खोज

अन्य विश्व विद्यालयहरूले उपलब्ध गराएको भन्दा गुणस्तरिय शिक्षा अब बिद्यार्थीलाई त्रिभुवन विश्वविद्यालयले उपलब्ध गराउने भएको छ । भैरहवा बहुमुखी क्याम्पसमा बिभिन्न ब्यवसायिक तथा प्राविधिक बिषयमा स्नातक तहमा भर्ना खुलेको जानकारी गराएको छ . विश्वबजारमा प्रतिस्पर्धी र जिल्ला बाहिर उपलब्ध गुणस्तरीय शिक्षण भैरहवा बहुमुखी क्याम्पसमा उपलब्ध भएको क्याम्पसले दाबी गरेको छ । क्याम्पसले विद्यार्थीले आफ्नो चाहना अनुसार रोजाईका विषयहरू पनि यही पढ्न पाउने जनाएको छ । बुधबार भैरहवामा पत्रकार सम्मेलन गरी क्याम्पसले यहाँ सञ्चालित कार्यक्रमबाट उत्पादित शैक्षिक जनशक्ति उत्कृष्ट प्रतिस्पर्धीको रूपमा स्थानीय, राष्ट्रिय तथा अन्तर्राष्ट्रिय बजारको माग अनुसार उत्पादन हुने भएकाले पढाइका लागि बहुमुखीलाई नै रोज्न आग्रह गरेको हो ।
भैरहवा बहुमुखी क्याम्पसका सहायक क्याम्पस प्रमुख ईन्द्र बहादुर थापाले बहुमुखीमा उपलब्ध शैक्षिक विषयहरूका बारे समाजमा अझै राम्रोसँग सूचना प्रवाह हुन नसक्दा विद्यार्थीहरू बाहिर पढ्न जाने गरेको बताए । ‘स्थानीय ठाउँ विश्वबजारमा प्रतिस्पर्धी विषयहरू सस्तो र सर्वसुलभ रूपमा पढाइ हुन्छ, तर जानकारी नहुँदा अभिभावकले आफ्ना छोराछोरी टाढाटाढा पठाउने गरेका छन्’, उनले भने– ‘रोजाइका विषयहरू अध्ययन गर्ने अवसर स्थानीय तहमै प्राप्त छ, रोजाईका शिक्षाका लागि अभिभावक तथा विद्यार्थीहरूले घर छोड्नु पर्ने तथा बढी आर्थिक लगानी गर्नु पर्ने पुरातन बाध्यता समेत समाप्त भएको छ, यसलाई सबैले बुझ्न जरुरी छ ।’ बहुमुखीमा बि.बि.एम., बि.बि.ए., बि.आइ.एम. बि.सी.ए., बि.एस्सी पढाई हुन्छ । यस्तै विविएस, एमविएस, बि.एड., बि.ए.लगायतका स्नातकोत्तरसम्म पढाइ हुन्छ । राजधानी लगायतका स्थानमा पढाइ हुने यी विषयहरू भैरहवा बहुमुखीमा पढाइ हुने भए पनि प्रचारप्रसार नहुँदा अझै पनि कयौं विद्यार्थी जिल्ला बाहिर जाने गरेको सहायक क्याम्पस प्रमुख थापाले बताए ।
समयको गति र माग बमोजिम त्रिभुवन विश्वविद्यालयले नयाँ नयाँ शैक्षिक कार्यक्रमहरूको अनुमति दिने नीति अख्तियार गरेपछि स्थानीय आवश्यकता र माग बमोजिम विकेन्द्रिकरणको नीति अन्तर्गत रही एम.बि.एस., बि.एड., बि.एस्सी, एम.ए.नेपाली, एम.ए.समाजशास्त्र र एम.एड. अंग्रेजी, नेपाली, स्वास्थ्य तथा शारीरिक शिक्षा, पाठ्यक्रम तथा मूल्यांकनका विषयगत विधाहरूका कार्यक्रमहरू सञ्चालन गर्न शुरुवात गरेको क्याम्पसले नियमित कार्यक्रम अन्तर्गत बि.ए., बि.बि.एस. सञ्चालन गरिरहेको छ भने अन्य शैक्षिक कार्यक्रमहरू (बि.एड., बि.एस्सी., एम.बि.एस.) आन्तरिक स्रोतमा व्यवस्थापन हुने गरी त्रि.वि.संग अनुमित लिइ सञ्चालन गरेकोे छ ।
वि.सं. २०७० सालदेखि व्यवस्थापन संकाय अन्तर्गत आधुनिक र अन्तर्राष्ट्रिय मान्यता प्राप्त ४ वर्षे सेमेष्टर प्रणाली अन्तर्गतको बि.बि.एम. शैक्षिक कार्यक्रम र वि.सं. २०७४ सालदेखि सोही प्रणाली अन्तर्गतको बि.बि.ए. जस्ता शैक्षिक कार्यक्रम सञ्चालन गरिरहेको क्याम्पसले यसै शैक्षिक सत्रदेखि आन्तरिक स्रोतबाट व्यवस्थापन संकाय अन्तर्गत चार वर्षे सेमेष्टर प्रणालीको बि.आइ.एम., मानविकी संकायमा चार वर्षे सेमेष्टर प्रणालीकै बि.सी.ए. शैक्षिक कार्यक्रमको त्रि.वि. बाट अनुमति प्राप्त गरी सिएमएटीका लागि आवेदन माग समेत गरेको छ ।