खोज

जिल्ला सदरमुकाम तौलिहवा स्थित जिल्ला अस्पतालको सेवामा गुणस्तरीयता कायम गर्न जिल्लाका सरोकारवाला निकायका प्रमुखले निर्देशन दिएका छन् । अस्पतालले प्रवाह गर्ने सेवा बारे पटक–पटकको जनगुनासो पछि सर्वपक्षिय छलफलमा सो निर्देशन दिइएको छ । छलफलमा बोल्दै प्रमुख जिल्ला अधिकारी अर्जुन प्रसाद पोख्रेलले अस्पतालका सेवा नियमितता र सरसफाईका दुई मुद्दा तत्कालै समाधानमा पहल गर्न मेसु डाक्टर किशोर बन्जाडेलाई निर्देशन दिए । जिल्ला अस्पतालको सेवा तोकिएको मापदण्ड अनुसार नभएको स्पष्ट पार्दै सेवा बिस्तार भन्दा पनि जनशक्तिको उपलब्धता अनुसारको गुणस्तरीय सेवा प्रदान गर्न उनले सुझाव दिए । अस्पतालमा उपलब्ध औषधीको विवरण सार्वजनिक गर्न, सरसफाईमा ध्यान दिन, स्वास्थ्य बीमाको कार्यक्रम तत्कालै कार्यान्वयन गर्न निर्देशन दिँदै सोका लागि आवश्यक पर्ने दरबन्दी व्यवस्थापन लगायतका कार्यका लागि योजना बनाउन उनले सुझाव दिए । छलफलमा अस्पतालको अवस्था बारे जानकारी दिँदै डाक्टर बन्जाडेले नयाँ भौतिक संरचना समयमै नबन्दा अस्पताल व्यवस्थापनमा समस्या आएको, पर्याप्त दरबन्दी नरहेको, औषधीहरूको उपलब्धता नभएको लगायतका समस्याहरू सुनाएका थिए । अस्पतालको सेवालाई गुणस्तरीय बनाउन आफू नेतृत्वको अस्पताल व्यवस्थापन समिति तत्पर रहने जिल्ला समन्वय समितिका प्रमुख नारायण खनालले बताए ।
जिल्ला समन्वय समितिलाई व्यवस्थापनको जिम्मा दिए पनि बजेटको व्यवस्थापन अन्यत्र हुँदा सामन्जस्यता मिलाउन आवश्यक रहेको उनको सुझाव थियो ।
अस्पतालमा नगरपालिका तर्फ बाट उपलब्ध गराउनु पर्ने औषधी र सामाग्री आफूहरूले उपलब्ध गराए पनि नेपाल सरकारबाट उपलब्ध हुने औषधी उपलब्ध नहुँदा नगरपालिकालाई दोष दिने कार्य जायज नभएको कपिलवस्तु नगरपालिकाका नगर प्रमुख किरण सिंहले गुनासो गरे । योजना निर्माण गरि व्यवस्थापन समितिको निर्णय पश्चात माग गरिए आफूहरूले अस्पतालका लागी आवश्यक पर्ने बजेट खर्चका लागी आवश्यक सहयोग गर्न सक्ने नगर प्रमुख सिंह र प्रमुख प्रशासकिय अधिकृत बिमलराज आचार्यले बताए ।
यसअघि कपिलवस्तु नगरपालिका १ चौक बजारका युवाहरूले मंगलबार साँझ उपचारका लागी गएका स्थानीयलाई उपचारमा खटिएका अस्पताल कर्मचारीले दुव्र्यवहार गरेको भन्दै जिल्ला प्रशासनको मुल गेटमा पुगी अस्पताल प्रशासन बिरुद्ध नाराबाजी गरेका थिए । जिल्ला समन्वय समितीका सदस्य अनुप पाण्डेयको नेतृत्वमा बुधबार स्थानियले जिल्ला प्रशासन कार्यालय, जिल्ला समन्वय समिती र कपिलवस्तु नगरपालिकामा डेलिगेशन गई ज्ञापनपत्र बुझाएका थिए । ज्ञापनपत्रमा अस्पतालमा बिरामी र बिरामीका आफन्तलाई गरिने दुव्र्यवहार रोक्नु पर्ने, अस्पतालका सेवा प्रभावकारी बनाउनु पर्ने, औषधीको सहज उपलब्धतासँगै औषधी बारे नागरिकलाई जानकारी दिनुपर्ने र स्वास्थ्यकर्मीहरूले तोकिएको समयमा सेवा प्रवाह गरे नगरेको बारे नियमित अनुगमन र कारबाही गर्नुपर्ने माग राखिएको छ ।