खोज

भैरहवा, २४ चैत ।
“सरकारी काम कहिले जाला घाम“ सरकारी काममा कतिसम्म ढिला हुन्छ भन्ने यो नेपाली प्रचलित भनाइले समेत प्रमाणित गर्छ । सिद्धार्थनगर नगरपालिका वडा नं ६ को कार्यालय १ बर्ष हुंदा समेत सन्चालनमा आउन सकेको छैन । २०७८ साल चैत १५ गते उद्घाटन भएको वडा भवन (कार्यालय) हालसम्म पनि सञ्चालनमा नआउंदा वडा बासीहरु समस्यामा परेका छन् ।
स्थानीय तथा अधिबक्ता दिलिप कुमार मल्लिकले वडाको भवनको सदुपयोग नहुंदा जनतालाई समस्या भएको बताए । वडा भवन सेवाका लागी हो । आफ्नै वडाबाट सेवा देखाउनु पर्ने हो मल्लिकले भने, वडा नं ६ का जनताले ५ बाट सेवा लिनुपरेको छ ।
भैसकेको भवनबाट सेवा नहुंदा जनता आस्चर्यमा परेको उनले बताए । आफ्नै वडामा कार्यालय हुंदा जनताहरु वडा नं ५ मा रहेको नगरपालिकाबाट सेवा लिन बाध्य छन् । वडा नं ६ का स्थायी बासी झब्बालाल कहाँरले भवन पुरा भएको १ बर्ष पुरा हुंदा समेत अन्यत्रबाट काम हुंदा जनतालाई समस्या भएको गुनासो गरे ।
उद्घाटन भएको १ बर्ष पुरा भएको सिद्धार्थनगर नगरपालिका वडा नम्बर ६ को वडा कार्यालय सञ्चालनमा नआएको भन्दै नेकपा (एमाले) सिद्धार्थनगर नगरपालिका वडा नम्बर ६ कमिटीले सिद्धार्थनगर नगरपालिकालाई ध्यानाकर्षण पत्र बुझाएको छ ।
शुक्रबार नगर उपप्रमुख उमा अधिकारीलाई ध्यानाकर्षण पत्र बुझाउँदै एमालेले स्थानीय तह निर्वाचन अघि नै सिद्धार्थनगर–६ स्थित पिपरिहयामा निर्माण भइ उद्घाटन भइसकेको कार्यालयबाट वडाबासी तथा सेवाग्राहीलाई सेवा प्रदान गर्न माग गरेको छ ।
पार्टीको ‘मिसन गासरुट अभियान’ अन्तर्गत वडामा भइरहेका विभिन्न भेला तथा बैठकमा समेत वडा कार्यालयसम्बन्धमा निरन्तर प्रश्न उठिरहेको एमाले सिद्धार्थनगर–६ का अध्यक्ष राम दयाल गुप्ताले बताए । उनले भने, ‘संघीयताको मूल मर्मअनुसार नागरिकको नजिकबाट सेवा पाउनुपर्छ । तर, वडा नम्बर ६ का वडाबासी तथा सेवाग्राहीलाई सेवा लिन सिद्धार्थनगर नगरपालिका वडा नम्बर ५ मा जानुपरेको छ । ’उद्घाटन भइसकेको वडा समितिको नयाँ भवन (कार्यालय) सञ्चालनमा आउनुपर्ने एमाले सिद्धार्थनगर–६ का सचिव मदन प्रसाद पौडेलले बताए । उनले जनताको मागलाई वेवास्ता गरी वडा कार्यालय वडा नम्बर ६ बाटै सञ्चालनमा ल्याउन ढिलाइ गरिए आन्दोलनका कार्यक्रम जान बाध्य हुने पौडेलले बताए । ज्ञापनपत्र बुझ्दै सिद्धार्थनगर नगरपालिकाकी उपप्रमुख उमा अधिकारीले सेवाग्राहीलाई नयाँ भवनबाट छिटो भन्दा छिटो सेवा प्रदान गर्न प्रयास भइरहेको बताइन् । उनले भनिन्, ‘वडा कार्यालय उद्घाटन हुँदा विवाद थिएन्, तर, पछि पर्खाल निर्माण गर्ने क्रममा केही विवाद भयो । विवाद समाधानका लागि छलफल जारी छ । काम नभएको होइन, प्रयास भइरहेको छ । ’ जनताको आवाज उठाएको भन्दै एमाले सिद्धार्थनगर–६ वडा कमिटीलाई उनले धन्यवाद व्यक्त गरिन् । ध्यानाकर्षण पत्र बुझाउन एमाले सिद्धार्थनगर–६ का अध्यक्ष राम दयाल गुप्ता, सिद्धार्थनगर कमिटी सदस्य मोहम्मद अकिल मुसलमान, वडा कमिटीका उपाध्यक्ष रामप्रसाद श्रेष्ठ, सचिव मदन प्रसाद पौडेल, उपसचिवद्वय आनन्द प्रसाद न्यौपाने, अनिता थापा, सोहन हरिजन, सुक बहादुर आलेलगायत नेता कार्यकर्ता शुक्रबार सिद्धार्थनगर नगरपालिकाको कार्यालय पुगेका थिए ।