खोज

बुटवल, २५ माघ ।  

रुपन्देहीको तिलोत्तमामा दोस्रो जिल्लास्तरीय अण्डर १६ रनिङशिल्ड ब्याडमिन्टन प्रतियोगिता शुरु भएको छ ।

तिलोत्तमा–४ स्थित ज्ञानगंगा पाठशालाको आयोजनामा भएको प्रतियोगिताको रुपन्देही–५ का प्रतिनिधि सभा सदस्य बासुदेब घिमिरेले उद्घाटन गरे ।   घिमिरेले कोरोना महामारीको कारण शैक्षिक र अतिरिक्त क्रियाकलाप प्रभावित भएको उल्लेख गरे । खेलकुदले विद्यार्थीको मानसिक र शारीरिक स्वास्थ्यमा राम्रो प्रभाव पार्ने हुदा विद्यालय तहमा खेलाइने खेलकुद प्रतियोगिताहरुको ठुलो महत्त्व हुने बताए । खेलकुदको बिकासमा तीन वटै तहका सरकारले प्राथमिकता दिनुपर्नेमा जोड दिंदै उनले शिक्षा र खेलकुद सम्बन्धि कानुन निर्माणमा आफुले सकारात्मक भुमिका खेल्ने बताए ।

प्याब्सन रुपन्देहीका अध्यक्ष अनन्तराम शर्माले निजि क्षेत्रबाट सँचालित शैक्षिक संस्थाहरुले मुलुकको शैक्षिक स्तर र खेलकुदमा ठुलो योगदान दिएपनि सरकारले निजि विद्यालयमा पढेका विद्यार्थीलाई छात्रवृत्तिमा भेदभाव गरेकाले उच्च शिक्षाको लागि विद्यार्थी बिदेश जाने परिपाटीले बर्सेनि अरबौं रुपैयाँ बिदेशिएको हुंदा त्यसलाई रोक्नुपर्ने बताए ।

अभिभावक संघ रुपन्देहीका अध्यक्ष लोकनाथ ज्ञवाली, तिलोत्तमा ४ का वडा अध्यक्ष हरिबहादुर क्षेत्री लगायतले स्वास्थ्यका लागि मात्रै नभई देशलाई बिश्व सामु चिनाउन खेलकुदको भुमिका हुने चर्चा गरे ।

विद्यालय प्राचार्य चन्द्र अधिकारीले जिल्लामा विद्यालय स्तरमा अन्य खेलकुद प्रतियोगिता हुने गरेपनि अण्डर १६ ब्याडमिन्टन प्रतियोगिता आफुहरुले शुरूवात गरेको बताए ।

विद्यालय सञ्चालक समितिका अध्यक्ष ऋषि पाण्डे, प्रबन्ध निर्देशक युवराज न्यौपाने, शिक्षक कुलचन्द्र पुरी लगायतले विद्यार्थीको सर्वाङगीण विकासका लागि विद्यालयले शैक्षिकसंगै खेलकुद गतिविधिलाई समान महत्व दिएको बताए ।

प्रतियोगिता संयोजक एबं अतिरिक्त क्रियाकलाप प्रमुख मिलन रानाले दोस्रो संस्करणको प्रतियोगितामा २२ विद्यालयका ४४ खेलाडी सहभागी रहेको बताए । बिजेताले क्रमश: ८ हजार, ४ हजार र २ हजार नगद पुरस्कार मेडल र प्रमाणपत्र पाउनेछन् । पहिलो संस्करणको उपाधी बुटवलको दीप बोर्डिङले जितेको थियो ।