खोज

महिला उद्यमीहरूले उद्योग व्यवसायका क्षेत्रमा महिला सहभागिता बढाउन महिलालाई बिशेष छुटसहित लगानी र बजारको वातावरण बनाउन सरकारसँग आग्रह गरेका छन् ।नेपाल घरेलु तथा साना उद्योग महासंघ प्रदेश नम्वर ५ महिला उद्यमी समितिको शनिवार बुटवलमा भएको भेलामा बोल्ने महिला उद्यमीहरूले औद्योगिक क्षेत्रमा महिलाका लागि बिशेष व्यवस्था हुन नसक्दा महिला सहभागिता न्युन भएको उल्लेख गर्दै महिलालाई लगानी, बजार तथा तालिम गोष्ठिको बिशेष व्यवस्था गर्न तिन वटै तहका सरकारसंग आग्रह गरेका हुन ।
कार्यक्रममा बोल्दै समितिका प्रदेश अध्यक्ष शान्ति शर्माले बित्तिय पहुचको अभाव, बजार, प्रचार प्रसारको अभाव, नयाँ पुस्तामा प्रबिधि हस्तान्तरण हुन नसक्दा उद्योगमा लागेका महिलाहरूले समेत लाभ लिन नसकेको बताइन ।
उनले गुणस्तरीयता र क्षमता बिस्तार, व्यवसायिक योजना, पहुँच प्रबिधिको प्रयोगका लागि सरकारले उद्यमी बिकास प्रवद्र्धन कार्यक्रम, सीप उद्यमसिलता बिकास, उद्योग व्यवस्थापन तालिम, औद्योगिक कर्जाको पहुच र सरलीकरण, कच्चापदार्थको उपलब्धता आदी क्षेत्रमा महिलालाई सहयोग आवश्यक भएको बताइन ।
महासंघकी केन्द्रिय सदस्य ज्ञानु पौडेलले सरकारले सामान्य सहुलियतका कार्यक्रमहरू ल्याएपनि व्यापक प्रचार प्रसारको अभावमा महिला उद्यमीहरूले लाभ लिन नसकेको बताइन । उनले मुलुकको समृद्धि र बिकासका लागि ३ वटै तहका सरकारले महिला उद्यमसिलका बिशेष कार्यक्रम सञ्चालन गर्नुपर्ने बताइन ।
कार्यक्रममा बोल्दै बुटवल उपमहानगरपालिकाकी उपप्रमुख गोमादेबि आचार्यले घरगृहस्थीमा बस्ने महिलालाई उद्योग व्यवसायमा सहभागि गराउनु चुनौतिपुर्ण रहेपनि उपमहानगरपालिकाले महिलाका समस्याको पहिचान गर्दै अघि बढन महिला उद्यमी सम्वन्धी कार्यक्रमका लागि बजेट व्यवस्था गरेको बताइन । प्रदेश योजना आयोगका उपाध्यक्ष डा. प्रकाश श्रेष्ठले प्रदेश नम्वर ५ मा ५२ प्रतिशत महिला र ४८ प्रतिशत पुरुष भएकाले यस प्रदेशको समृद्धि र बिकासका लागि महिलाको आर्थिक स्थितिमा सुधार आउनु पर्ने बताए । उनले भने तिलबाट तेल निकाल्न पनि उद्यम चाहिन्छ बिना उद्यम केही प्रगति हुँदैन त्यसैले आवधिक योजना बनाउँदा महिलालाई बिशेष प्राथमिकता दिने बताए ।
प्रदेशका उद्योग, पर्यटन वन तथा वातावरण मन्त्रि लिला गिरीले पुरुषले भन्दा महिलाले धेरै काम गर्दा पनि महिलाले आर्थिक हैसियत नहुदा परनिर्भर हुनु परेकाले परनिर्भरताको मानसिकता त्याग्न आग्रह गरे । उनले भने सानोमा वुवासंग त्यसपछी श्रीमानसंग र छोरा हुर्किएपछि छोरासंग पैसा माग्ने मानसिकता अब राख्नु हँुदैन जस्तो भएपनि उद्यम गर्छू र आफनो खर्च चलाउँछु भन्ने मान्यता राख्नु पर्छ ।
उनले प्रदेश सरकारले महिला उद्यमीका लागि सीप बिकासका पर्याप्त कार्यक्रम सञ्चालन गर्ने प्रतिवद्धता जनाए ।