खोज

साउन महिनामा नेपालगन्जका सडकमा राखिएका सिसि टिभी क्यामेरा उपयोगी देखिएको छ । क्यामेराको सहयोगले सडक दुर्घटना र अन्य बिभिन्न अपराधिक गतिबिधि नियन्त्रणमा सहयोग पुगेको प्रहरीले जनाएको छ ।
अहिले सबैभन्दा बढि ट्राफिक नियम तोड्ने बिरुद्ध कारबाही गर्न सहयोग सावित भएको जिल्ला प्रहरी कार्यालय बाँकेका एसपी अरूण पौडलले बताए । ट्राफिक नियम तोडेर भाग्नेहरू पनि सिसि क्यामेराको सहयोगबाट पहिचान गरि कारबाही गरिरहेको पौडेलले बताए ।
नीजि क्षेत्रको अगुवाईमा नेपालगन्ज उपमहानगरपालिका सिसि क्यामेराको निगरानीमा राखिएको छ । नेपालगन्जको १६ स्थानमा ५६ वटा सिसि क्यामेरा जडान गरिएसँगै अब शहर सिसि क्यामेराको निगरानीमा भएको छ । सिसि क्यामेरा जडानसँगै अपराधिक गतिबिधि नियन्त्रण हुने जनाइएको छ । सिसि क्यामेरा जडानको पहल गरेको नेपालगन्ज उद्योग वाणिज्य संघका अध्यक्ष नन्दलाल बैश्यले अब नेपालगन्जमा हुने हरेक गतिबिधि निगरानीमा भएको बताए । उनले अब सबैले सुरक्षित महसुस गर्ने बताए । संघका २५ जना पदाधिकारीहरूबाट २ लाख ५२ हजार १ सय संकलन गरि सिसि टिभी क्यामरा कोष निर्माणमा जुटेको अध्यक्ष बैश्यले बताए ।
१६ स्थानमा ५६ वटा सिसि टिभी क्यामराको ३३ लाख ९७ हजार २ सय ६८ रूपैयाँ रकम कुल लागत रहेको जनाएको समितिले जनाएको छ । विभिन्न संघ संस्था र व्यवसायीबाट सिसि टिभी क्यामरा जडानको लागि ४५ लाख ७६ हजार १ सय संकलन भएको समितिका अध्यक्ष बैश्यले बताए । जिल्ला समन्वय समिति बाँकेका संयोजक अजय श्रीवास्तव, नेपालगन्ज उपमहानगरपालिकाका प्रमुख डा. धवल शम्शेर राणा, बाँकेका प्रमुख जिल्ला अधिकारी मदन भुजेल, प्रदेश प्रहरी प्रमुख डिआईजी शेरबहादुर बस्नेतले साउन महिनामा नेपालगन्जमा आयोजित कार्यक्रममा सिसिटिभी क्यामरा संचालनको सुभारम्भ गरे ।
समितिका उपाध्यक्ष जिल्ला सहकारी संघ बाँकेका अध्यक्ष प्रेम सुवेदीका अनुसार नेपालगन्जका राझा, भुजैगाउँ, कारकादौं, पुष्पलाल चोक, धम्बोझी, विपी चोक, गणेशमान चोक, भेरी अस्पताल चोक, त्रिभुवन चोक, त्रिवेणी चोक, शहीद सेतु विक चोक, बसपार्क चोक र बाईपास लगायतका मुख्य चोकमा सिसिटिभी क्यामरा जडान गरिएको छ । नगरका विभिन्न भागमा जोडिएका सिसिटिभी जिल्ला प्रहरी कार्यालय बाँकेको प्रत्यक्ष निगरानीमा राखिएको छ । सिसि टिभी जडानमा सहयोग गर्ने व्यक्ति संघ संस्थाका पदाधिकारीहरूलाई सहयोग गरे बापत प्रमाणपत्र प्रदान गरिएको छ ।