खोज

दाङ, २८ असार ।

दाङ जिल्ला पूर्ण खोप सुनिश्चितता तथा दीगोपना घोषणा भएको छ । जिल्लाका १० वटै पालिका पूर्ण खोप सुनिश्चितता घोषणा गरिएपछि आज जिल्लालाई नै पूर्ण खोप सुनिश्चितता तथा दीगोपना जिल्ला घोषित गरिएको हो ।

राष्ट्रिय खोप तालिकाअनुसार जन्मेदेखि ५९ महिनासम्मका बालबालिकालाई १३ वटा खोप प्रदान गरिएको सुनिश्चित भएपछि पूर्ण खोप सुनिश्चितता तथा दीगोपना घोषणा गरिएको हो । जिल्लाका सबै स्थानीय तह र वडासँगको समन्वयमा घरधुरी सर्वेक्षण गरी प्राप्त प्रतिवेदनका आधारमा जिल्लालाई पूर्ण खोप सुनिश्चितता तथा दीगोपना घोषणा गरिएको जिल्ला खोप समन्वय समितिले जनाएको छ ।

जिल्ला खोप समन्वय समिति संयोजक एवम् जिल्ला समन्वय समिति प्रमुख नित्यानन्द शर्माको अध्यक्षता तथा लुम्बिनी प्रदेशका स्वास्थ्य मन्त्री दिपेन्द्र कुमार पुनको प्रमुख आतिथ्यमा एक कार्यक्रम गरी खोपको सुनिश्चिततासँगै यसको दीगोपनाका लागि सबै पक्षले काम गर्ने प्रतिवद्धतासहित घोषणा गरिएको हो । कार्यक्रममा स्वास्थ्यमन्त्री पुनले शिक्षा र स्वास्थ्य राज्यको पहिलो दायित्व भएको हुँदा सबैलाई यसको पहुँचमा पुर्याउने प्रयास जारी रहेको बताएका छन् ।

समुदायमा सामाजिक तथा चेतना जागरुकता अभावमा चुनौति रहेपनि दायित्व पूरा गर्न राज्य लागि परेको उनले बताए । हरेक सुचकांकमा लुम्बिनी प्रदेश पछि परेको हुँदा सुचकांक सुधारका लागि वृहत समीक्षा जरुरी रहेको उनको भनाई थियो । यसैगरी जिल्ला खोप समन्वय समिति संयोजक एवम् जिल्ला समन्वय समिति प्रमुख शर्माले नेपाल सरकारले लिएको लक्ष्यलाई पूरा गर्न सबै तह र तप्का निरन्तर लाग्नुपर्ने बताए ।

स्वस्थ शरीर नै व्यस्त जनशक्तिको मुख्य आधार भएको भन्दै उनले रोग लागेर उपचार गर्नुभन्दा रोग लाग्नै नदिन नेपाल सरकारले अघि सारेको अभियानलाई सबैले आत्मसात गर्नुपर्ने बताए । कार्यक्रममा स्वास्थ्य निर्देशनालय बुटवलका खोप फोकल कुमार थापाले जिल्लालाई पूर्ण खोप सुनिश्चितता तथा दीगोपना भएको प्रमाण पत्र पढेर सुनाउँदै स्वास्थ्यमन्त्री मार्फत जिल्ला खोप समन्वय समितिलाई प्रमाण पत्र हस्तान्तरण गरेका थिए ।

जिल्लामा बिसिजी खोप कभरेज ९४.५ प्रतिशत, पेन्टाभ्यालेन्ट पहिलो कभरेज ९५ प्रतिशत, दादुरा रुबेला दोश्रो कभरेज १०५ प्रतिशत, पूर्ण खोप कभरेज १०५ प्रतिशत रहेको छ । स्वास्थ्य कार्यालयका अनुसार, १६ देखि ५९ महिनासम्मका शून्य डोज बच्चा १२ जना र १६ देखि ५९ महिनासम्मका ड्रप आउट बच्चा ७२ जना रहेका छन् । पालिकागत तथ्यांक अनुसार, यो वर्ष जिल्लाको घोराही उपमहानगरपालिकामा ७६ दशमलव ५ प्रतिशत, तुलसीपुर उपमहानगरपालिकामा ११३ दशमलव १ प्रतिशत, लमही नगरपालिकामा ११८ दशमलव ३ प्रतिशत, बंगलाचुली गाउँपालिकामा १०५ दशमलव ५ प्रतिशत, शान्तिनगर गाउँपालिकामा १०६ दशमलव ५ प्रतिशत खोप कभरेज भएको छ ।

यसैगरी, बबई गाउँपालिकामा ७३ दशमलव ८ प्रतिशत, दंगीशरण गाउँपालिकामा ९४ दशमलव ८ प्रतिशत, राप्ती गाउँपालिकामा १०८ दशमलव २ प्रतिशत, गढवा गाउँपालिकामा १०५ दशमलव ६ प्रतिशत र राजपुर गाउँपालिकामा ९० दशमलव ६ प्रतिशत खोप कभरेज भएको छ । सो अवसरमा, घोराही उपमहानगरपालिकाका नगर प्रमुख नरुलाल चौधरीले मानिसले खुशी र समृद्धि चाहने हो भने स्वास्थ्यमा सुधार हुन जरुरी रहेको बताए । पछिल्लो समय सर्ने भन्दा नसर्ने रोगको जोखिम डर लाग्दो अवस्थामा बढेको बताउँदै रोग पहिचानपछिको निदानमा राज्यले ध्यान दिन आवश्यक रहेको उनको भनाई थियो ।

दंगीशरण गाउँपालिका अध्यक्ष शम्भु गिरीले मानिसले आफ्नो शरीर स्वस्थ राख्न आनीबानी र जीवनशैलीमा ध्यान दिनु आवश्यक रहेको बताए । सरकारले अघि सारेको स्वास्थ्य नीतिलाई सबै पक्षबाट सहयोग हुनुपर्ने उनको भनाई थियो । दाङमा २०६९–०७० बाट यो अभियान थालनी भएपनि जिल्लालाई पहिलो पटक २०७४ पुस २३ गते पूर्ण खोप सुनिश्चितता तथा दीगोपना घोषणा गरिएको थियो । स्वास्थ्य कार्यालय दाङका प्रमुख किशोर आचार्यको स्वागत मन्तव्यबाट शुरु भएको कार्यक्रमको सहजीकरण फोकल पर्सन कमल चन्दले गरेका थिए ।।