खोज

प्यूठान, ७ मंसिर । २०६४/०६५ सालतिर प्यूठान सदरमुकाम खलंगाको त्यो चहलपहल । सवै सरकारी कार्यालय सदरमुकाम केन्द्रित । ४९ वटै गाविस सचिवहरूको सम्पर्क कार्यालय । जिल्ला विकास समितिमा थामिनसक्नु सेवाग्राहीको भिडभाड । त्यही भिडमा पत्रिका वितरण गर्दै हिड्थे तत्कालिन बरौला गाविस, हाल ऐरावती गाउँपालिका २ बरौला प्यूठानका तेजप्रसाद पाण्डे ।

१७ वर्षको कलिलो उमेर । चन्चले र जिज्ञासु स्वभाव । पढ्नका लागि भर्खर भर्खर सदरमुकाम छिरेका थिए उनी । घरको कमजोर आर्थिक अवस्थाले कमाउँदै पढ्दै गर्नुपर्ने बाध्यता थियो । प्यूठान सदरमुकाम खलंगाबाट प्रकाशित हुने प्यूठान समाचार दैनिक पत्रिकामा उनी हकरको रूपमा नियूक्ती भए ।

सरुमारानी गाउँपालिकास्थित सरस्वती माध्यमिक विद्यालयमा एसएलसी उत्र्तिण गरेपछि प्लस टु पढ्नका लागि पाण्डे सदरमुकाम पुगेका हुन् । कोठा भाडामा बसेर महेन्द्र नमुना उच्च माध्यमिक विद्यालयमा पढ्दै गरेका आफ्नो पढाइसँगै विद्यालयमा हुने अतिरिक्त क्रियाकलापमा समेत सक्रिय सहभागीता जनाउँथे । सयौँ विद्यार्थीको भिडमा उनी चलाख विद्यार्थीको रूपमा चिनिन्थे । झण्डै एक वर्षसम्म उनले प्यूठान समाचार दैनिक पत्रिकामा वितरकको रूपमा काम गरे । मेहन्द्र नमुना उमावीबाट प्लस टु र प्यूठान क्याम्पसबाट उनले स्नातक सम्मको पढाई पुरा गरे । पत्रिका वितरकको रूपमा काम गरेर मात्र कोठाभाडा र पढाई खर्च जुटाउन धौ–धौ पयो ।

पाण्डे ०६८ सालमा जिल्ला निर्वाचन कार्यालय प्यूठानमा कम्प्यूटर अपरेटरको रूपमा नाम निकाले । त्यहाँ उनले तीन वर्षसम्म काम गरे । कम्प्यूटर परेटरको तीन वर्षे अनुभवपछि उनी ०७१ सालदेखि ०७८ साल चैतसम्म नेपाल रेडक्रस सोसाइटी प्यूठान खलंगाहुँदै वैतडी लगायत जिल्लामा कार्यक्रम अधिकृतको रूपमा कार्यरत रहे । त्रिभुवन विश्वविद्यालयबाट पाण्डेले राजनीति शास्त्रमा स्नातकोत्तर तह र नेपाल ल क्याम्पसबाट कानुनमा स्नातक उत्र्तिण गरेका छन् ।

निरन्तरको मेहेनत र लगनशिलताले पाण्डेलाई अहिले सफलताको विन्दुमा पुयाएको छ । खलंगाका गल्ली गल्लीका पसल र सरकारी कार्यालयका कर्मचारीहरूको टेबुलमा पत्रिका पु¥याउन पुग्दा पाण्डेको मनमा पनि लाग्ने गर्दथ्यो,‘यसैगरी हामी कहिल्यै सरकारी कर्मचारी भइएला की ?’ हो, उनको त्यही मनको सपना अहिले पुरा भएको छ । पाण्डे ०८० साल भदौमा लोकसेवा आयोगले लिएको नेपाल सरकारको शाखा अधिकृत पदमा सिफारिस भएका छन् । उनी अहिले सरकारी वकील भएका छन् । गाउँमा उनको पहिचान फेरिएको छ । ‘वकिल साब’ भनेर उनलाई बोलाउँछन् । पाण्डेले पहिलो प्रयासमै नाम निकालेका हुन् ।

उनको पत्रिका वितरण गर्ने हकरदेखि सरकारी वकील (शाखा अधिकृत) सम्मको यात्रा धेरैका लागि प्रेरणा बनेको छ । सामान्य घरपरिवारमा जन्मिएका पाण्डेले आफ्नो मात्र सपना पुरा गरेनन् बुवा आमालाई बाचुञ्जेल खुसी हुने बाटो देखाए । पाण्डेको अहिले बसोवास राप्ती गाउँपालिका–५ दाङमा छ । ‘सरकारी सेवामा प्रवेश गरेर जनताको सेवा गर्ने दृढ इन्छा र मेहनत भयो भने सफल भइदो रहेछ’,विगतको अनुभव सुनाउँदै ३१ वर्षिय पाण्डेले भने,‘अथक मेहनत नै सफलता हो भन्ने मलाई लाग्छ ।’ पाण्डे अहिले जिल्ला सरकारी वकिल कार्यालय झापामा कार्यरत छन् ।

पाण्डेको सफलताले घरमा खुसी त छँदै थियो । शाखा अधिकृत पदमा दाजुको नाम निस्किएको २२ दिनपछि कान्छी बहिनी रोमा पाण्डे पनि शाखा अधिकृत (लेखा) समूहमा सिफारिस भइन् । कान्छो छोरा र कान्छी छोरी नेपाल सरकारको शाखा अधिकृत एकैपटक सिफारिस हुँदा घरमा बेग्लै उत्साह र खुसी छायो ।

२९ वर्षिय बहिनी रोमा २०७२ सालदेखि लोकसेवा आयोगबाट कम्प्यूटर अपरेटरमा नाम निकालेर गृह मन्त्रालयमा कार्यरत थिइन् । निरन्तरको मेहेनत र लगनशिलताले सफलता टाढा छैन् भन्ने उदाहरण पाण्डे दाजुबहिनीले देखाएका छन् ।