खोज

गुल्मीको सदरमुकाम स्थित उपल्लो तम्घास माध्यमिक विद्यालयमा शैक्षिक तथा धार्मिक महोत्सव संचालन गरिएको छ । विद्यालयमा कृषि व्यवसायिक शिक्षा तथा सुबिधा सम्पन्न विद्यालय बनाउने उद्देश्यले उक्त शैक्षिक तथा धार्मिक महोत्सवको आयोजना गरिएको महोत्सव प्रचार प्रसार समितिका संयोजक मोहन प्रसाद पाण्डेले बताएका छन् ।
यही भदौ ३० गतेदेखि असोज ६ गतेसम्म संचालन हुन लागि रहेको महोत्सवमा भागवत सप्ताह ज्ञान महायज्ञ,सहस्र शालीग्राम पुजा अर्चना, विराट धनधान्य महापर्व, राष्ट्रिय कलाकारहरूवाटभजन किर्तन, ११ सय धनवृद्धि महालक्ष्मी यन्त्र र शान्ति कलश पुजन गरिनुका साथै योग विज्ञान शिविर समेत सञ्चालन गरिने महोत्सव मूल समारोह समितिले जनाएको छ ।
‘गुल्मी रेसुंगा उपल्लो तम्घास शैक्षिक तथा धार्मिक महोत्सव–२०७५’ मूल समारोह समितिद्वारा विद्यालयको सहयोगार्थ पहिलो पटक आयोजना गरिएको शैक्षिक महोत्सवमा मानिसहरूको व्यापक उत्साहजनक सहभागिता रहेको विद्यालय व्यवस्थापन समितिका अध्यक्ष गुणानिधि शर्मा मरासिनीले बताए ।
सदरमुकाम तम्घासमा रहेर पनि बर्षौदेखि वत्ति मुनिको अध्यारो जस्तै बनेर रहेको उक्त विद्यालयमा फरक क्षमता भएका विद्यार्थीहरूले पनि अध्यन गर्दै आईरहेका छन् । विद्यालयको शैक्षीक एवं व्यवसायीक शिक्षाको विकासका लागि सरकारको मात्र मुखताकेर बस्नु भन्दा पनि स्थानीय समुदायवाट पनि केही गर्नुपर्छ भन्ने सामाजिक भावना अनुरूप विद्यालय व्यवस्थापन समितिले उक्त महोत्सवको आयोजना गर्ने निधो गरेको हो ।
शैक्षीक तथा धार्मिक महोत्सवको प्रमुख वाचकको रूपमा भागवत मधुकर पण्डीत पुरुषोत्तम शास्त्री र शैक्षीक अधियान्ता एवं संकल्पकर्ताको रूपमा ईश्वर शरण महाराज रहेका छन् । महोत्सवमा दुई करोड ५० लाख भन्दा बढी रूपैयाँ संकलन गर्ने लक्ष्य लिएको आयोजकहरूले अपेक्षा गरेका छन् ।
आयोजकले शैक्षिक महोत्सवमा सहयोग गर्ने दानविरहरूवाट भिरालो जग्गा र उधारो रकम सहयोग नलिने समेत निर्णय गरेको उक्त विद्यालयका प्रधानाध्यापक राममणी पन्थीले बताए। प्रदेश सभा सदश्य एवं विषेशाधिकार समितिका सभापति कमलराज श्रेष्ठद्वारा उद्घाटन गरिएको सो महोत्सवको दोश्रो दिनसम्म विभिन्न दानविरहरूवाट गरि २३ लाख रूपैयाँ बराबरको सहयोग रकम संकलन भैसकेको प्रचार समिति संयोजक पाण्डेले बताए ।