खोज

सल्यानको शारदा नगरपालिकाले ८० वर्ष उमेर पुगेका जेष्ठ नागरिकलाई दशैंतिहार खर्च वापत दुई÷दुई हजार रूपैयाँ प्रदान गर्ने व्यवस्था मिलाइएको जनाएको छ । गएको आर्थिक वर्ष २०७४/०७५ समिक्षा र चालु आर्थिक वर्षमा नगरपालिकाले गर्ने योजनावारे पत्रकारहरूलाई जानकारी दिन आयोजीत पत्रकार सम्मेलनमा नगर प्रमुख सुरेश अधिकारीले भने, जेष्ठ नागरिकलाई दशैँतिहार खर्च र अपांगता भएका ब्यक्तिलाई नगरपालिकाले दिने सिफारिश लगायतका सुविधामा कुनै पनि शुल्क नलाग्ने एवम् मृत्यु दर्ता जहिले गरेपनि निःशुल्क हुने व्यवस्था हामीले मिलाएका छौँ ।
पछिल्लो समय देशभर कर बढेको कुरा तर्फ इंगीत गर्दै नगरप्रमुख अधिकारीले शारदा नगरमा विगत तीन वर्षयता कुनै पनि करमा बृद्धि नभएको जानकारी गराए । ‘मनोरञ्जन र विलासीताका क्षेत्रमा १० प्रतिशत कर वृद्धि गरे पनि अन्य कुनै पनि क्षेत्रको करमा वृद्धि गरेका छैनौँ,’ उनले भने । मदिरा पसल लगायत विलासिता, मनोरञ्जनका क्षेत्रमा १० प्रतिशत कर वृद्धि गरेको उनले जानकारी गराए ।
नगरपालिकाले यो वर्षका विभिन्न कार्यक्रमलाई प्रभावकारी रूपमा सञ्चालन गर्न कार्यतालिका समेत बनाएको छ । भाद्र मसान्त सम्म योजनको प्राविधिक स्टेमेट, असोज मसान्त भित्र टेण्डर, उपभोक्ता समितिलाई अभिमुखिकरण आदि गरेर कार्यक्रम समयमै सम्पन्न गर्ने योजना रहेको नगरका प्रवक्ता दिपक हमालले बताए । असारमा काम सक्ने प्रवृतिको अन्त्यका लागि कार्ययोजनामा रहेर काम गर्नेछौँ, उनले भने । पाँच लाख भन्दा माथिका निर्माणका कार्यका लागि ठेक्का टेण्डर मार्फत गरिने नगरपालिकाको योजना रहेको हमालले बताए ।
नगरपालिका भित्रका सडकहरूको स्तोरन्नतीका लागि मर्मंत सम्भार ब्यक्ति (पेटौली) राखिने भएको छ । यस्तै नगरपालिकाले जिल्ला अस्पताल सल्यानलाई ५० सैयाको बनाउन आवश्यक बजेट विनियोजन गरेको छ । पत्रकार सम्मेलनमा उप प्रमुख सावित्रा वस्नेतले नगरपालिकाको कामलाई चुस्त र प्रभावकारी वनाउन कर्मचारीको अभावले समस्या भएको बताइन् । कार्यालय अहिले पनि निमित्त प्रमुखको भरमा चलिरहेको छ । यसले हामीलाई सेवा प्रवाहमा केहि समस्या उत्पन्न गराइरहेको छ, उनले भनिन् । कर्मचारीको अभावमा अघिल्नो वर्ष ४८ करोड रकम विनियोजन भए पनि ४५ करोड मात्रै खर्च गर्न सकिएको नगरपालिकाले जनाएको छ ।