खोज

गुल्मी, २४ पुस
गुल्मीको रेसुङ्गा विमानस्थलमा डेमोस्ट्रेसन उडान सफल भएको छ । त्रिभुवन अन्तर्राष्ट्रिय विमानस्थलबाट तारा एयरको ढल्–ब्ीइ ट्वीनअटर जहाज आइतवार अपरान्ह १२ बजे रेसुङ्गा नगरपालिका १० स्थित सिमिचौरमा रहेको रेसुङ्गा विमानस्थलमा अवतरण गरेको थियो ।
विमान आउने खबर पाएपछि विहानैदेखि विमानस्थल वरिपरि हजारौं मानिसहरुको उत्साहजनक उपस्थिति रहेको थियो । विमान अवतरण पछि गुल्मेली जनताले तारा एयरका कर्मचारी, चालक दल, नागरिक उड्ययन प्राधिकरण र राजनीतिक दलका नेताहरुलाई स्वागत गरेका थिए ।
डेमोस्ट्रेसन उडानको लागि नेपाल नागरिक उडड्यन प्राधिकरण र तारा एयरलाइन्स बिच रेसुङ्गा नगरपालिका बिच सम्झौता भएपछि व्यवसायीक उडानका लागि तारा एयरले आइतबार दोश्रोपटक परिक्षण उडान गरेको हो । परिक्षण सफल भएपछि अब व्यवसायीक उडानका लागि पनि तारा एयरसँग सम्झौता गरिने रेसुङ्गा नगरपालिकाका प्रमुख खिलध्वज पन्थीले बताए ।

२०६३ सालदेखि निर्माणकार्य शुरु गरिएको उक्त विमानस्थल १६ वर्षपछि निर्माण सम्पन्न भएको हो । कुल ३३ करोड लगातमा निर्माण सम्पन्न भएको विमानस्थलको लम्बाई पाँच सय २० मिटर र चौडाइ २० मिटर रहेको छ । एक सय ५६ रोपनी क्षेत्रफलमा फैलिएको रेसुङ्गा विमानस्थल समुन्द्र सतहदेखि १५ सय २६ मिटरको उचाईमा रहेको छ ।
काठमाण्डौदेखि बिहान ११ बजे उडेको सो जहाज ११ बजेर ४७ मिनेटमा रेसुङ्गा विमानस्थलमा अवतरण गरेको थियो । डेमोस्ट्रेसन उडान सफल भएपछि अब इलाम मोडलमा नियमित उडानका लागि थप प्रक्रिया थालिने तारा एयरलाइन्सका प्रवक्ता सुदर्शन बर्तौलाले बताए । इलाममा ११ वटा हवाइ टिकटको सुनिश्चितता नगरपालिकाले गरेको छ ।
लामो समयपछि गुल्मीवासीहरुको सपना साकार भएको भन्दै गुल्मी क्षेत्र नं १ का सांसद चन्द्र भण्डारीले यो आजको अवस्थासम्म ल्याई पुराउन सहयोग गर्ने सबै राजनीति दल, विभिन्न निकाय र जिल्लावासीहरुमा धन्यवाद व्यक्त गरे । उनले यसलाई निरन्तरता दिन आफूले कुनै कसर बाँकी नराख्ने प्रतिवद्धता जनाए थिए ।

त्यसैगरि पुर्व सांसद एवं नेकपा एमालेका उप महासिचव प्रदिप ज्ञवालीले सुरक्षीत हवाई यात्रावाट समयमा गन्तव्यमा पुग्न, बिरामीलाई लैजान र आकस्मीक सेवाका लागि निकै महत्वपूर्ण हुने बताए । आफु तत्कालिन अवस्थामा परराष्टमन्त्री हुँदा शिलन्यास गरेको बिमानस्थलमा ढिलै भएपनि उडान शुरु हुन लागेकोमा खुसि व्यक्त गरे ।
जहाजमा गुल्मी जिल्लाबाट निर्वाचित सांसद चन्द्र भण्डारी, एमाले उपमहासचिव प्रदीप ज्ञवाली, नेकपा एकीकृत समाजवादीकी सचिव रामकुमारी झाँक्री, प्रदेश सभा सदश्य धनेन्द्र बहादुर कार्कि लगायत तारा एयर र नेपाल नागरिक उड्डयन प्राधिकरणका कर्मचारी सहितको टोली आएको थियो । विमान आउने भएपछि रेसुङ्गा नगरपालिकाले आइतबार पालिकाभित्रको सेवा प्रवाह बन्द गरेको थियो । रेसुङ्गा विमानस्थलमा यस अघि २०७५ जेठ २५ मा धुले परीक्षण उडान गरिएको थियो । परिक्षण उडान सफल भएपछि गुल्मेली जनताले गुल्मीबाट नियमित उडानको आशा गरेका छन् ।