खोज

बुटवल,१८ मंसिर ।  सजिलो बचत तथा ऋण सहकारी संस्था लि. बुटवलको अध्यक्षमा पुन: रामराज पोख्रेल चयन भएका छन् । संस्थाको शनिबार बुटवलमा सम्पन्न १४ औं साधारण सभा तथा छैठौं अधिवेशनले पुन: पोख्रेलको अध्यक्षतामा सर्वसम्मत नयाँ कार्यसमिति चयन गरेको हो ।

समितिको उपाध्यक्षमा भिमलाल गौतम, सचिवमा गुणानिधी खनाल, कोषाध्यक्षमा विष्णुप्रसाद पन्त सहित सदस्यहरु सर्वसम्मत चयन गरिएको छ । त्यस्तै लेखा समितिको संयोजकमा विनसलाल श्रेष्ठ र सदस्यहरुमा सितु उदय र गोविन्द गिरीलाई चयन गरिएको छ ।

कार्यक्रममा शुभकामना व्यक्त गर्दै बुटवल उपमहानगरपालिका वडा नं ९ का वडा अध्यक्ष प्रदिपकुमार श्रेष्ठले सरकारको तीन खम्बे अर्थनीति अनुसार सहकारीलाई एउटा बलियो खम्बाको रुपमा स्थापित हुन सुझाव दिए। उनले सहकारीहरुले वचत गर्ने बानीको विकास र आवश्यक पर्दा कर्जा उपलब्ध गराएर समुदायमा अर्थपूर्ण काम गरेको बताउँदै सहकारीहरुलाई सही मार्गमा अगाडि बढाउन तिनै तहका सरकारको ध्यान जानुपर्ने बताए ।

साधारण सभामा वार्षिक प्रतिवदेन प्रस्तुत गर्दै अध्यक्ष रामराज पोख्रेलले सहकारीले आर्थिक अनुशासनलाई कायम गरेर अघि बढेकाले राम्रो प्रतिफल प्राप्त भएको र खराव कर्जा नरहेको जानकारी गराए ।

सहकारीका सचिव गुणानिधि खनालको सञ्चालनमा भएको कार्यक्रममा सल्लाहकार गोविन्द मरासिनी, चार्टड एकाउन्टेन छवि पोखरेल, बुटवल बहुउद्देश्यीय सहकारी संस्थाका सचिव बुद्धिमान थापा, प्रौढ सहकारीका अध्यक्ष तिलकराम पौडेल, राष्ट्रिय सहकारी बैंक बुटवलका प्रवन्धक नारायण वेलवासे, संस्थाका उपाध्यक्ष विश्वबन्दु विनयी लगायतले शुभकामना व्यक्त गरेका थिए ।