खोज

बुटवल चैत- जिल्लाका विद्यार्थी संगठनहरुले यहि चैत ५ गते हुने स्वतन्त्र विद्यार्थी युनियनको निर्वाचनलाई शान्तिपुर्ण र मर्यादित बनाउने प्रतिबद्धता जनाएका छन् ।
सात वटा विद्यार्थी संगठन तथा समुहहरुका अध्यक्षहरुले ७ बुदे प्रतिबद्धता पत्रमा हस्ताक्षर गर्दै आपसमा आरोप प्रत्यारोप तथा मान, प्रतिष्ठामा आँच पुग्ने गतिविधि नगर्ने र सम्मानजनक व्यबहार गर्ने बताएका हुन ।
चाँदनी नेपाल र सामाजिक परिबर्तन केन्द्रले संयुक्त रुपमा बुटवलमा बुधबार आयोजना गरेको संबाद कार्यक्रममा आफ्ना विचार, घोषणापत्र र एजेण्डा खुल्ला रुपमा मतदाता विद्यार्थी समक्ष राख्ने र बहस गर्ने वातावरणमा अबरोध श्रृजना नगर्ने बताउदै उनीहरुले मतदाताले रोजेको संगठन र उम्मेदवारलाइ मतदान गर्ने हकको संरक्षण र सुनिश्चितताप्रति संवेदनशील रहेको प्रतिबद्धता व्यक्त गरेका हुन ।

अनेरास्वबियुका अध्यक्ष शेषकान्त पोखरेल , नेपाल बिद्यार्थी संघका सभापति सन्दिप पाण्डे , अखिल (क्रान्तिकारी ) का अध्यक्ष कपिल चापागाई , अखिल ( क्रान्तिकारी ) बहुमतका अध्यक्ष पारस राहादी मगर , अखिल छैठौका अध्यक्ष सागर बेल्वासे , अखिल ( क्रान्तिकारी ) बिप्लवका अध्यक्ष पदम पराजुली र राष्ट्रिय स्वतन्त्र विद्यार्थी समुहका अध्यक्ष बरन्यम राज गौतमले हस्ताक्षर गरेको प्रतिबद्धता पत्रमा विद्यार्थी संगठनका उम्मेदवारहरुले आयोजना गरेको सभा, वैठक, भेला जस्ता कार्यक्रमलाइ बिथोल्ने वा वाधा अवरोध पु¥याउने कार्य जिल्लाभरी हुन नदिने उल्लेख गरिएको छ ।

कार्यक्रममा इलाका प्रशासन कार्यालय बुटवलका प्रमुख मोहनराज जोशी , राष्ट्रिय मानवअधिकार आयोगको प्रदेश कार्यालयका अधिकृत दिपक ठाकुर , बुटवल बहुमुखी क्याम्पसका प्रमुख डा खिमानन्द न्यौपाने , निर्बाचन अधिकृत कुलानन्द पाण्डे , यज्ञोदय बहुमुखी क्याम्पस फर्साटिकरका प्रमुख टंक पौडेल , निर्बाचन अधिकृत भिमप्रसाद सापकोटा , नेपाल पत्रकार महासंघका केन्द्रीय सदस्य भवानीप्रसाद पाण्डे , संवाद सहजकर्ताहरु हुमराज भुसाल , प्रेम परियार , समिक्षा बलाल लगाएतले बोल्दै स्वबियू निर्बाचनलाई शान्त, भयरहित र निश्पक्ष बनाउनका लागि बिद्यार्थी संगठन , क्याम्पस प्रशासन तथा निर्बाचन समितिको समन्वयात्मक भुमिका महत्वपुर्ण हुने भएकाले संयमता अपनाउदै जिम्मेवारी पुरा गर्नुपर्ने आवश्यकता रहेको बताएका थिए ।

रुपन्देहीका ४ आंगिक र १३ सामुदायिक गरि १७ क्याम्पसमा चैत ५ गते स्वबियु निर्बाचन हुने तयारी भएपनि ७ वटा क्याम्पसमा विद्यार्थी संगठनहरुले तालाबन्दि गरेका कारण निर्वाचन अन्यौलमा रहेको छ ।