खोज

बुटवल, ५ बैशाख । बुटवलमा जारी यू–१४ टि ट्वान्टी क्रिकेट प्रतियोगितामा देवदह क्रिकेट युनिट र आयोजक वेष्ट्रन क्रिकेट क्लब विजयी भएका छन । बुटवल उपमहानगरपालिकाको आर्थिक सहयोग तथा वेष्ट्रन क्रिकेट क्लब बुटवलको आयोजना शुक्रबार भएको पहिलो खेलमा देवदहले लुम्बिनी वल्र्ड स्कुललाई १२१ रन तथा दोस्रो खेलमा वेष्ट्रनले गार्गी एकेडेमीलाई ८ बिकेटको विशाल अन्तरले पराजित गरेको हो ।

नरैनापुर क्रिकेट मैदानमा टस जितेर पहिलो खेलमा देवदहले ब्याटिङ रोज्दै निर्धारित २० ओभरमा ८ बिकेट गुमाएर १६७ रनको विशाल लक्ष्य खडा गरेको थियो । देवदहका रोहन कुवरले ३५ बलमा ४४ तथा सुसान्त बिकले १६ बलमा ३० रनको योगदान दिए । लुम्बिनीका संस्कार पाठकले ३ बिकेट लिए । बिशाल लक्ष्य पछ्याएको लुम्बिनी १६.१ ओभरमा केवल ४६ रनमा समेटियो । लुम्बिनीका अजितेश गुप्ताले ३२ बलमा १३ रनबाहेक अन्य ब्याट्सम्यानले दोहोरो रन जोड्न सकेनन । कम स्कोरमा रोक्न देवदहका रोहन कुवर, सक्षम बश्याल र राजन काफलेले समान २–२ बिकेट लिए । खेलमा देवदहका रोहन कुवर प्लेयर अफ दी म्याचबाट पुरस्कृत भए ।

यसैगरि दोस्रो खेलमा टस जितेर ब्याटिङ रोज्दै गार्गीले १४.१ ओभरमा सबै बिकेट गुमाएर केवल ३८ रनको लक्ष्य खडा गरेको थियो । कम स्कोरमा रोक्न वेष्ट्रनका सम्राट पोखरेलले ४ तथा सुप्रिम कंडेल र श्रीयान्स ज्ञवालीले समान ३–३ बिकेट लिए । झिनो लक्ष्यलाई वेष्ट्रनले ४.१ ओभरमा २ बिकेटको नोक्सनीमा भेटायो । वेष्ट्रनका सुगम जिसीले १३ बलमा १६ रनको नटआउट पारी खेले । खेलमा वेष्ट्रनका सम्राट पोखरेल प्लेयर अफ दी म्याचबाट पुरस्कृत भए ।

युवा खेलाडीहरुलाई प्लेटफर्म दिने गरि १४ वर्ष मुनिका खेलाडीहरुको १२ वटा टिमलाई दुई समुह विभाजन गरी राउण्ड रोविनका आधारमा खेलाएर समूहको शिर्ष दुई टोलीले उपाधिका लागि प्रतिस्पर्धा गर्ने क्लबका अध्यक्ष भुवन पाण्डेले बताए । प्रतियोगितामा विजेता टिमले नगद ४१ हजार ट्रफी, मेडल र प्रमाणपत्र तथा उपविजेता टिमले २१ हजार नगद राशी प्राप्त गर्ने उनले बताए । यसैगरी विधागत तर्फ उत्कृष्ट व्याट्सम्यानलाई २ हजार ५ सय, सर्वोत्कृष्ट खेलाडीलाई ५ हजार नगद राशीले सम्मान गरिने उनले बताए ।