खोज

गुल्मी, ०७ कार्तिक ।
जिल्ला प्रशासन कार्यालय गुल्मीमा सेवाग्राहीहरूको चाँप बढेको छ । दशै/तिहारको समयमा अधिकांस मानिसहरू चाडबाड मनाउनका लागि घरमा आउने र त्यही मौका छोपेर सरकारी कार्यालयमा पुगेर आफ्नो कामकाज समेत फत्ते गरेर फर्कने भएका कारण यो समयमा जिल्ला प्रशासन कार्यालयमा यसरी सेवाग्राहीहरूको चाप बढेको हो ।

गत सातादेखि जिल्ला प्रशासन कार्यालयमा यसरी सेवाग्राहीहरूको भीड बढेपछि सेवादिने सेवा प्रदायक कार्यालयलाई पनि सेवाग्राहीहरूको चापलाई व्यवस्थापन गर्न थप समस्या परेको छ । कार्यालयमा सेवाग्राहीहरूको बाक्लो उपस्थिति भएपछि कार्यालयले राती नौ वजेसम्म सेवा प्रवाह गर्दै आएको प्रमुख जिल्ला अधिकारी कृष्णप्रसाद शर्माले जानकारी दिएका छन ।

कार्यालयमा यसरी सेवाग्राहीहरूको चाप बढेपछि प्रशासन कार्यालयले टोकन प्रणाली मार्फत पछिल्लो दिनको टोकन समेत अघिल्लो दिनमा नै बितरण गर्न थालेको छ । गाउँगाउँवाट गाडी भाडामा लिएर ठूलो समूहमा एकैपटक सेवा लिन आउन थालेपछि कार्यालयमा नागरिकता बनाउनका लागि दुई दिनसम्म पालो पर्खनु पर्ने बाध्यता बनेको छ ।

सेवाग्राहीहरू आफ्नो पालो लगाउनका लागि अघिल्लो दिनमा नै सदरमुकाम तम्घास आएर बासबस्ने र बिहानै पाँच बजेदेखि नै लाईनमा बस्ने गर्दछन । लाईनमा बस्दै गर्दा कतिपयहरूको लाईन कार्यालयको गेट बाहिरसम्म पुग्ने गर्दछ । पहिलो पटक कार्यालयमा आउने मानिसहरू कार्यालय परिशरमा देखिने मानिसहरूको बाक्लो उपस्थितिका कारण कुनै विवाह तथा उत्सवहरू भन्दा कम भीड देखिँदैन ।
चाडवाड शुरु हुनु अघि सामान्य मात्रमा सेवा ग्राहीहरूको उपस्थिति हुने जिल्ला प्रशासन कार्यालय गुल्मीमा आजभोली सयौं मानिसहरू नागरिकता, राहदानी र अन्य सिफारिसकालागि विहानैदेखि दिनहुँ लाईनमा देखिन्छन् । कार्यालय समय शुरु हुनु अगाडि उनीहरू आफ्नो पालो चाँडै लगाएर काम सकायर घर फर्कने आशमा हातमा नागरिकताको सिफारिस बोकेर घण्टौसम्म लाईनमा बसेर पालो पर्खिरहेका हुन्छन् ।

दैनिक सरदर ४० देखि ६० वटासम्म नागरिकता वितरण र राहदानीको फाराम भर्ने जिल्ला प्रशासन कार्यालयमा अहिले दैनिक तीन सय ५० भन्दा बढी नागरिकता बनाउने र राहदानीको फाराम भर्ने गरिन्छ । त्यसका अतिरिक्त राष्ट्रिय परिचपत्रमा पनि उत्तिकै चाँप हुनेगर्दछ । “दशै र तिहारले गर्दा होला यसपटक दैनिक दुइ भन्दा बढी नागरिकता वितरण हुने गरेको छ, कार्यालयमा सेवाग्राहीहरूको चाँपका कारण जिल्ला हुलाक कार्यालय, जिल्ला समन्वय समिति लगायतका कार्यालयबाट समेत कर्मचारी थप गरेर सेवा प्रदान गर्दै आइरहेका छौं”, सहायक प्रमुख जिल्ला अधिकारी हरिप्रसाद गैरेले बताए ।

नागरिकता फाँटका कर्मचारी युवराज बस्नेतले यस पटक विगतमा भन्दा नागरिकता र राहदानी र राष्ट्रिय परिचयपत्र बनाउने आउनेहरूको संख्या धेरै भएको बताए । त्यसैगरि प्रशाशन कार्यालयमा नागरिकताको प्रतिलिपि लिने र अभिलेख प्रमाणित गर्न आउने मानिसहरूको संख्या पनि यो पटक विगतमा भन्दा धेरै छ । दशै तिहार अगाडि दैनिक दश देखि १५ जनाले नागरिकताको प्रतिलिपि लिने गर्दथे भने हाल दैनिक सरदर ६० भन्दा बढीले प्रतिलिपि बनाएर जाने गरेको बताईएको छ ।

कतिपय मानिसहरू भने दुई दिनसम्म बसेर पालो पर्खेर पनि आफ्नो काम फत्ते गरेर फर्कने गरेका छन् । सरकारी कार्यालयहरू मध्ये सवै भन्दा वढी भीडभाड आजभोली जिल्ला प्रशासन कार्यालयमा देखिने गरेको छ । “यो भीडभाड तिहारसम्म यसरी नै बढ्दै जान्छ, त्यसपछि बिस्तारै बिस्तारै कम हुन्छ, यसलाई कसरी व्यवस्थित गर्ने भन्ने बारेमा प्रशासनले ध्यान दिनुपर्छ,” नागरिक समाजका संयोजक पदमप्रसाद पाण्डेले बताए ।