खोज

पछिल्लो समय जिल्लाका बिभिन्न नाकाहरूबाट नदीजन्य पदार्थको अबैध उत्खनन् गरि चोरी निकासी गर्ने क्रममा बृद्धि भएको छ । कपिलवस्तु नगरपालिका–९ कुस्मा स्थित हात्तिसार नाकाको टिकुरीघाट बाट बिहीबार राती नदीजन्य पदार्थको चोरी भएको जानकारी पाए पछि स्थानीयले वडा अध्यक्षलाई सो बिषयमा जानकारी गराएका थिए ।
स्थानीयबाट जानकारी पाएका कपिलवस्तु नगरपालिका–९ का वडा अध्यक्ष शिव बहादुर बाग्ले र बाणगंगा नगरपालिका–६ का वडा अध्यक्ष सुकदेब थारुले स्थलगत अनुगमन गर्दा गाउँलेले दिएको सुचना अनुसार नै नदीबाट अबैध रूपमा निकालिएको बालुवा एक स्थानीय बालुवा प्रशोधन उद्योग नजिकै खसालेको भेटिएको थियो । आफूहरूले बिगत धेरै बर्षदेखि नदीमा हुने अबैध उत्खनन् रोक्न क्रियाशिल रहँदै आएकोमा रातभरी ट्याक्टरमा निकालिएको बालुवा जनप्रिय बालुवा प्रशोधन प्रा.लिको डम्पिङ्गस्थल नजिकै फेला परेको कपिलवस्तु नगरपालिका–९ का वडा सदस्य खगेश्वर उपाध्यायले बताए । “रातभरि नदीमा गएर बालुवा निकालेको छ । बालुवा लिएर फर्किएको बाटो त्यहि प्रशोधन उद्योग अघि सम्म छ । त्यसैले प्रशोधन उद्योगको भूमिका शंकास्पद छ,” सदस्य पौडेलले भने । आफूहरू बिहान जाँदा लु ३ त ९१३७ नम्बरको ट्याक्टरबाट बालुवा ओसारेको भेटिएको उनले जनाए । आफूहरूले अनुगमन गर्ने क्रममा केही स्थानीय जनप्रतिनिधिको मिलेमतोमा नदीजन्य पदार्थको चोरी निकासी गर्ने गरेको भेटिएको बाणगंगा ६ का वडा अध्यक्ष सुकदेव थारुले बताए । “यो चोरी निकासीका कारण हामी जनप्रतिनिधिलाई मिलेमतो भन्दै बदनाम गराइएको छ ।
तत्काल यस्ता चोरी निकासी नियन्त्रणमा ल्याउनु पर्छ” उनले भने । आफनो वडामा रहेको बाणगंगा नदीको सो नाकाबाट रातको समयमा चोरीनिकासी बढेको जन गुनासोको आधारमा स्थलगत अनुगमन गर्दा बालुवा प्रशोधन उद्योगको वरिपरि चोरि गरिएको बालुवा भेटिएको कपिलवस्तु नगरपालिका ९ का वडा अध्यक्ष शिव बहादुर बाग्लेले बताए ।
“बालुवा प्रशोधन उद्योगकै अगाडी चोरिएको बालुवा भेटिदा समेत प्रशोधन उद्योगका सञ्चालकले अनभिज्ञता प्रकट गर्नु रहस्यमय छ ।” वडा अध्यक्ष बाग्लेले भने । नदीजन्य पदार्थको चोरी निकासी बढेको बिषयमा आफुहरूले तत्कालै स्थानिय प्रशासन सँग पहल गरि चोरी निकासीलाई नियन्त्रण गर्ने कार्य अगाडी बढाउने कपिलवस्तु नगरपालिकाका नगर प्रमुख किरण सिंहले बताए ।