उनले भारतबाट आयात गर्दा अन्डर विलिङ्ग गर्ने प्रक्रियालाई रोक्नु आवश्यक रहेको भन्दै उक्त कार्य रोक्नुपर्ने बताएका थिए ।
यस्तै पूर्व केन्द्रीय अध्यक्ष मेघराज भण्डारीले दुधको प्याकेजिङ्ग गरी दुधको गुणस्तरमा विशेष ध्यान दिनुपर्ने र सरकारबाट गुणस्तरको निरन्तर अनुगमन र मूल्यांकन आवश्यक रहेको बताएका थिए । यस्तै केन्द्र, संघीय सरकारले घाँसमा आधारित पशुपालन र दाना उद्योग स्थापनामा विशेष जोड दिनुपर्ने बताए ।
नेपाल डेरी एशोयिसयनका केन्द्रीय महासचिव प्रल्हाद दाहाले समृद्धि नेपाल बनाउनको लागि उद्योगी र किसानहरूलाई सरकारले प्रोत्साहन दिनुपर्ने बताए । स्वदेशी उद्योगलाई सरकारले विशेष प्राथमिकता दिनुपर्ने भन्दै प्रादेशिक दुग्ध विकास बोर्डमा अनिवार्य डेरी एशोसियसनको पनि सहभागीता गराउनको लागि प्रदेश सरकार संग माग गरे ।
कार्यक्रममा नेपाल डेरी एशोसियसनका केन्द्रीय सचिव विजय चौरासीया, सह सचिव रेशम खड्का, प्रथम उपाध्यक्ष राजन चिमोरिया प्रदेश १ बाट , उपाध्यक्ष कुणबहादुर हमाल प्रदेश ७ बाट, राजन दाहाल प्रदेश ३, प्रदेश ५ का संयोजक कृष्ण प्रसाद भट्टराई (खिम), प्रकाश समन्त प्रदेश ६, नेपाल डेरी एशोसियसनका केन्द्रीय सदस्य मनोज कुमार घिमिरे, कोषाध्यक्ष दयाराम भण्डारी, रामभक्त दाहाल केन्द्रीय सदस्य, सह कोषाध्यक्ष दिप प्रसाद धमाल, केन्द्रीय सदस्य बद्री प्रसाद ढकाल, पवन बास्तोला, डम्बर कुमारी गौतम, शिव भुषाल, ७ नम्बर संयोजक भुपेन्द्र थापा, ४ नम्बर शिवहरी आचार्य, ६ नम्बर प्रेम बहादुर विसी, २ नम्बर राघौ सिंह लगायतले बोलेका थिए ।