खोज

जिल्लाको दुर्गम क्षेत्र गौमुखी गाउँपालिकाको अर्खामा हुने ‘गौमुखी मिडिया सम्मेलन’ को खवरले यस क्षेत्रका स्थानीय उत्साहित भएका छन् । संभावना भएरपनि प्रचार प्रसारको अभावले ओझेलमा परेका सम्पदाहरूको प्रवद्र्धन हुनेभएपछि स्थानीय हौसिएका हुन् । स्वर्गद्धारी पछिको दोस्रो धार्मिक एवं पर्यटकीय गन्तव्य गौमुखी मन्दिर हो । गौमुखी सहित यससँग जोडिएका अन्य पर्यटकीय क्षेत्रको प्रवद्र्धन र राज्यको ध्यानाकर्षण गराउने उद्देश्यले आउदो मंसीर १४ र १५ गते गौमुखीमै सम्मेलन हुँदैछ । नेपाल पत्रकार महासंघ जिल्ला शाखा प्यूठान र गौमुखी गाउँपालिकाले संयूक्त रूपमा सम्मेलनको आयोजना गर्दैछन् ।

‘गाउँमा मन्त्री सहितको टोली आउने खवर सुनेका छौँ’,अर्खाका सामाजिक अगुवा रतिमान रानाले भने,‘हामी अर्खाबासीलाई यसले खुसी बनाएको छ ।’ गाउँमै आयोजना हुन लागेको मिडिया सम्मेलनलाई सफल बनाउन स्थानीयले साथ दिएर तयारीमा जुटेको समेत उनले विश्वास बताए । झिमरुक नदीको उद्गमस्थल गौमुखी सहित पुँजाको तामाखानी, नांगीलेक, झाक्रीढुंगा, बाइसमुल झरना र स्थानीय कलासंस्कृतिको प्रचारप्रसार हुने उनले आशा व्यक्त गरे । गाउँमा उत्पादन हुने कृषिजन्य उपजहरूको समेत बजारीकरणमा मद्दत पुग्नेमा स्थानीयको आशा छ । निर्माण प्रक्रियामा रहेको त्रिदेसिय मार्ग बाग्दुला–भिमगिठे सडकसँग जोडिएको उक्त गाउँबाट ‘ढोरपाटन’ समेत नजिकै पर्छ । नांगीलेकबाट धौलागिरी हिमाललाई आँखा नजिकैबाट नियाल्न सकिन्छ ।
के हो गौमुखी ?
गाईको मुखजस्तै आकारबाट ‘छ्वाङछ्वाङ’ गर्दै झर्ने पानीको मुहान नै गौमुखीको प्रमुख आकर्षण हो । माघ १ गते गौमुखीमा स्नान गर्नका लागि हजारौँ भक्तजन पुग्ने गर्छन् । पुसको अन्तिम दिन जाग्रामबसी भक्तालुहरू गाइको आकारजस्तैको मुखबाट झर्ने पानीले नुहाउने पुग्छन् । नुहाएपछि वर्षभरीको पाप पखालिने जनविश्वास रहेको अर्खा अर्तुवाङका स्थानीय चन बहादुर रानाले सुनाए । बाग्लुङको बडीघाट गाउँपालिकासँग जोडिएको दुई पहाडको खोँचमा गौमुखी मन्दिर रहेको छ । माघी मेलामा छिमेकी जिल्ला बाग्लुङ सहित अर्घाखाँची, गुल्मी, दाङबाट भक्तजनहरू गौमुखी पुग्ने गर्छन् ।

जिल्लाको प्रमुख बजार बाग्दुलादेखि करिव ४० किलोमिटर गाडीको यात्रापछि अर्खाको ठूलाचौर पुग्न सकिन्छ । ठूलाचौरबाट करिब पौने एक घण्टाको पैदल यात्रापछि गौमुखी मन्दिरमा पुग्न सकिन्छ । बृद्धबृद्धाहरूका लागि पैदल हिँड्दा ‘रेलिङ’ को समेत निर्माण गरिएको छ । पत्रकार महासंघ प्यूठानले दुइवर्ष अघि भिंगृमा स्वर्गद्धारी मिडिया सम्मेलन गरेको थियो । यसपटक गौमुखी गाउँपालिकासँग सहकार्य गरेर हुन थालेको गौमुखी मिडिया सम्मेलन उत्तरी क्षेत्रमा रहेका दुर्गम गाउँहरूको विकासमा कोशेढुंगा सावित हुने महासंघका जिल्ला अध्यक्ष महावीर रानाले विश्वास व्यक्त गरे ।

‘अझैपनि गौमुखी क्षेत्रको विकासमा राज्यको नजर पुग्न सकेको छैन्’,उनी भन्छन्,‘देशभरका पत्रकारहरूलाई गौमुखी पु¥याउने सोँच छ ।’ संघीय सरकारका पर्यटनमन्त्री सहित पर्यटनसँग सम्वन्धित विभिन्न निकाय, व्यक्तिहरूलाई समेत सम्मेलनमा सहभागी गराउने योजनामा रहेको उनले जानकारी गराए । सम्मेलनको तयारीका लागि अर्खामा विभिन्न उपसमितिहरू समेत गठन भइसकेका छन् ।स्थानीय परिकारको स्वाद सम्मेलनमा आउने पाँहुनालाई आयोजकले स्थानीय परिकारको स्वाद चखाउने योजना बनाएको छ ।

कोदोको ढिडो, रोटी, रायोको साग, फापरको रोटी, सिस्नो, लोकल कुखुराको मासु, सखरखण्ड, सिंकीको रस लगाएत परिकारले पाँहुनाको सत्कार गरिने गौमुखी गाउँपालिका अध्यक्ष विष्णुकुमार गिरीले जानकारी गराए ।

‘जिल्लाका अन्य स्थानीय तहकोे तुलनामा हाम्रो गाउँपालिका विकटमै पर्छ’,उनले भने,‘सवैको साथले सुगम गाउँपालिका बनाउने अठोटमा छौँ ।’ गौमुखी क्षेत्रमा रहेका संभावना र अवसरलाई उजागर गरी स्थानीयको जनजिविकालाई माथी उठाउन सम्मेलनले साथ दिने उनले विश्वास व्यक्त गरे । सम्मेलन अवधिभर बस्ने अतिथीहरूलाई आयोजकले होमस्टेमा राख्ने व्यवस्था समेत मिलाएको छ ।