खोज

पाँचदलीय गठबन्धन सरकारले सुशासन, विकास र सम्मृद्धिको नारा चलाएको एक बर्ष भएको छ । प्रधानमन्त्री प्रचण्डले हरेक कार्यक्रममा भ्रष्टाचार नियन्त्रणमा सरकार एक कदम अघि बढेको र जनताले सुशासन र सम्मृद्धि प्राप्त गरेको दावी गर्दै आएका छन तर सरकार कछुवा तालमा अघि बढेको उसको विकास खर्चले छर्लङ्ग देखाएको छ । चालू आर्थिक बर्षको ५ महिनामा पुँजीगत खर्च १० प्रतिशत छ । यो भन्दा बिजोग के हुन सक्छ ? यही तालले देशमा सम्मृद्धि आउला ? विकास बजेट नै खर्च नहुँदा चलायमान हुनुपर्ने आर्थिक गतिविधि अहिले शून्य छ । देश आर्थिक मन्दीको आहालमा छ । युवाहरू विदेश पलायन भैरहेका छन । नेपालमै उनीहरूलाई रोक्ने योजना सरकारसंग छैन । गठबन्धनलाई जनताले शान्ति, स्थीरता र विकासका लागि भन्दै मत दिएका थिए तर अहिले सरकार भुमरीमा फसेको छ । सरकार आफैले गरेको बाचा विर्सिएको छ । सरकार केवल सत्ता कसरी जोगाउने भन्ने खेलमा लागेको छ । सरकारको नेतृत्व गरिरहेका प्रधानमन्त्री प्रचण्ड जनताको लागि भन्दा पनि आफ्नो कुर्सी जोगाउन सकृय छन । चुनावका बेला जनतासंग गरेको बाचा विर्सिएका छन । यो अवस्था आउनुमा हाम्रो राजनीतिसँग सत्य र निष्ठाको तागत बाँकी रहेन भन्ने प्रमाण काफी छ । नेताहरूमा जिम्मेवारीबोध देखिएन । राजनीति अनेकौँ भ्रमहरूको खेतीपातीमा फस्यो । नेताहरू सधैँ कुर्सीको लागि लड्नु नेपाली राजनीतिको साझा चरित्र भएको छ ।

सरकारको खोक्रो आश्वासन र नारामा अव नेपाली जनता दिग्भ्रमित हुने अवस्था छैन । नेपाली मध्यम वर्गले शक्ति र सम्पत्ति नेताहरूको कमजोरी हो भन्न थालेको छ । तीव्र विकास चाहनेहरू राजनीतिको गति, सिर्जनशीलता र शुद्धतामाथि शंका गर्न थालेका छन । युवा वर्ग पछिल्लो राजनीतिसँग विश्वस्त छैन । कुरा मात्र गर्ने राजनीति अव युवाहरूले मन पार्नै छाडेका छन । सामाजिक न्यायको अपेक्षा गर्नेहरूलाई लाग्छ, यो विषयमा हाम्रा नेताहरू संवेदनशील छैनन् । नेपालको राजनीतिप्रति जनतामा अविश्वास बढ्दै गएको छ । वास्तवमा जनता र नेता नै विकासका सहयात्री हुन् तर दुर्भाग्य सहयात्रीबीच जब आशंका रहन्छन्, यात्रा सुखद हुँदैन । देशको विकास गर्नुपर्नेमा जनप्रतिनिधीहरू बिलासितामा केन्द्रित भैरहेका छन । यी र यस्तैगरी विसंगति फैलिदैछ । जनतामा निरासा बढ्दै गएको छ । हरेक बेथितिका पछाडि साना–ठूला नेताको आडभरोसा छ । चुनावका वाचाहरू वास्तवमा भ्रममात्र थिए भन्ने कुरा अहिले छर्लङ्ग भएको छ । प्रधानमन्त्री र मन्त्रीहरूको काम प्रभावकारी हुनुपर्नेमा त्यसो नभैरहेको गुनासो बढ्दो छ । यसतर्फ सरकारको ध्यान कहिले जान्छ ? मुलुकमा वास्तविक सुशासन र सम्मृद्धि कहिले आउँछ ? सरकारप्रति जनताको विश्वास टुटिसकेको अवस्था अहिलेसम्म भैसकेको छैन तर त्यो अवस्था नआओस् भन्नेतर्फ सरकार गंभीर हुनु जरुरी छ । अझैपनि समय छ– गठबन्धन सरकारले नारामात्रै होइन, काम गरेर देखाओस् । सुशासन र सम्मृद्धिको नारा जनताका लागि केवल सपना मात्रै नहोस् ।