खोज

रोल्पा ९८ पुस । नेकपा एमाले र नेकपा माओवादी केन्द्र सहितका दल र स्वतन्त्र सांसदहरुको समर्थनमा सरकार गठन भएसंगै अवको ध्यान राष्ट्रपति, उपराष्ट्रपति, सभामुख र उपसभामुखको निर्वाचनमा गएको छ । सत्ता भागवण्डामा गठवन्धनको ठूलो दल नेकपा एमालेले राष्ट्रपति लिए संगै उपराष्ट्रपति पद गठवन्धनको दोश्रो ठूलो दल नेकपा माओवादी केन्द्रले पाएको छ ।
२०७४ सालकै मोडलमा एमालेले राष्ट्रपति र माओवादी केन्द्रले उपराष्ट्रपति लिने गरि सैद्धान्तिक सहमति गरेका छन । सभामुख र प्रधानमन्त्री भने आलोपालो गर्ने सहमति अनुसार प्रधानमन्त्री माओवादी केन्द्रले पाएसंगै सभामुख नेकपा एमालेको भागमा परेको छ ।
राष्ट्रपति उपराष्ट्रपति चयनको समय अझै महिना दिन भन्दा वढी समय वाँकी रहेपनि यसको चर्चा भने सुरु हुन थालेको छ । उपराष्ट्रपति माओवादीले पाएसंगै यसको अवसर पुनः रोल्पालीले नै पाउने चर्चा चल्न थालेको छ । मुलुकको दोश्रो सर्वोच्च पदमा यस पटक पहिलो पटक महिला जाने चर्चा चल्न थालेको छ । दुई कार्यकाल भन्दा वढी उपराष्ट्रपति हुन नपाईने संवैधानिक व्यवस्थाका कारण रोल्पाकै नन्दवहादुर पुनको कार्यकाल पुरा भएसंगै केही समय पछि विदा हुदैछन ।
नयाँ उपराष्ट्रपतिका लागि रोल्पाकी नेतृ जयपुरी घर्तीमगको चर्चा सुरु भएको छ । जयपुरी रोल्पा परिवर्तन गाउँपालिका वडा नं. २ रांसीमा जन्मिएकी हुन । जयपुरीले सशस्त्र युद्धको समयमा रुकुममा विवाह गरेकी थिईन । उनको श्रीमान सशस्त्र युद्धमा मारिएका थिए । हाल जयपुरीले राजनैतिक कार्यक्षेत्र रोल्पालाई वनाएकी छिन ।
माओवादी सशस्त्र द्धन्दले जन्माएकी उनीले शान्ति स्थापना संगै २०६३ सालमा पहिलो पटक अन्तरिम व्यवस्थापिका संसद छिरेर संसदीय राजनीतिको सुरुआत गरेकी हुन ।
पहिलो पटक २०६३ सालमा अन्तरिम विधायक वनेकी जयपुरी २०६४ सालको संविधान सभा निर्वाचनमा तत्कालिन नेकपा माओवादीका अध्यक्ष पुष्पकमल दाहाल प्रचण्ड रोल्पा निर्वाचन क्षेत्र नं. २ वाट विजयी हुदा रोल्पा निर्वाचन क्षेत्र नं. १ वाट विजयी भएकी थिईन । सोही समय उनी छोटो समय महिला वालवालिका तथा समाजकल्याण मन्त्री समेत भएकी थिईन । २०६९ सालमा एकीकृत नेकपा माओवादी विभाजन हुदा उनले मोहन वैद्य लाई रोजेकी थिईन । वैद्यको पार्टीले २०७० सालको दोश्रो संविधान सभा निर्वाचन वहिष्कार गरेका कारण उनी सो निर्वाचनमा सहभागि भईनन । पछि पुनः पुरानै पार्टीमा फर्किएकी उनी २०७४ सालको निर्वाचनमा समानुपातिक सांसद वनेकी थिईन । सोही कार्यकाल उनी प्रतिनिधि सभाको शिक्षा तथा स्वास्थ्य समितिको सभापति समेत भईन । जयपुरी हाल नेकपा माओवादी केन्द्रको सचिवालय सदस्य छिन । उनले ४ मंसिरको प्रतिनिधि सभा सदस्य निर्वाचनमा रोल्पावाटै निर्वाचन लड्ने चाहाना व्यक्त गरेकी थिईन । रोल्पाबाट वर्षमान पुन निर्वाचन लडेसंगै उनको संसद यात्रा रोकिएको थियो ।
ओनसरी भन्दा कम अवसर पाएकी जयपुरीलाई यस पटक उपराष्ट्रपति वनाउनु पर्ने कुरामा नेकपा माओवादी केन्द्रका उपाध्यक्ष कृष्णवहादुर महरा पनि सकारात्मक रहेको माओवादी केन्द्रका एक नेताले वताए । वर्षमान पुन वर्तमान पुष्पकमल दाहाल प्रचण्ड नेतृत्व सरकारमा नगएका कारण ओनसरीलाई उपराष्ट्रपति दिने सम्भावना पनि उत्तीकै छ ती नेताले भने ।
उपराष्ट्रपतिमा राष्ट्रकै दोश्रो सर्वोच्च पद पुनः रोल्पाले चर्चा चल्न थालेको छ । यस अघि नन्दवहादुर पुन २ कार्यकाल उपराष्ट्रपति भईसकेका छन भने ओनसरी घर्तीमगर र कृष्णवहादुर महरा सभामुख भईसकेका छन ।