खोज

बुटवलको एउटा सडक निर्माण गर्दा चरम लापरबाही भएको पुष्टी भएको छ । जम्मा ७५ मिटर लम्बाईको बाटो निर्माण गर्न ५ महिना भन्दा पनि बढि समय लागेको पाइएको हो । बुटवलको मुख्य व्यस्त बजारको रुपमा रहेको संगमपथको सडक निर्माण शुरु भएको ५ महिना पुरा भएपनि बाटोको हालत हिलाम्मे छ । त्यस क्षेत्रमा पसल व्यवसाय गरेर बस्दै आएका व्यक्तिहरुको लागि गर्मिमा धुलो र बर्षामा हिलो खानु सामान्य नियम जस्तै बनेको छ ठेक्का लिएको लामो समय सम्म पनि सडक निर्माण पुरा नहुँदा कतिपय व्यवसायीहरूको पसलमा नै सडकको धुलो र हिलो जाने गरेको गुनासो आएको छ ।
मानिसहरूको किनमेलको लागि बढि मात्रामा प्रयोग गर्ने बुटवलको नविल बैंक पारी देखि संगम पथ बाटोमा अहिले मानिसहरू पहिल्लै नाक खुम्चाएर हिँड्ने गर्दछन् । कतिपय त बाटोको अवस्था देखिर त्यहिँबाट नै फर्किने गरेका छन् । मर्मत तथा निर्माणका लागि भत्काईएको उक्त सडक लामो समयसम्म सम्पन्न नहुँदा सर्वसाधारणले सास्ती भोगेका छन् । बुटवल उपमहानगरपालिका वडा नम्बर–४ मा पर्ने उक्त सडक मर्मत तथा विस्तारका लागि गत बैशाखको अन्तिम तिर भत्काईएको थियो । त्यसपछि धुलोको सिकार भएका स्थानीय व्यवसायीहरू र सडक प्रयोग कर्ताहरूले निरन्तर ५ महिनासम्म धुलो र हिलोको सिकार भैरहेका छन् ।
नविल बैंकदेखि ज्योती बैंक उत्तर दक्षण सम्मका उक्त बाटो जोडिएको छ । गत असार मसान्तसम्म सम्पन्न भैसक्नुपर्ने सडक अहिलेसम्म सम्पन्न हुन नसकेको स्थानीयको गनुासो गरेका छन् । बुटवल उपमहानगरपालिकाको १८ लाख र उपभोक्ताको ३ लाख गरी २१ लाख बजेटको उक्त सडक निर्माणका लागि सगुन कन्टक्सनले ठेक्का लिएको थियो ।
निर्वाचित जनप्रतिनिधि र पटक पटक बुटवल उपमहानगरपालिका संग पनि यस विषयमा कुरा गर्दा कुनै पनि प्रतिक्रिया नपाएको स्थानियहरूले गुनासो गरेका छन् । बुटवल–४ का वडाध्यक्ष टंक प्रसाद पराजुलीले सडक निर्माणको काम सम्पन्न गर्न केही ढिलाई भएक ो स्वीकार गर्दछन्। उनी भन्छन्–‘बाटो निर्माणमा ढिला भएको हो बार्खाको समय यस्तै हो । ’
वडाध्यक्ष पराजुलीले नाली बनाउने विषयमा उपभोक्ताबीच विवाद हुंदा र कामदारको अभावले ढिलाई भएको दावि गरे । अहिले वर्षात भएकाले कालो पत्रेका लागि रोकिएको उनको भनाई रहेको छ ।
ठेकदार कम्पनी लाई बुटवल उपमहानगरपालिकाले चासो नदिएकाले सडक निर्माणमा ढिलाई भएको स्थानीय सरोकारवाला हरि देवकोटाले बताए । समयमा सडक निर्माणका लागि नगरपालिका र ठेकदारलाई खबरदारी गर्दापनि कुनै सुनुवाई नभएको उनको गुनासो छ । लामो समय सम्म सडक भत्काएर नबनाउंदा हिलो र धुलाले व्यवसाय प्रभावित भएको व्यवसायी शिव घिमिरेले बताउछन् । उनका अनुसार गर्मीमा धुलो र बार्षामा हिलोको कारण ग्राहको संख्या पनि घटेको छ ।