खोज

बाँके माघ – शहरमा पार्किङ्गको सहज व्यवस्थापन एवं नियमन गर्ने जिम्मेवारी पाएको नेपालगन्ज उपमहानगरपालिकाले स्वार्थ समूहलाई पार्किङ्ग गर्न अनुमति दिएको छ ।

उपमहानगरकै जनप्रतिनिधिको संलग्नताका कारण सरकारी र निजी जग्गामा समेत पार्किङ्गका नाममा यतिबेला नेपालगन्जका ठाउँ–ठाउँमा लुट मच्चाइएको छ । यसरी सर्बसाधारणलाई ठगि गर्न अनुमति दिए वापत जनप्रतिनिधिले आर्थिक लाभ लिइरहेको स्रोत बताउँछ । अनुसन्धान गर्ने हो भने स्वार्थ समूह र जनप्रतिनिनिधिको मिलोमतोमा नेपालगन्जमा पार्किङ्गका नाममा मच्चाइएको आतंकको भण्डाफोर हुने स्थानीय बताउँछन् । साथै उनीहरुले यस्ता गतिबिधि तत्काल रोकेर छानविनको माग गरेका छन् ।

पार्किङ्गका नाममा भइरहेको लुटको पछिल्लो उदाहरण हो–यातायात कार्यालय नेपालगन्ज । कारकांदोस्थित सुर्खेतरोडमा रहेको उक्त कार्यालय साँघुरो बाटो अनि बस्तीको माझ रहेको बाँके गाउँमा भर्खरै सारियो । उक्त कार्यालयको छेउमै व्यक्तिको खाली जग्गा छ जहाँ यातायात कार्यालयमा दैनिक आउने सयौं सेवाग्राहीको सवारीसाधन पार्किङ्गका नाममा भन्दै एउटा समूहले चर्को रकम असुली गरिरहेको छ ।

व्यक्तिको जग्गामा सवारी पार्किङ्ग लागिका भन्दै थमाइएको चिट्मा शुल्क उल्लेख छ तर कस्ले कस्को अनुमतिमा पार्किङ्ग गरिरहेको हो भन्ने उल्लेख छैन । जर्बजस्ती पार्किङ्ग शुल्क दिन बाध्य कोहलपुरबाट यातायात कार्यालय आएका सेवाग्राही दिपेन्द्र ओलीले भने–‘यहाँ यातायात कार्यालय सार्नुको उद्देश्य नै यही खाली जग्गामा पार्किङ्गमा लगाएर सेवाग्राहीबाट पैसा असुल्ने देखियो । नेपालगन्जमा यहाँ मात्र होइन अन्य ठाउँमा पनि यस्तै आंतक छ । जनप्रतिनिधिको मिलोमतो बिना यस्तो कसैले गर्न सक्दैन । यस्तो गतिबिधि रोकेर तत्काल छानबिन हुनुपर्छ ।’ यातायात कार्यालय आउने सेवाग्राहीबाट साईकल पार्किङ्ग गरेवापत रु १०, मोटरसाईकल पार्किङ्ग गरेवापत रु २० रुपैया लिने गरिएको छ । कारको रु ४०,बसको रु ६० र बसको रु १०० शुल्क तोकिएको छ । आफ्नो कार्यालयमा आउने सेवाग्राहीलाई पार्किङ्गका नाममा लुटिरहेको देखेको भएपनि कानमा तेल हालेर बसेका छन् ।

पार्किङ्गका नाममा अर्को लुट रिक्सा चालकको नाममा देखिएको छ । रिक्साको अव्यवस्थाकाबीच नेपालगन्जमा रिक्सा चालकहरु केही स्वार्थ समूहको कमाइ गर्ने भाडो बनाएका छन् । जमुनाह नाका क्षेत्रमा इ–रिक्साहरुको भिडभाड बढी भएको र सडकमै पार्किङ गर्दा आवतजावत प्रभावित हुने गरेको भन्दै उपमहानगरपालिकाले शुल्क उठाउने जिम्मा दिएका व्यक्तिहरुले पार्किङ व्यवस्थापनभन्दा तोकिएको भन्दा बढी शुल्क उठाएर ठगी गर्दै आएका छन् । तोकिएको रु २० भए पनि १० रुपैया बढि अर्थात रु ३० शुल्क लिएको छ ।

नेपालगन्ज उपमहानगरपालिकाले पार्किङ्गको व्यवस्थापन गर्ने भन्दा स्वार्थ समूह सँग मिलेर लुट मच्याउन प्रोत्साहित गरिरहेको छ । यस्तो कार्य रोकेर पार्किङ्गलाई लुट मच्याउने माध्यमका रुपमा दुरुपयोग गर्नेहरुका बिषयमा छानबिन गर्नुपर्ने सर्बसाधारणहरुले आवाज उठाएका छन् ।