खोज

तानसेन नगरपालिकाले आगामी आर्थिक वर्षका लागि नीति बजेट तथा कार्यक्रम सार्वजनिक गरेको छ । नगरपालिकाले आर्थिक वर्ष २०७५÷०७६ का लागि ८० करोड १३ लाख १० हजार बराबरको बजेट पत्रकार सम्मेलन मार्फत सार्वजनिक गरेको हो । नगरपालिकाले सामाजिक विकासलाई प्राथमिकता दिर्दै नगरपालिकाको बैठकले यस अघि बजेट पारित गरे पनि पत्रकार सम्मेलन गरी बजेटका बारेमा जानकारी गराएको छ ।

नगरपालिकाले आन्तरिक आयबाट ५ करोड ४८ लाख ४० हजार, नेपाल सरकारबाट प्राप्त वित्तिय सामानिकरण अनुदानबाट १४ करोड ६६ लाख, राजस्व बाँडफाडबाट ८ करोड ७८ लाख १२ हजार, प्रदेश सरकारबाट प्राप्त निशर्त अनुदानबाट ४८ लाख, प्रदेश सरकारबाट राजस्व बाँडफाड अन्र्तगत ९७ लाख ८ हजार, अनुदान तथा ऋण १ करोड ५० लाख, २०७४÷ ०७५ को नगद मौज्दात ४ करोड ८६ लाख, निसर्त तर्फ कुल आय ३६ करोड ७३ लाख ६ हजार, सशर्त अनुदान तर्फ नेपाल सरकार सामानिकरण अनुदान ३० करोड २५ लाख, प्रदेश सरकारको सशर्त अनुदान आय तर्फ ७५ लाख , सामाजिक सूरक्षा कार्यक्रम ७ करोड ५० लाख लगायत गरी कुल बजेट सार्वजनिक गरेको नगरपालिकाले जनाएको छ ।

बजेट सार्वजनिक गर्दै नगरपालिकाका प्रमुख प्रशासकिय अधिकृत .किर्तनराज पौड्यालले आर्थिक वर्षको चालु खर्च तर्फ ४७ करोड ५९ लाख ३२ हजार २ सय २१ जसमा कुल चालुको ५९.४० प्रतिशत रहेको छ भने पूँजीगत तर्फ ३२ करोड ५३ लाख ७७ हजार ७ सय ७९ जसमा कुल पूँजी ४०.६० प्रतिशत रहेको बजेट ल्याएको बताए । नगरपालिकाकले आर्थिक वर्षको बजेटमा सामाजिक विकासमा बढी रकम विनियोजन गरेको छ ।
जसमा नगरपालिकाले आर्थिक विकासमा ७ करोड ६ लाख ४४ हजार , पूर्वधार विकासमा १२ करोड ३३ लाख ५६ हजार, सामाजिक विकासमा ४३ करोड २७ लाख ५० हजार, बन वातावरण तथा विपद् व्यवस्थापनमा ४ करोड ४१ लाख ३७ हजार, सुशासन तथा संस्थागत विकासका लागि ३ करोड २५ लाख ४० हजार ७ सय ७९ रकम विनियोजन गरेको हो ।
कार्यक्रममा ‘समृद्ध नगर आत्मनिर्भर नगरवासी, सफा नगर, सुखी नगरवासी’ भन्ने अवधारणलाई आत्मासाथ गर्दै नगरपालिकाले बजेट विनियोजन गरेको नगर प्रमूख अशोक कुमार शाहीले बताए । उनले भने ‘जिल्लालाई आगामी चार वर्षमा आन्तरिक पर्यटकहरुको गन्तव्यका रुपमा विकास गर्ने र बाह्य पर्यटकहरुको लागि मूख्य केन्द्रको रुपमा विस्तार गर्ने लक्ष्य रहेको छ ।’ चीनको कोरला नाका देखि नवलपुर जोड्ने राष्ट्रिय गौरबको कालीगण्डकी करीडोर आयोजना तथा छेर्लुङ–तानसेन खण्डलाई सिद्धार्थ राजमार्गमा जोडी तानसेन –सुनौली डारेक फास्ट ट्याक निर्माण गर्ने प्रमूख शाहीले बताए । कार्यक्रममा पत्रकारहरुले जिज्ञासा राख्दै भाषणलाई भन्दा पनि बजेट कार्यान्यवन पक्षलाई ध्यान दिन आग्रह गरेका छन् । उनीहरुले तानसेनलाई नमूना नगरका रुपमा विकास गर्न सुझाव दिए ।