खोज

सल्यान,१० चैत- खेत जोत्ने समय नजिकिदै गर्दा धमाधम गोरु मर्न थालेपछी सल्यानका किसान चिन्तित बनेका छन् । जिल्लाको बनगाड कुपिण्डे नगरपालिका तथा सिद्धकुमाख गाउँपालिकामा लम्कि स्किन डिजिज रोगका कारण पशुचौपाया मर्न थालेपछी किसानहरु क्षती व्यहोर्न बाध्य छन भने त्यत्तिकै चिन्ता पनि थपिएको छ ।
सिद्धकुमाख गाउँपालिकाको वडा ४ सागिने, बनगाड कुपिण्डे नगरपालिकाको पाखापानि,मैदु लगायतका क्षेत्रमा गोरु मर्न थालेको स्थानियहरु बताउँछन् । “नाकबाट सिगान वग्ने, टाउको सुनिने, पिसाव नलि सुनिने र दुईतिन दिनपछि गोरु मर्ने गरेका छन् “ स्थानिय कृषक कमलचरण धितालले भने, “अब खेतिपातिको समय आउंदैछ । यस्तो बेलामा जोत्ने गोरु नै मरेपछी कसरी खेती गर्ने, कसरी जीवन चलाउने भन्ने चिन्ता लागेको छ ।“

बनगाड कुपिण्डे नगरपालिकाको पशु स्वास्थ्य शाखाले पशु चौपायामा देखिएको उक्त रोग लम्पी स्किन डिजिज रोग भएको पुष्टि भएको जनाएको छ । शाखा प्रमुख विनाराम विसीले यो रोगको उपचार भ्याक्सिन बाट मात्रै सम्भव हुने तर हाल सम्म नेपालमा खोप नभएको जानकारी दिए । उपचार नै नहुने भएपछी किसान झन चिन्तामा छन ।
बनगाड, सिद्धकुमाख लगायतका क्षेत्रमा १२ जिउ भन्दा बढी गोरु मरिसकेको किसानहरु बताउँछन् । बनगाड कुपिण्डे नगरपालिकाको वडा नम्बर ५,६,७,८ र ९ लगाएतका क्षेत्रमा पशुचौपाएमा रोग देखापरेको छ । रोग लागे पछि गोरुले दानापानी पनि नखाने र विरामी गोरुलाइ उपचार गर्दा पनि निको नभएको स्थानीय कृषक जयराम बुढाथोकीले बताए ।

यता जिल्लाको कालिमाटी गाउँपालिकामा पनि लम्कि स्किन जस्तै लक्षण देखिएको रोगको कारण एक साताको अवधिमा दस भन्दा बढी गाई गोरु मरेको किसानहरुले बताएका छन् । गाउपालिकाको वडा नम्बर ७ घुईयाबारी बाट सुरु भएको उक्त संक्रमण पालिकाको ६,५,४ हुदै ३,२,१ वडामा पनि फैलिएको छ । गाउँपालिकाको पशु स्वास्थ्य शाखा मार्फत पालिकाका सात वटै वडामा किसानका घरमा विरामी परेका गाईगोरुको उपचार गरिरहेको गाउँपालिकाले जनाएको छ । विरामी परेका गाईगोरुको छालामा फोका देखिने, घाटीको माला सुनिने, नाईटो मुनिको भागहरु सुनिने, १०५ डिग्री भन्दा बढी ज्वरो आउने, श्वास प्रश्वासमा समस्या हुने, नाकमुखबाट पिप जस्तो बाक्लो सिगान बग्ने जस्ता समस्या देखिने गरेको कालिमाटी गाउँपालिकाका पशु स्वास्थ्य शाखा प्रमुख केशवराज वस्नेतले जानकारी दिए ।