खोज

विद्यालयको कक्षा ६ देखि १० सम्मका विद्यार्थीले अर्धबार्षिक परीक्षा नेपाली बिषयको पाठ्यपुस्तक नै नखोलेर दिएका छन् । ती सबै कक्षामा गरी ४५५ जना विद्यार्थी अध्ययनरत छन् । आधा पौष महिना बित्दासमेत विद्यालय प्रशासन नेपाली बिषयको शिक्षकको व्यवस्थापन नगरी बसिरहेको छ ।

000

रुपन्देहीको रोहीणी गाउँपालिकाको पाखेरभिण्डी माध्यमिक विद्यालयमा आधा पुस महिना बित्दा समेत नेपाली बिषयको पठनपाठन भएको छैन । विद्यालयको प्रशासन विद्यार्थीप्रति जवाफदेही नबन्दा नेपाली बिषयको पठनपाठन नभएको हो । विद्यालय प्रशासनले त्यस बिषयको प्रश्नको जवाफ प्रयास गरेको हो तर भएन, सकिएन, हुन सकेन, मानेनन् भन्ने दिने गरेको छ । विद्यालयको कक्षा ६ देखि १० सम्मका विद्यार्थीले अर्धबार्षिक परीक्षा नेपाली बिषयको शिक्षक नै नदेखेरै दिएका छन् । ती सबै कक्षामा गरी ४५५ जना विद्यार्थी अध्ययनरत छन् ।

विद्यालयका अनुसार नेपाली बिषयकी शिक्षक शारदा ज्ञवाली कार्तिक महिनामा सुत्केरी भइ बिदामा बसेकी छिन् । उनले विद्यालयको कक्षा ६ देखि १० सम्मका विद्यार्थीलाई नेपाली बिषय पठनपाठन गराउँदै आएकी थिइन । उनी बिदामा बसेपछि पठनपाठन हुन नसकेको विद्यालय प्रशासन तर्क गर्छ । तर आश्विन महिनामा पनि नेपाली बिषयको पठनपाठन भएको देखिँदैन ।

नेपाली बिषयको पठनपाठन नभएपछि विद्यार्थीले अर्धबार्षिक परीक्षा पाठ्यपुस्तक नखोलेरै दिएका छन् । कक्षा १० का विद्यार्थी प्रमोद चौधरीले नेपाली बिषयको कति पढाइ भयो त ? भन्ने जिज्ञासामा किताब नै खुलेको छैन भन्ने जवाफ दिए । अर्की विद्यार्थी नितु यादवले पालिका स्तरीय भएको अर्धबार्षिक परीक्षा किताब नै नपढी दिएको बताइन । कति पटक हेडसरलाई शिक्षक चाहियो भनेर माग ग¥यौं तर सुनुवाई भएन उनले गुनासो पोखिन । एसईई दिने विद्यार्थी हो नेपाली बिषयको शिक्षक नै देख्न पाएका छैनौं उनले भनिन् नेपाली हामीलाई त्यसै अप्ठ्यारो लाग्छ अझै अहिलेसम्म त्यसैको पढाई भएको छैन ।

विद्यालयका प्रधानाध्यापक प्रदीप कुमार चौधरीले नेपाली बिषय पठनपाठनका लागि आफूले पहल गरेको दाबी गर्छन् । मैले पटक पटक विद्यालय व्यवस्थापन समितिलाई भने सुनुवाई भएन । शिक्षकलाई खाली घण्टीमा कक्षा लिन भने तर मानेन् उनले उल्टै गुनासो गरे । उनले विद्यालयमा जनशक्ति कम भएको हुँदा नेपाली बिषयको घण्टी व्यवस्थापन गर्न नसेको बताए । हामी बालबिकास केन्द्रको शिक्षक समेत गरेर १४ जना शिक्षक छौं उनले भने, कसरी मिलाउने हजुर ?

उक्त विद्यालयमा गत असोज १ गतेदेखि भौतिक उपस्थितिमा कक्षा संचालन हँुदै आएको छ । असोज, कार्तिक, मंसीर महिना सकिएर पौष महिना आधा सकिदासम्म विद्यार्थीले नेपाली बिषयको शिक्षक देख्न पाएका छैनन् । विद्यालयका अनुसार नेपाली बिषयको शिक्षक नभई पठनपाठन हुन नसकेका कक्षा ६ मा १०८ जना, कक्षा ७ मा ९५ जना, कक्षा ८ मा ८८ जना, कक्षा ९ मा ८८ जना र कक्षा १० मा ७६ जना गरी ४५५ विद्यार्थी छन् । ती विद्यार्थीले मंसीर महिनामा अर्धबार्षिक परीक्षा दिइसकेका छन् । परीक्षामा धेरैजसो विद्यार्थीले नेपाली बिषयमा प्रश्न सारेर बुझाएको बताए । अलि अलि जानेको लेख्यौं उनीहरुले भने, अरु प्रश्न सारेर बुझायौं ।

कम्प्यूटर नदेखि कम्प्यूटर बिषयः
विद्यालयमा कक्षा ६ देखि कम्प्यूटर बिषयको पठनपाठन भएपनि विद्यार्थीले कम्प्यूटर नदेखेको बताए । सरहरु आउनुहुन्छ किताब पढेर जानुहुन्छ कक्षा ८ का विद्यार्थीले गुनासो सुनाए । विद्यार्थी रोशिना खातुनले कम्प्यूटर चाहियो भनेर भन्दा सरहरुले बिग्रीएको छ भनेर भन्ने गरेको सुनाइन । उनले किताबमा मात्रै कम्प्यूटर बिषय पढ्दा पढाएकै नबुझिएको बताइन । कक्षामा गणित शिक्षक धिरज प्रजपतिले कम्प्यूटर विषयको कक्षा लिइरहेका थिए । उनले पनि कम्प्यूटर ल्याब रहेको कोठा बर्षौदेखि बन्द रहेको बताए । त्यहाँ भएका कम्प्यूटर चल्दैनन् त्यसैले कोठा नै खोलिएको छैन उनले भने ।

विद्यालय व्यवस्थापन समितिका अध्यक्ष शम्भु यादवले समितिमा कुरा नमिलेका कारण नेपाली बिषयको पठनपाठन नभएको बताए । उनले समिति र शिक्षकमा एउटै मत नहुँदा विद्यालयको कामले गति नलिएको र नेपाली बिषयको पठनपाठन पनि त्यसरी नै हुन नसकेको बताए । रोहिणी गाउँपालिका वडा २ की अध्यक्ष सानमति पासीले नेपाली शिक्षक नभएको र पठनपाठन नभएको बिषयमा अनभिज्ञता जनाइन । उनले तीन महिना बढी समयसम्म पठनपाठन नहुनु राम्रो नभएको बताइन ।

गाउँपालिकाका शिक्षा शाखाका प्रमुख मधु घिमीरेले विद्यालयलाई विद्यालय व्यवस्थापन समिति र शिक्षकसँग छलफल गरी कक्षा व्यवस्थापन गर्न पटक पटक सचेत गराएको भएपनि उपलब्धि हुन नसकेको बताए । उनले सक्दो छिटो नेपाली बिषयको कक्षा व्यवस्थापन गर्न पुनः निर्देशन दिइएको बताए ।