खोज

गुल्मी, पुस – गुल्मीको धार्मिक एवं ऐतिहासिक स्थल रिडीमा आजदेखि माघे संक्रान्ती मेला शुरु भएको छ । मेलाको सबै तयारी पुरा भएको मेला आयोजक संस्था रुरु फ्रेण्ड्स क्लवका अध्यक्ष सोबित थापाले जानकारी दिएका छन । गुल्मी, पाल्पा र स्याङ्जा जिल्लाको संगम स्थल रिडी क्षेत्रको काली गण्डकी नदिमा माघे संक्रान्तिको दिन स्नान गर्न आउने श्रद्धालुहरुको बिहानैदेखि घुँईचो लाग्ने गर्दछ ।
विगत तीन वर्षदेखि कोभिडका कारण सुनसान जस्तै बनेको रिडीमा यस पटक माघे संक्रान्ती मेलासँगै चहलपहल समेत बढेको छ । माघे संक्रान्तिको अवसरमा रिडी स्थित काली गण्डकी नदिमा स्नान र पुजाआजाका लागि टाढाटाढावाट कतिपय श्रद्धालुहरु रिडी आई पुगेका छन । भोली बिहानैदेखि कालीगण्डकी नदिमा स्नान गर्न आउने श्रद्धालुहरुको घुँईचो लाग्ने गर्दछ । गुल्मी, पाल्पा र स्याङ्जा जिल्लाको संगम स्थल रिडी स्थीत काली गण्डकि नदिमा स्नान गर्न र रिषीकेश भगवानको दर्शन गर्नकालागि छिमेकी जिल्लाहरु भारतवाट समेत श्रद्धालुहरु रिडी क्षेत्रधाममा आउने गर्दछन् ।

माघे संक्रान्तिको दिनमा श्रद्धालुहरु काली गण्डकी नदीमा स्नान गरि नजिकै रहेको रिषीकेष मन्दिरमा गई पुजा आराधना गरेपछि आफुले अन्जानका गरेका सम्पूर्ण पापहरु नष्ट भई मोक्ष प्राप्ती हुन्छ भन्ने विश्वास रहिआएको छ । विशेषगरि माघे संक्रान्तिको दिनमा काली गण्डकीमा स्नान गर्नाले देव रिण, पितृ रिण तथा रिषी रिण समेत तरिने धार्मिक विश्वास रहेको छ । त्यँही विश्वासका कारण हजारौं मानिसहरु माघे संक्रान्तिको अवसरमा रिडी क्षेत्रमा आउने गर्दछन् ।
रुरुक्षेत्र गाउँपालिकाको संरक्षकत्वमा स्थानीय रुरु फ्रेण्ड्स क्लवको आयोजनामा रिडीमा पाँच दिनसम्म मेला लाग्ने गर्दछ ।रुरुक्षेत्र गाउँपालिकाको आयोजनामा माघे संक्रान्तिको अवसरमा कृषि मेला प्रर्दशनीको समेत आयोजना गरिने भएको छ । प्रर्दशनीमा घरेलु उत्पादीत सामग्री लगायत कृषि उपज वस्तुहरु राखिने रुरुक्षेत्र गाउँपालिकाका अध्यक्ष यदु ज्ञवालीले बताए ।

रुरु क्षेत्र धार्मिक, पौराणिक, ऐतीहासिक तथा पर्यटकीय दृष्टिकोणले पनि निकै महत्वपूर्ण मानिदै आएको छ । जसका कारण यस क्षेत्रको महिमा नेपाल बाहिर पनि उत्तिकै प्रख्यात छ । मकर संक्रान्तिको अवसर संचालन हुन लागेको रिडी मेलामा विशेषगरि कम्मल, काम्ला, राडी– पाखी, बाँस तथा चोयावाट निर्मित सामग्रिहरुका साथै ओखरका घाँजी, गुँड, सुन्तला लगायतका वस्तुको राम्रो व्यापार हुने गर्दछ । संक्रान्तिको अवशरमा रिडीमा व्यापार गर्नका लागि वाग्लुङ्ग, रुकुम, रोल्पा लगायतका ठाउँबाट पैदल यात्रा गरि मानिसहरु रिडी आईपुगेका छन् ।
रिडी क्षेत्र धार्मिक, पौरााणीक, ऐतिहासिक तथा पर्यटकीय दृष्टिकोणले समेत निकै महत्वपूर्ण मानिन्छ । नेपालका चार धाम मध्ये एक धाम र धार्मिक तथा पर्यटकिय दृष्टिकोणले रुरु क्षेत्र निकै महत्वपूर्ण मानिन्छ । माघे संक्रान्तिको दिन काली गण्डकिमा स्नान गरेर रुरु कन्याको दर्शन गरेमा मानिसहरुले आफुले अन्जानका गरेका सम्पूर्ण पापवाट मोक्ष प्राप्त हुन्छ भन्ने किंवदन्ती छ । मेलालाई लक्षीत गरेर रिडीमा ख्याति प्राप्त राष्ट्रिय कलाकारहरुको साथमा क्लवले विविध सांस्कृतिक कार्यक्रमको समेत आयोजना गरेको छ ।