खोज

केन्द्रिय धनादेश कार्यालयले निर्देशन नदिदा हुलाक बचत बैङ्क सञ्चालनमा अन्योलता देखिएको छ । सोहि अन्योलताका कारण बचत बैङ्कमा निक्षेप संकलन गरिए पनि नयाँ खाता खोल्ने कार्य र ऋण लगानी गर्ने कार्य भने रोकिएको छ । सरकारले चालु आवको बजेटमा हुलाक बचत बैङ्कलाई खारेजी गरि त्यहाँ रहेका खाताहरु सरकारको स्वामित्वमा रहेका बैङ्कमा स्थानान्तरण गर्ने निर्णय गरेको थियो । सोही निर्णयको आधारमा केन्द्रिय धनादेश कार्यालयले जिल्ला हुलाक कार्यालयलाई गत अषाढ मसान्त भित्र हुलाक बचत बैङ्कका तहबिल निल गरि कारोबार र खाता बन्द गर्न परिपत्र गरेको थियो । सोही परिपत्रको आधारमा कपिलवस्तुको जिल्ला हुलाक कार्यालय मातहतको हुलाक बचत बैङ्कको सम्पुर्ण कारोबार बन्द गरिएको थियो । गत आवको अवधी सम्म कुल ८ सय ९७ ग्राहक रहेको बैङ्कको ३ करोड ९२ लाख ७८ हजार ९ सय ८१ रुपैया निक्षेप संकलन तथा ७९ लाख ८६ हजार ८ सय ४१ रुपैया ऋण लगानी रहेको थियो । अषाढमा सबै खाता बन्द गरिए पनि दैनिक जसो आउने १० देखी २० ग्राहकलाई सेवा कसरी दिने भन्ने बिषयमा समस्यामा परेको बैङ्कमा कार्यरत खरिदार संदिप पन्थीले बताए । “सेवाग्राहीको निक्षेप त संकलन गरेका छौ । तर कतिपय नयाँ खाता खोल्नेलाई फिर्ता पठाउनु परेको छ ।” उनले भने ।
तर नयाँ आव शुरु भए सगै केन्द्रिय धनादेश कार्यालयले सम्पत्ती दायित्व बुझाउन कुनै परिपत्र नगरे पछि बैङ्कलाई यथावत सञ्चालन गर्ने वा अन्य सरकारी स्वामित्वका बैङ्कमा खाता सार्ने बिषयमा अन्योलता भएको हो । केन्द्रिय धनादेश कार्यालयको स्पष्ट निर्देशन नआउदाँ आफुहरुले खाता यथावत सञ्चालन गर्ने वा सरकारी स्वामित्वको बैङ्कमा खाता स्थानान्तरण गर्ने भन्ने बिषयमा अन्योलमा परेको जिल्ला हुलाक कार्यालयका निमित्त हुलाक अधिकृत शिवलाल बन्जोडेले बताए । उनले समयमै निर्देशन नआउदाँ नयाँ खाता खोल्ने वा नखोल्ने तथा ऋण लगानी गर्ने बिषयमा अन्योलता बढेको स्विकार गरे । हुलाक बचत बैङ्कमा बचत संकलन गर्ने ७० बर्ष माथीका जेष्ठ नागरिकका हकमा ७ प्रतिशत र अन्यका हकमा ६ प्रतिशत ब्याज उपलब्ध गराउदै आएको र हुलाकका कर्मचारीका लागी मात्रै गरिने ऋण लगानीका हकमा ८ प्रतिशत ब्याज असुली गर्ने गरिएको छ ।