खोज

बुटवल,१ फागुन । रुपन्देहीको तिलोत्तमामा चौथो तिलोत्तमा राष्ट्रपति रनिङशिल्ड प्रतियोगिता शुरु भएको छ । वडा नम्बर ४ स्थित जनज्योति क्लबको खेल मैदानमा भएको प्रतियोगितामा नगरभित्रका सरकारी र निजी गरी ३७ विद्यालयका करिब ४ हजार विद्यार्थीले विभिन्न इभेन्टमा प्रतिष्पर्धा गर्दैछन् ।
प्रतियोगिताको उद्घाटन गर्दै नगर प्रमुख रामकृष्ण खाँणले तिलोत्तमालाई शैक्षिकसँगै खेलकूदको समेत हब बनाउन लाग्नु पर्नेमा जोड दिए । नगरमा स्तरीय र सुविधासम्पन्न अन्तर्राष्ट्रिय स्तरको रङ्गशाला आवश्यक रहेको बताउँदै उनले त्यसका लागि नगरको सीमित स्रोत र साधनले सम्भव नभएको उल्लेख गरे ।

हरेक क्षेत्रमा तिलोत्तमालाई नमूना बनाउने आफ्नो प्रयास रहेको बताउँदै उनले समग्र खेल क्षेत्रको विकास, शिक्षा तथा स्वास्थ्यको बिकाससँगै नगरलाई हरित शहरको रुपमा बिकास गर्ने लक्ष्य रहेको बताए ।
नगर उपप्रमुख जगेश्वरदेवी चौधरीले खेलकूदको बिकाससँगै अब व्यवसायिकतालाई जोड दिनु पर्ने बताइन । खेलाडीहरु यसै क्षेत्रमा लागेर जीविकोपार्जन गर्न सक्ने हुनका लागि खेलकूदको व्यवसायिक रुपमा बिकास नै पहिलो कडी भएको उनले बताइन् ।
प्रतियोगितामा ३० स्वर्ण पदकका लागि चार हजार बढी खेलाडीको सहभागिता रहने प्रतियोगिता सम्पन्न गर्न गठित सचिवालय संयोजक दीपक खनालले बताए । प्रतियोगितामा भलिबल, कबड्डी, एथलेटिक्स र मार्सल आर्टसका विभिन्न विधामा खेल सञ्चालन हुने नगरपालिकाका शिक्षा युवा तथा खेलकूद शाखाका प्रमुख गंगाराम आचार्यले जानकारी दिए । यस प्रतियोगितालाई नगरपालिकाकै गरिमाको रुपमा हेरिएको उनले बताए ।

रनिङ शिल्डमा छात्र र छात्रा दुबैतर्फ एथलेटिक्स, भलिबल, कबड्डी र मार्शल आर्टका खेलहरु खेलाइने रनिङ शिल्ड प्रतियोगिताको सचिवालय संयोजक दीपक खनालले बताए । फागुन ३ गतेसम्म हुने प्रतियोगितामा एथलेटिक्सतर्फ सय मिटरदेखि ३ हजार मिटरसम्मका दौड र फिल्ड इभेन्टमा हाइजम्प,लङजम्प,ट्रिपल जम्प,ज्याभलिन थ्रो र सर्टपुटमा छात्र र छात्राले प्रतिस्पर्धा गर्नेछन् ।
यस्तै भलिबलमा छात्रतर्फ २१ र छात्रातर्फ १८ टिम, कबड्डीमा छात्रतर्फ २० र छात्रातर्फ १५ टिमको सहभागिता रहने प्रतियोगिता संयोजक खनालले जानकारी दिए ।
यसअघिका प्रतियोगितामा पहिलो संस्करण नवज्योति बोर्डिङ स्कुलले तथा दोस्रो र तेस्रो संस्करणको रनिङ शिल्ड कुंवरवर्ती बोर्डिङ स्कुल तिलोत्तमा ८ ले जितेको थियो ।