खोज

डम्मर बुढा मगर
बागलुङ नगरपालिका–८ सिगानमा व्यवसायिक चिया खेती शुरु गरिएको छ । भर्खर मात्र बागलुङ जिल्लामा भित्रिएको चिया व्यवसाय सिगानाले अवलम्बन गरेको छ । बागलुङ नगरपालिकालाई कृषिबाटै सम्मृद्ध बनाउने लक्ष्यका साथ बागलुङ नगरपालिका–८ सिगानाले वडाको तल्लो भू–भागमा सुन्तला तथा माथिल्लो भागमा चिया खेती विस्तार गर्न थालिरहेको छ । बागलुङ नगरपालिकाको ढुवानी तथा विरुवामा ५० प्रतिशत अनुदानमा चिया खेती विस्तार गर्न थालिएको हो वडा अध्यक्ष राजन जि.सीले बताए । हाल सिगानाको बौडैचौर साइडको १२ रोपनी क्षेत्रफलमा ९ हजार ४ सय चियाका विरुवा लगाइएको छ । अहिले पाइलट प्रोजेक्टको रूपमा लगाईएको यो चिया खेतीलाई व्यवस्थित रूपमा विस्तार गरी आगामी वर्ष एक लाख चियाका विरुवा लगाउने लक्ष्य लिएको अध्यक्ष जि.सीको भनाइ छ ।
केहि समय अगाडि लुम्ले कृषि अनुसन्धान केन्द्रका प्राबिधिकहरूको टोलीले बागलुङ नगरपालिकाकोे ११ सयदेखि १४ सय मिटरसम्मको भागमा सुन्तला तथा १६ सय ५० देखि २२ सय मिटरको उचाईमा चिया खेती लगाउन सुझाव दिएपछि काम थालिएको नगरपालिकाका आर्थिक विकास समितिका संयोजक जीवन आचार्यले बताए । कृषकले लगाएको चिया तथा सुन्तलाको विरुवाले चार वर्ष पछि उत्पादन दिन थाल्ने हुनाले उत्पादन नदिँदा कृषकले गुमाउनु परेको खेतीपातीको उब्जनी मूल्यांकन गरी ५० प्रतिशत रकम नगरपालिकाले उपलब्ध गराउने तथा ५० प्रतिशत कृषकले बेहोर्ने गरी काम थालिएको बागलुङ नगरपालिकाले बताएको छ । आगामी वर्षदेखि नगरपालिकाले अन्य वडाहरूमा पनि चिया खेती विस्तार गर्ने उद्देश्य लिएको छ ।à