खोज

बुटवल, ४ पुस ।

विश्वमा नै मानव मृत्युको मुख्य कारण बनिरहेको मधुमेह र उच्चरक्त चापबारे सचेतना जगाउने उद्देश्यका साथ बुटवलमा दुई दिने परीक्षण तथा परामर्श कार्यक्रम गरिएको छ । ‘स्वस्थ शरीर, स्वस्थ परिवार अनि मात्र स्वस्थ समाज’ भन्ने नारासहित श्री नेवा सेवा समितिको आयोजना, केन डाईबेटिज एण्ड थाईराइड सेन्टरको प्राविधिक सहयोग, जनकलाल हेल्थ फाउन्डेसनको सहकार्यमा मधुमेह, मृगौला र उच्च रक्तचापको रक्त र पिसाब परीक्षण, परामर्श कार्यक्रम गरिएको हो ।

एक कार्यक्रमका बीच वडा नं. ११ का वडाअध्यक्ष रामचन्द्र क्षेत्रीले बिरामीलाई परीक्षण कार्ड वितरण गरेर कार्यक्रमको उदघाटन गर्दै सामाजिक कार्यमा बुटवलका संघसंस्थाहरुको अग्रसरता उदाहरणीय रहेको बताए । नेवा भवनको जग्गा प्राप्ति र भवन निर्माणको सुरुवातमा उत्पन्न विवाद र समस्या स्मरण गर्दै उनले पछिल्लो समय नमुना सामाजिक कार्यमा भूमिका गर्न सफल भएको बताए । शंखध्वर साख्याको नामाकरणबाट स्थापना गरिएको भवन नाम अनुसार नै सामाजिक कार्यमा अग्रसर भएर योगदान दिएको उनले बताए । नसर्ने तर जटिलत रोगहरु दीर्घ रुपमा समस्या देखाउने भन्दै यसबारे सचेत हुनुपर्ने उनले सुझाव दिए ।

कार्यक्रममा समितिका अध्यक्ष चिरञ्जीवी श्रेष्ठले नेवारी भाषा, संस्कृति, संस्कारको जगेर्ना, संरक्षणसंगै सामाजिक चेतनाको अभियानमा लागेको बताए । फेसनको रुपमा निःशुल्क परीक्षण कार्यक्रम समाजमा चलाउने गरिएको भन्दा फरक ढंगबाट न्युन शुल्क राखेर आफुहरुले तीन प्रकारको परीक्षण र परामर्शलाई जोड दिएको उनले बताए ।

प्रत्येक ब्यक्तिले ५० रुपैयाँ तिरेर आफनो मधुमेह, मृगौला र उच्च रक्तचापको अवस्थाबारे जानकारी र त्यसबाट बच्न के कस्ता उपाय अपनाउने भन्ने परामर्शहरु दिईने उनले बताए । कार्यक्रममा समितिका वरिष्ठ सल्लाहकार तथा प्रसुति तथा स्त्रीरोग विशेषज्ञ डा. प्रायश्चित श्रेष्ठले नेपालीहरुको खानपिन, आहारबिहारमा गलत बानी ब्यवहारका कारण नै रोग भित्रिरहेको बताए । सुर्ती, चुरोट, मादक पदार्थ सेवन जस्ता गलत ब्यवहारलाई रोक्ने अभियानलाई सामाजिक संघसंस्थाहरु लाग्नुपर्ने सुझाव दिए । साईलेन्स किलरको पहिचान बनाएको मधुमेह र रक्तचापको समयमा पहिचान गर्न सके ब्यवस्थापन गर्न सकिने चिकित्सकहरुको सुझाव छ ।

कार्यक्रममा केन डाईबेटिज एण्ड थाईराईड सेन्टरका अध्यक्ष दिनेश कक्षपतिले मधुमेह, मृगौला र रक्तचापको परीक्षण गरी अवस्था पहिचान गर्न आग्रह गरे । हरेकको घरघरमा दीर्घरोग भित्रिएको भन्दै यसको ब्यवस्थापन चुनौती बन्दै गएको उनले बताए । रोग लागेपछि उपचार गर्नु भन्दा बेलैमा खानपिन र जीवनशैली परिवर्तन गर्न सके दीर्घरोगमा बच्न सकिने उनले बताए । रोग लागेर ठूलो खर्च गर्नभन्दा रोगबाट बच्ने अभियानलाई तीन तहको सरकारले जोड दिनुपर्ने उनको सुझाव छ ।

कार्यक्रममा माझगाउ टोल विकास संस्थाका अध्यक्ष दुर्गा बहादुर थापा श्रीष, पवित्रानगर टोल समितिका अध्यक्ष गंगा बहादुर थापा, समितिका सल्लाहकार विष्णु श्रेष्ठ, उपाध्यक्ष डिल्ली कुमार श्रेष्ठले रोगको उपचारसंगै सही ब्यवस्थापन गर्नुपर्ने बताए । दुई दिनसम्म चल्ने शिविरमा स्थानीय ३ सय ५० बढीले सेवा लिने समितिका सचिव शारदा श्रेष्ठले बताईन् ।