खोज

रोल्पा,  पुस । नेकपा एमालेको प्रतिनिधि सभामा ४४ प्रत्यक्ष र ३४ समानुपातिक गरि ७८ सांसद छन । ती मध्ये सबैभन्दा कम उमेरकी सांसद हुन ईश्वरी घर्ती । नेकपा एमालेको केन्द्रीय सदस्य तथा रोल्पा जिल्ला सह ईन्चार्ज समेत रहेकी घर्ती दश वर्ष लामो सशस्त्र द्वन्द्वमा रोल्पाले विकास बजेट धेरै गुमाएकाले त्यसको क्षतिपूर्ति हुनुपर्ने बताउँदै आएकी छिन ।

उनले दश वर्षे सशस्त्र द्वन्द्वमा देशका अन्य सबै जिल्लामा विकास गतिविधि निर्वाध भएपनि रोल्पाले विकास गतिविधि गर्न नपाएको भनाइ छ । यसमा तत्कालिन विद्रोही मात्र हैन सत्ता पक्ष पनि दोषी छ । जनतालाई सुरक्षा दिएर विकास गतिविधिमा सहभागी गराउने जिम्मा राज्यको हो त्यसमा राज्य चुकेका कारण रोल्पा विकासमा पछि परेको घर्तीको भनाइ छ ।
मैले दश वर्ष रोल्पाले गुमाएको विकासको अहिले क्षतिपूर्ती हुनुपर्ने गरि संसदमा कुरा उठाउँछु घर्तीले भनिन । दश वर्षमा बजेट मात्रै फिर्ता गएन भएका संरचनाहरू पनि ध्वस्त पारिए त्यसको पुननिर्माणले गति लिन सकेको छैन घर्तीले भनिन । तत्कालिन गाविस भवन, प्रहरी चौकी, सेवाकेन्द्र लगायतका धेरै संरचना ध्वस्त भएपनि निर्माणको काम निकै सुस्त छ घर्तीले भनिन ।

रोल्पा जस्ता द्धन्दले थिलोथिलो भएका जिल्लालाई क्षतिपूर्ती हुने गरि कानून वनाउने गरि वकालत गर्नु पर्ने घर्तीको भनाई छ । रोल्पामा विकासको नाममा सडक तथा भवन निर्माण जस्ता भौतिक विकासले मात्रैप्राथमिकता पाउदा सामाजिक मुद्धाहरू ओझेलमा परेको घर्तीको वुझाई छ । रोल्पामा वालविवाह, आत्महत्या र संवन्ध विच्छेद व्याप्त रहदा यस तर्फ ध्यान जान सकेको छैन उनले भनिन । भौतिक विकास संगै सामाजिक न्याय र सामाजिक परिवर्तन जरुरी रहेको उनको भनाई छ ।

पछिल्लो परिवर्तनमा ठूलै कुर्वानी गरेपनि परिवर्तन पछि रोल्पालीको मुहारमा खुसीयाली छायो की छाएन यो नै अहम प्रश्न हो घर्तीले भनिन । पचासौ हजार रोल्पाली रोजीरोटीका लागि खाडी मलेसिया र भारत जान वाध्य भएको वताउदै उनीहरूलाई आफ्नै गाउँमा स्वरोजगार नवनाउदा सम्म आर्थिक विकास सम्भव नहुने घर्तीको भनाई छ । राजनीति भन्दा माथि उठेर विकास नगर्दा सम्म रोल्पाले काँचुली फेर्न नसक्ने वताउदै यसको लागी तीनै तहका प्रतिनिधिहरू एकै ठाउँमा वसेर रोल्पाको विकासका लागी चित्र कोर्नु पर्ने घर्तीको भनाई छ ।