खोज

बुटवल, ४ माघ । नेपाली कांग्रेसका केन्द्रीय सदस्य एवं प्रतिनिधिसभा सदस्य विनोद चौधरीले आफ्नो निर्वाचन क्षेत्रको विकास र स्थानीयका समस्या तथा माग बुझ्न सर्वसाधारण नागरिकसँग संवाद र अन्तरक्रिया थालेका छन् । नवलपरासी १ बाट प्रतिनिधिसभा सदस्यमा निर्वाचित सांसद चौधरीले निर्वाचन क्षेत्रको समग्र विकासका बारेमा स्थानीयसँग छलफल थालेका उनको सचिवालयले जनाएको छ ।
आइतबार सरावल गाउँपालिका र प्रतापपुर गाउँपालिकाका विभिन्न वडामा पुगेर उनले स्थानीयसँग विकास निर्माण र स्थानीय समस्याकाबारे छलफल गरे । छलफलका क्रममा स्थानीयले बाढी, डुवान र सिचाईको समस्या रहेकाले यी समस्या समाधानका लागि पहल गरिदिन सांसद चौधरीसंग आग्रह गरेका सरावल गाउँपालिका ६ का झिंकु सिंह चौधरीले बताए । ‘हामीले प्रत्येक वर्ष डुवानको समस्या झेल्दै आएका छौं । सरकारले सधैं आश्वासन मात्रै दिन्छ तर कहिल्यै पनि समस्या समाधानका लागि गम्भीर देखिएन,–चौधरीले भने– ‘यसपटक हाम्रो यो समस्या समाधान हुनेछ भन्ने आशा गरेका छौं ।’
त्यस्तै प्रतापपुर गाउँपालिका वडा नंं ५ का रामजी सिंहले सिंचाईको समस्याबारे अवगत गराए। सिंचाईको भरपर्दो व्यवस्था नहुँदा किसानहरुले ठूलो समस्या भोग्दै आएको गुनासो गर्दै समस्या समाधानका लागि नहरमा नियमित पानी आउने व्यवस्था गर्न उनले सांसद चौधरीसंग माग गरे ।
सांसद चौधरीले आफूले निर्वाचनका बेला गरेका प्रतिवद्धता कार्यान्वयनका लागि प्रतिवद्ध रहेको प्रष्ट पारे । ‘हामीले चुनावका बेला जे जेति काम गर्छौं भनेका थियौं ती कार्यान्वयन गर्ने गरी काम सुरु गरिसकेका छौं । कतिपय कामको थालनी नै भइसकेको छ’–सांसद चौधरीले भने–‘पश्चिम नवलपरासीको दक्षिण क्षेत्रमा बर्षोनी हुने डुवानको समस्या समाधानका लागि पहल भइसकेको छ, नेपाल सरकार र भारत सरकारबीच नै डुवान समस्याका बारेमा उच्च तहमा छलफल भइरहेको छ ।’ सांसद चौधरीले निर्वाचन क्षेत्रको समग्र विकासका लागि स्पष्ट कार्ययोजनासहित खाका बनाउने काम पनि भइरहेको बताए ।
उनले निर्वाचन क्षेत्रका विकासका लागि व्यवस्थित कार्ययोजना बनाएर काम हुने बताए । सोही अवसरमा प्रदेश सभा सदस्य सन्तु कलवारले बाढी तथा डुवानको समस्या समाधान गर्न प्रतिनिधिसभा सदस्य चौधरीसँग समन्वय गरेर आफूले पनि काम गरिरहेको बताए । सांसद चौधरी नवलपरासी १ का विभिन्न स्थानमा पुगेर अन्तरक्रिया गर्दै आएका छन् ।