खोज

बुटवल,३ बैसाख । सुडानको सेना र एक कुख्यात अर्धसैनिक बल आरएसएफ बीचको लडाइँमा कम्तिमा २७ जनाको मृत्युभएको छ।

राजधानी खार्तूममा भएको लडाइँमा अन्य दुई सय भन्दाबढी घाइते भएका बीबीसीले जनाएको छ। मृत्यु हुनेमा संयुक्त राष्ट्रसंघका तीनजना कामदार पनि रहेका छन्।

मारिनेमा कति सर्वसाधारण नागरिक छन् भन्ने एकिन हुन सकेको छैन। खार्तुममा राष्ट्रपतिको दरबार, सरकारी टिभी र सेनाको मुख्यालयमा प्रतिद्वन्द्वी सेनाहरूबीच झडप भएको हो। आरएसएफले विमानस्थल र अन्य प्रमुख केन्द्रहरू आफ्नो कब्जामा रहेको दाबी गरेको छ। जहाँ रातभर लडाइँ जारी रहेको अधिकारीहरुले बताएका छन्। सेनाले नागरिकलाई घरभित्रै बस्न आह्वान गरेको छ।

खार्तुममा आज सार्वजनिक बिदाको घोषणा गरिएको छ। सुडानमा नागरिक शासनबारेको प्रस्तावित सङ्क्रमणको अवस्थाका विषयमा विवाद छ। सन् २०२१ को अक्टोबरमा भएको एउटा विद्रोहपछि सुडानमा सैन्य जनरलहरूले सार्वभौम परिषद् भनिने संयन्त्र बनाएर राज्य सञ्चालन गर्दै आएका छन्।

नागरिक नेतृत्वको सरकारको प्रस्तावमा आरएसएफलाई राष्ट्रिय सेनामा समायोजन गर्ने योजना छ। आरएसएफले समायोजन १० वर्ष पछि गर्न चाहे पनि सेनाले दुई वर्षभित्र सक्नुपर्नेमा जोड दिएपछि तनाव बढेको बीबीसीले जनाएको छ।

प्रस्तावित नागरिक सरकारमा एकीकृत सेनाको नेतृत्व कसले गर्ने भन्ने कुरामा पनि सेना र आरएसएफ बीच विवाद छ।

–एजेन्सी