खोज

भैरहवा फागुन ।-  रुपन्देहीको ओमसतिया गाउँपालिकाले सामुदायिक बिद्यालयहरुमा खस्किदो शैक्षिक गुणस्तर सुधार्न प्रधान अध्यापकहरु संगै अन्य शिक्षकको काज सरुवा गर्ने जनाएको छ । राम्रो नतिजा दिन नसक्ने एवम राजनितिमा बढी लागेका प्रधान अध्यापकहरुलाई आगामी शैक्षिक सत्रमा पालिकाकै अन्य बिद्यालयहरुमा काज सरुवा गर्ने गाउँपालिकाले जनाएको छ ।
ओमसतिया गाउँपालिकामा आयोजित अन्तरक्रिया कार्यक्रममा गाउँपालिका अध्यक्ष मन्जित कुमार यादव (सोनु) कडा रुपमा प्रस्तुत भए । उनले प्रधान अध्यापकहरु बिद्यालयमा शैक्षिक क्रियाकलापमा भन्दा अन्य काममा बढी ध्यान दिएको आरोप लगाए । “संस्थागत बिद्यालयहरु भन्दा सामुदायिक बिद्यालयहरुमा तुलनात्मक बढी सुविधा हुन्छ ।” यादवले भने “तर नतिजा सामुदायिक भन्दा संस्थाको राम्रो आउछ, यसमा तपाईहरुको लापारवाही छैन ?”गाउँपालिकाले दिने सेवा सुविधा पालिकाले उपलब्ध गराउने र शिक्षकले पनि आफ्नो तर्फबाट सर्वोत्कृष्ट दिन उनले आग्रह गरे ।

ओमसतिया गाउँपालिकाको शैक्षिक गुणस्तर सुधारमा पालिकाका जनप्रतिनिधि देखि कर्मचारी सम्मले ऐक्यवद्धता जनाएका छन् । गाउँपालिकाकी उपाध्यक्ष सुनिता चौधरीले शिक्षकहरुलाई राजनिति र शिक्षण पेशामा कुनै एक रोज्न सुझाव दिएकी छन । उनले पनि शैक्षिक गुणस्तरको सुधारको लागि शिक्षकको सरुवा अनिवार्य रहेकोले यस सम्बन्धि पालिकाले आफ्नै कानून बनाइ अघि बढने बताईन । गुणस्तरिय शिक्षाको लागि शिक्षक संगै बिद्यालय ब्यस्थापन समिति एवम अभिभावकले पनि उत्तिकै चासो दिन गाउँपालिकाका प्रमुख प्रशासकिय अधिकृत विपिन क्षेत्रीले आग्रह गरे । ओमसतिया गाउँपालिकामा १६ वटा सामुदायिक, १४ वटा संस्थागत एवम ५ वटा धार्मिक बिद्यालय रहेको बताउदै उहाले यी सबैको शैक्षिक गुणस्तरको लागि पालिका कठोर निर्णय गर्न बाध्य भएको उनले जनाए ।

कार्यक्रममा वडा नम्बर ५ का वडा अध्यक्ष एवम पालिकाका प्रवक्ता मदन प्रसाद पोखरेल, वडा नम्बर ३ का वडा अध्यक्ष प्रकाश सिंह चौधरी, वडा नम्बर ६ का वडा अध्यक्ष शिव कुमार धवल, शिक्षकको तर्फबाट राजकुमार गुरुङ्ग, महेश चौधरी, ईनल यादव लगायतले बोलेका थिए । कार्यक्रमको सहजीकरण पालिकाका शिक्षा शाखा प्रमुख हरि प्रसाद पोखरेलले गरेका थिए ।