खोज

सरकारबाट दोहोरो सुविधा लिने जनप्रतिनिधिहरुले सुविधा फिर्ता गर्नु पर्ने स्थानियबासीले माग गरेका छन् । रामग्राम नगरपालिकामा निर्वाचित दुई जना वार्ड अध्यक्ष अवकास प्राप्त कर्मचारी भएकोले सरकारबाट दोहोरो सुविधा (तलबभत्ता) खाईरहेको पाइए पछि सो सुविधा फिर्ता गर्नु पर्ने माग स्थानियले गरेका हुन् ।
५ नम्बर प्रदेश सरकारले प्रदेश राजपत्रमा स्थानिय तहका पदाधिकारी तथा सदस्यहको सुविधा सम्बन्धी ऐन २०७५ मा निर्माण गरेको ऐन छ । सो अनुसार निर्वाचित स्थानिय तहका पदाधिकारी एवं सदस्यहरुले सुविधा लिने व्यवस्था रहे पनि सरकारले सेवा निवृत्तिभरणको (पेन्शन) हकमा कुनै एक मात्र सुविधा लिने व्यवस्था गरेको छ । तर रामग्राम नगरपालिका वार्ड नम्बर ३ का वार्ड अध्यक्ष हरि प्रसाद उपाध्याय र वार्ड नम्बर ७ का वार्ड अध्यक्ष शिव शंकर हरिजनले दोहोरो पारिश्रमिक सुविधा लिएको भेटिए पछि सुविधा फिर्ता स्थानियले दवाव दिएका छन् । सरकारबाट दोहोरो सुविधा भोग गर्ने जनप्रतिनिधीले एक बर्ष देखि खाएको नगरपालिकाबाट पारिश्रमिक सुविधा फिर्ता गर्न सचेत नागरिकहरुले माग गरेका छन् । नगरका सचेत नागरिकहरुले प्रेस विज्ञप्ती जारी गर्दै दोहोरो सुविधा मध्ये एक सुविधा फिर्ता गर्ने र नगरको सवारी साधनहरुको दुरुपयोग रोक्नु पर्ने माग गरेका छन् ।
नागरिकले रामग्राम नगरपालिकाले वितरण गरेको नगर प्रुमुख, उपप्रमुख र वार्ड अध्यक्षहरुको सवारी साधन दुरुपयोग भएको आरोप लगाएका छन् । नगरले जनप्रतिनिधिहरुलाई कार्यालय समयमा कार्यालकायको कामकाज प्रयोजनका लागि दिएको सवारी साधन अधिकांश जनप्रतिनिधिहरुले साँझ विहान र विदाको दिन समेतमा सवारी साधनको निजी प्रयोग गरि दुरुपयोग गरेको आरोप लगाइएको छ । यस प्रदेश ५ मा रहेको विभिन्न स्थानिय तह र जिल्ला समन्वय समितिमा रहेका जनप्रतिनिधिहरुले लिने दोहोरो पारिश्रमिक सुविधा र सवारी साधनको दुरुपयोगलाई सम्बन्धित निकायले नियम गर्न सचेत नागरिकहरुले प्रदेश सरकार संग आग्रह गरेका छन् । स्थानिय तहमा हुने गरेको अनियमितता नहटेमा आन्दोलन गर्ने चेतावनी समेत दिएका छन् ।