खोज

माण्डवी गाउँपालिका–३ नयाँगाउँ मार्सिवाङको बीच गाउँमा समतल मैदान छ । मनै लोभ्याउने यस ठाउँको उपयोग हुन सकेको थिएन् । स्थानीयले घर पोत्न रातोमाटो खन्ने र गाईबाख्रा चराउने थलोको रूपमा प्रयोग गर्दै आइरहेका थिए । १ सय ५२ रोपनी क्षेत्रफलमा फैलिएको समतल सार्वजनिक भू–भागमा गाउँपालिकाले खेलकुद रंगशाखा बनाउने योजना थालेपछि स्थानीय उत्साहित भएका छन् । यस स्थानमा गाउँपालिकाले प्रथम अध्यक्ष कप खेलकुद प्रतियोगिता हालै संचालन गरेपछि स्थानीय अझ हौसिएका छन् । ‘समतल जमिन यत्तिकै खेर गइरहेको थियो’, मार्सिवाङका स्थानीय प्रदीप भण्डारीले भने, ‘रंगशाला बन्ने खबरले खुसी बनाएको छ ।’ गाउँपालिकाले यस ठाउँमा पहिलोपटक खेलकुद प्रतियोगिता संचालन गरेको समेत उनले जानकारी गराए । खेलाडी भएपनि मैदानको अभावले खेल क्षेत्रको सोँचे अनुसार विकास हुन नसकेको उनको भनाई छ ।
खेलकुद रंगशाला निर्माणका लागि अघिल्लो आर्थिक वर्षमै विस्तृत गुरुयोजना (डिपिआर) निर्माण भइसकेको प्रमुख प्रशासकिय अधिकृत नारायण पौडेलले बताए । प्रदेश ५ सरकारबाट विनियोजित ३७ र गाउँपालिकाको १० लाख गरी कुल ४७ लाख रूपैयाँ बजेटमा चालु आर्थिक वर्षमा निर्माणको थालनी गरिने छ । प्राविधिक शाखा प्रमुख सागर पण्डितका अनुसार रंगशाला निर्माणका लागि भ्याट बाहेक १७ करोड ६७ लाख २० हजार रूपैयाँ लागत स्टिमेट गरिएको छ । भलिवल, क्रिकेट, ब्याडमिन्टन, टेवुलटेनिस, बास्केटबल लगायत खेलहरू खेल्न मिल्ने ‘माडी स्टिेडियम’ निर्माण गर्ने योजना अघि बढेको छ । रंगशालामा करिब चार हजार दर्शकहरू अट्नसक्ने क्षमता रहेको असिस्टेन सव सञ्जिनियर पण्डितले बताए । उनका अनुसार रंगशालामा खानेपानीको ओभरहेड ट्यांक समेत निर्माण हुनेछ ।
प्यूठान–रोल्पा सडक खण्ड अन्तर्गत माण्डवी गाउँपालिकाको लामाचौर नजिकबाट करिब पाँचसय मिटर दुरीमा समतल मैदान रहेको छ । रंगशालासँगै यस क्षेत्रलाई आकर्षक खेलकुद गन्तव्यको रूपमा विकास गर्न स्थानीयले माग गरेका छन् । खेलकुद रंगशाला निर्माणपछि आर्थिक गतिविधिमा टेवा पुग्ने स्थानीयको आशा छ । यसअघि नयाँगाउँ गाविसले समेत खेलकुद मैदान निर्माणको परिकल्पना गरेको थियो । तर, आर्थिक अभावले योजना अघि बढ्न सकेको थिएन । सभंवत पाँच वर्षभित्र रंगशाला निर्माणको काम पुरा गर्ने लक्ष्य रहेको गाउँपालिका अध्यक्ष श्रीधर रोकामगर बताउँछन् । ‘यसवर्ष प्रदेश सरकार र पालिकाबाट बजेट विनियोजन गरिएको छ’,उनले भने,‘गाउँपालिकाको गौरबको आयोजना अन्तर्गत रंगशाला पनि हो ।’ नमुना रंगशाला निर्माणपछि छिमेकी जिल्ला रोल्पाका खेलाडीलाई समेत फाइदा पुग्ने उनको विश्वास छ । गौचरन बनिरहेको खाली जमिनमा रंगशाला बनाउने योजना पुरा गरेरै छाड्ने उनले सुनाए । योजना पुरा गर्नका लागि प्रदेश र संघीय सरकारसँग बजेट माग गर्ने तयारी रहेको उनले बताए ।