खोज

रोल्पाका सामुुदायिक विद्यालयहरू प्रविधिमैत्री हुन थालेका छन् । पछिल्ला प्रविधिको उपयोग गर्दै विद्यालयको शिक्षण सिकाइलाई उपलब्धिमुलक बनाउन भन्दै यस्ता प्रविधिको प्रयोग हुन थालेको हो । जिल्ला सदरमुकाममा रहेको बालकल्याण नमूना माविले डिजिटल हाजिरीको सुरुवात गरेको छ । आइतबार देखि आरम्भ गरिएको डिजिटल हाजिरीबाट शिक्षक कर्मचारीलाई विद्यालयमा नियमित उपस्थितिका लागि सहयोग पुग्ने विद्यालयले अपेक्षा गरेको छ । शिक्षक समयमै उपस्थित हुने, पुरा समय अध्यापन गर्ने कार्य गरे शैक्षिक सुधारका धेरै सुचक पुरा हुन्छन् विद्यालयका प्राचार्य मधुसुदन पोख्रेलले भने । शिक्षकको दैनिक उपस्थितिलाई नियमित गर्न डिजिटल हाजिरी तथा कक्षा अनुगमनका लागि सिसी क्यामेराको व्यवस्था गरेका छाँै प्राचार्य पोख्रेलले भने । शिक्षकको नियमितता हुने बित्तिकै विद्यालयको पठनपाठनमा धेरै सुधार हुन्छ पोख्रेलले भने । सो विद्यालयले मल्टी मिडियाको प्रयोगबाट उपल्ला कक्षाहरू पढाउने कार्यको थालनी गरेको बताइएको छ । हाल कम्प्युटर कक्षा मल्टीमिडिया प्रयोग गरेर पढाउन सुरु गरेका छौँ कम्प्युटर शिक्षक भुवन श्रेष्ठले भने । आगामी दिनमा अन्य विषयलाई समेत मल्टीमिडियाबाट अध्यापन गराउने सोंचमा छौँ श्रेष्ठले भने ।
जिल्लाका अन्य सामुदायिक विद्यालयहरूले पनि प्रविधिलाई जोड दिन थालेका छन् । रोल्पा नगरपालिका ७ को मावि कोटगाउँले समेत कक्षा अनुगमनका लागि सिसी क्यामेरा जडान गरेको बताएको छ । माथिल्ला कक्षाहरूमा सिसी क्यामेरा जडान गरेर दैनिक कक्षा अनुगमन गरेको विद्यालयले बताएको छ । सुनिल स्मृति गाउँपालिका ४ नम्बर वडा कार्यालयले वडा भित्रका सबै विद्यालयलाई प्रविधिमैत्री बनाउन पहल थालेको वडाध्यक्ष गंज क्षेत्रीले जानकारी दिए । वडा भित्र रहेका ३ वटै सामुदायिक विद्यालयमा डिजिटल हाजिरीको व्यवस्था गर्न लागिएको अध्यक्ष क्षेत्रीले जानकारी दिए । विद्यालयमा शिक्षकहरू १० बजे अगावै आउनु पर्नेमा त्यसो नदेखिएकाले डिजिटल हाजिरी पछि शिक्षकको उपस्थितिलाई नियमितता गर्न सघाउ पुग्ने अपेक्षा गरेका छौँ अध्यक्ष क्षेत्रीले भने ।
प्रशस्त मात्रामा आन्तरिक श्रोत भएका विद्यालयहरू प्रविधिमैत्री हुन थाले पनि जिल्लाका अधिकांश विद्यालयलाई भने शिक्षक व्यवस्थापनमै हम्मे हम्मे परेको बताइन्छ । समुदायबाट चन्दा उठाएर शिक्षकको तलब व्यवस्थापन गर्नुपर्ने अवस्था रहेका त्यस्ता विद्यालयका लागि आधुनिक प्रविधिको प्रयोग आकाशको फल झै भएको छ । राजनैतिक पहुँचका आधारमा भनसुन गरि श्रोत लिन सफल केही विद्यालय तथा स्थानीय सरकारले समेत सहयोग गरेका बाहेक जिल्लामा ठूलो संख्याका विद्यालयहरू आवश्यक शिक्षक, भौतिक पूर्वाधार व्यवस्थापनमै रुमल्लिनु परेको शिक्षा क्षेत्रका जानकारहरू बताउँछन् ।