खोज

कपिलवस्तु,  बैशाख- अतिक्रमणका कारण दुर्घटना बढदै गएको हुलाकीमार्ग अन्र्तगत कपिलवस्तुको तौलिहवा– बहादुरगंज सडकखण्डको कपिलवस्तु नगरपालिका वडा नम्बर ४ कोदहवा चोकको सडक अतिक्रमण हटाईएको छ । कपिलवस्तु नगरपालिकाकाको अगुवाई र जिल्ला सुरक्षा समितिको पहलमा कपिलवस्तु नगरपालिकाका कर्मचारी नेपाल प्रहरी, सशस्त्र प्रहरी, हुलाकी सडक र बाणगंगा सिचाई प्रणालीका कर्मचारीहरुले जेसिबी लगायर सडक अतिक्रमण हटाएका हुन । सो सडकमा बनेका १५ बढि घर टहरालाई हटाईएको हो । सो चौराहामा सडक क्षेत्र मै घर टहरा र टंकी भएका कारण दुर्घटना बढेको भन्दै बैशाख १४ गते अतिक्रमण हटाउने निर्णय गरिएको थियो । सडक अतिक्रमण गरी बनाइएका ५ घर टहरा तथा सारर्वजनिक जग्गा र बाणगंगा सिचाई प्रणालीको जग्गामा बनाइएका ७ घर टहरा समेत हटाइएको नगरपालिकाका ईन्जीनीयर राजेश सैनीले जानकारी दिए ।

यस अघि २ पटक सम्म नगरपालिकाले कोदहवामा रहेको अतिक्रमण हटाउन सार्वजनिक सुचना जारी गरेको थियो । तर त्यहाँ अतिक्रमण गरि बसेका स्थानियले सुचनालाई अटेरी गर्दैै आएका थिए । राजमार्ग सडकमा हुने अवरोध हटाउन गर्नु पर्ने सुरक्षा कार्यबिधि २०७५ को दफा ७ बमोजिम प्रशासन कार्यालयले तौलिहवामा राखेको जिल्ला स्तरीय बैठकमा अतिक्रण खाली गराउने निर्णय गरिएको थियो । नगरपालिकाले पटक पटक स्चना जारी गर्ने र खाली गर्न आग्रह गर्दा समेत बेवास्ता गरे पछि बाध्य भएर यो अतिक्रमण हटाउने कार्य गरिएको नगर प्रमुख सुदीप पौडेलले बताए । सडकमा अतिक्रमणका कारण दुर्घटना बढेको भए पनि अतिक्रमण हटे सगै सडक दुर्घटना समेत घटने प्रमुख पौडेलले बताए । अतिक्रमण हटाउने कार्यमा स्थानियले समेत साथ दिएका थिए । जिल्लाको अन्य स्थानमा रहेका सडक अतिक्रमण हटाउने कार्य पनि अगाडी बढाईने कपिलवस्तुका प्रमुख जिल्ला अधिकारी शंकरहरी आचार्यले बताए ।