खोज

दाङका कुमाल समुदायले प्रबिधिको प्रयोग गरि माटाका भाँडा बनाउन शुरु गरेका छन् । लामो समयदेखि हातले भाँडा बनाउन थालेका कुमाल समुदायले पछिल्लो समय मेसिनबाट भाँडा बनाउन पाउँदा खुसी पनि भएका छन् । अहिले माटोका भाँडा निर्माणका लागि माटो घोल्ने मेसिन, माटो पेल्ने मेसिन, माटोलाई धुलो बनाउने मेसिन, सामान पोल्ने मेसिन जडान भएको छ । पहिले हातले माटाका भाँडा बनाउँदा फुटेर खेर जाने समस्या थियो, अब त्यो समस्याको अन्त्य हुने कुमाल अगुवा प्रेमबहादुर कुमालले बताए । उक्त मेसिन बिद्युतबाट चल्ने भएकाले पहिले जस्तो भट्टी बनाएर माटोका भाँडा बनाउने चलनको अन्त्य भएको कुमालले बताए ।
मेसिन जडान भएपछि भाँडा बनाउन पनि धेरै समय नलाग्ने तथा पहिलाजस्तो दुःख पनि नहुने उनले बताए । पहिले माटाका भाँडा निर्माण गर्न तीन दिन लाग्ने गरेको भन्दै मेसिन जडान गरेपछि एक दिनमा भाँडा निर्माण हुने उनको भनाइ थियो । अब सबै काम बिद्युतबाट हुने भएकाले पहिले जस्तो जोखिम पनि नहुने उनको भनाइ छ ।
बिभिन्न संघसंस्थाको सहयोगमा करिब ६ लाख बराबरको सहयोगमा उक्त मेसिन ल्याइएको उनले बताए । साझा सुबिधा केन्द्र सञ्चालन गरेर माटाका भाँडा निर्माण गर्दै आएका कुमाल समुदायले प्रबिधि जडान गरेसँगै आम्दानी पनि बढ्ने अपेक्षा गरेका छन् । समूहका अध्यक्ष समेत रहेका कुमालले भने ‘पहिले हातले बनाउँदै आएका भाँडाहरू अब मेसिनले निर्माण गर्दैछौं, अब पहिले भन्दा आम्दानी बढ्ने अपेक्षा गरेका छौं ।’ हातले माटाका भाँडा निर्माण गर्दा करिब २५ हजारदेखि ५० हजारसम्म आम्दानी गर्दै आएको भन्दै अब करिब मासिक एक लाखसम्म आम्दानी गर्न सकिने उनले बताए ।
उक्त सामग्री गरिबी निवारण कोषले उपलब्ध गराएको कुमालले बताए । उनका अनुसार कोषले तथ्याङ्क राख्नका लागि कम्प्युटर र प्रिन्टर पनि उपलब्ध गराएको छ । à